Ram Pothineni: రూట్ మార్చేసిన రామ్.. హిట్ కోసం ఎప్పుడు చెయ్యని రిస్క్..!

Ram Pothineni: ఇండస్ట్రీలోకి అడుగుపెట్టిన తొలి సినిమాతోనే సూపర్ హిట్ అందుకున్న హీరో రామ్ పోతినేని. దేవదాసు సినిమాతో యువ ప్రేక్షకుల మనసులు గెలుచుకున్న రామ్, ఆ తర్వాత రెడీ లాంటి బ్లాక్‌బస్టర్‌తో తెలుగు సినిమా రంగంలో తనకంటూ ప్రత్యేక గుర్తింపు తెచ్చుకున్నారు. ఆ సినిమాల తర్వాత ఆయనకు ‘చాక్లెట్ బాయ్’ ఇమేజ్ వచ్చింది. ఎనర్జిటిక్ నటన, చక్కటి డాన్స్, యూత్‌ఫుల్ లుక్ ఇవన్నీ కలిసి తక్కువ కాలంలోనే మంచి ఫ్యాన్ బేస్‌ను తీసుకొచ్చాయి.

ఎదురుదెబ్బలతో యువ హీరో..

కానీ గత కొంతకాలంగా రామ్ కెరీర్ ఆశించినంత సాఫీగా సాగడం లేదు. కొన్ని సినిమాలు బాక్సాఫీస్ వద్ద మంచి ఫలితం ఇవ్వలేకపోయాయి. ఇటీవల విడుదలైన ఆంధ్ర కింగ్ తాలూకా మొదట మంచి బజ్‌తోనే ప్రారంభమైంది. అయితే కొన్ని రోజులు గడిచాక కలెక్షన్లు తగ్గాయి. దాంతో ఆ సినిమా నుంచి పెద్ద స్థాయిలో విజయం రాలేదు. ఇలాంటి పరిస్థితి వరుసగా ఎదురైతే ఏ హీరోకైనా ఆలోచన కలగడం సహజమే.

ఇప్పుడు రామ్ కూడా అదే విషయం గ్రహించినట్లు కనిపిస్తోంది. ఒకే తరహా పాత్రలు, ఒకే ఫార్ములా సినిమాలు చేస్తే ఇక ప్రయోజనం ఉండదని నిర్ణయించుకున్నాడట. అందుకే తన కంఫర్ట్ జోన్‌ను వదిలి కొత్త దారిలో నడవాలని భావిస్తున్నాడు. క్లాస్ లేదా మాస్ అనే ఇమేజ్‌లకు పరిమితం కాకుండా, పూర్తిగా కొత్త జానర్‌ను ప్రయత్నించేందుకు సిద్ధమయ్యాడు.

కొత్త సినిమాతో ఎనర్జిటిక్ హీరో..

తాజా సమాచారం ప్రకారం, రామ్ త్వరలో ఆర్కా మీడియా వర్క్స్ నిర్మాణంలో ఓ కొత్త సినిమా చేయబోతున్నాడు. ప్రస్తుతం ఈ ప్రాజెక్ట్‌కు సంబంధించిన కథా పనులు జరుగుతున్నాయి. స్క్రిప్ట్ చాలా బాగా వచ్చిందని సినీ వర్గాల్లో టాక్ వినిపిస్తోంది. ఈ సినిమాను ప్రత్యేకంగా నిలబెట్టే అంశం దాని జానర్. ఇది ఒక థ్రిల్లర్ సినిమా కావడం విశేషం. రామ్ కెరీర్‌లో ఇలాంటి థ్రిల్లర్ సెటప్‌లో నటించడం ఇదే మొదటిసారి.

ఈ ప్రాజెక్ట్‌ను అధికారికంగా ప్రకటించేందుకు మేకర్స్ ఒక ప్రత్యేక వీడియో ప్లాన్ చేస్తున్నారట. ఆ వీడియోలోని చిన్న గ్లింప్స్ త్వరలో విడుదల కానుంది. దాంతో పాటు సినిమా పూర్తి వివరాలు వెల్లడించనున్నారు. రామ్‌ను కొత్త అవతారంలో చూడాలని అభిమానులు ఇప్పటికే ఆసక్తిగా ఎదురుచూస్తున్నారు.

ఈ ప్రయోగం హిట్ అయితే, రామ్‌కు ఇది గట్టి కమ్‌బ్యాక్ అవుతుంది. కొత్త జానర్ ప్రయత్నించడం కొంత రిస్క్ అయినా, అదే ఆయన కెరీర్‌కు కొత్త ఆరంభం కావచ్చనే ఆశలు ఉన్నాయి.

Also Read: Ram Pothineni-Bhagyasri: ఆంధ్ర కింగ్‌ తాలుకా ఎఫెక్ట్‌.. విడిపోతున్న లవ్‌బర్డ్స్‌!