Paradise Movie: నాచురల్ స్టార్ నాని ‘ద పారడైజ్’ ఆగస్టు విడుదల ఖాయమేనా!.. లేకపోతే..

Paradise Movie: టాలీవుడ్ నాచురల్ స్టార్ నాని, మాస్ డైరెక్టర్ శ్రీకాంత్ ఓదెల కాంబినేషన్‌లో వస్తున్న అత్యంత ప్రతిష్టాత్మక చిత్రం ‘ద పారడైజ్’ (The Paradise). ‘దసరా’ వంటి సెన్సేషనల్ హిట్ తర్వాత వీరిద్దరి కలయికలో వస్తున్న సినిమా కావడంతో దీనిపై అంచనాలు ఆకాశాన్ని తాకుతున్నాయి. తాజాగా ఈ సినిమా షూటింగ్ పురోగతి విడుదల తేదీపై ఫిలిం నగర్ వర్గాల్లో ఆసక్తికర చర్చ నడుస్తోంది.

60 శాతం షూటింగ్ పూర్తి.. కానీ..

సమాచారం ప్రకారం, ‘ద పారడైజ్’ చిత్రానికి సంబంధించి ఇప్పటి వరకు 60 శాతం షూటింగ్ విజయవంతంగా పూర్తయింది. ప్రస్తుతం చిత్ర బృందం కీలకమైన యాక్షన్ ఘట్టాలను, సినిమాలోని ప్రధానమైన ఇంటర్వెల్ సీక్వెన్స్‌ను చిత్రీకరిస్తోంది. మిగిలిన 40 శాతం షూటింగ్ భాగంలో ప్రధానంగా క్లైమాక్స్ ఫైట్స్, పాటలు ఉన్నాయి. దర్శకుడు శ్రీకాంత్ ఓదెల ఈ సినిమాను విజువల్స్ పరంగా చాలా గ్రాండ్‌గా తెరకెక్కిస్తున్నారు. ముఖ్యంగా పీరియాడిక్ సెట్టింగ్స్ డీటెయిలింగ్ కోసం ఎక్కువ సమయం కేటాయిస్తుండటంతో షూటింగ్ షెడ్యూల్స్ కొంత ఆలస్యమవుతున్నట్లు తెలుస్తోంది.

ఆగష్టు 21న వస్తుందా?

సినిమాను మొదట మార్చిలో విడుదల చేయాలని భావించినప్పటికీ, ప్రస్తుత పరిస్థితుల దృష్ట్యా మేకర్స్ ఆగష్టు 21, 2026ని టార్గెట్ డేట్‌గా పెట్టుకున్నారు. అయితే, షూటింగ్ ఇంకా 40 శాతం పెండింగ్ ఉండటం భారీ స్థాయిలో పోస్ట్ ప్రొడక్షన్ (VFX) పనులు ఉండటంతో, ఈ తేదీకి సినిమా వస్తుందా లేదా అనేది ఇప్పుడు పెద్ద ప్రశ్నగా మారింది. ఒకవేళ ఈ 40 శాతం షూటింగ్ ఏప్రిల్ లేదా మే నాటికి పూర్తి కాకపోతే, ఆగష్టు నుంచి సినిమా మరింత ముందుకు అంటే దసరా సీజన్‌కు వాయిదా పడే అవకాశాలు లేకపోలేదని ఇండస్ట్రీ టాక్. అయితే, చిత్ర యూనిట్ మాత్రం రాత్రింబవళ్లు శ్రమిస్తూ ఆగష్టు 21వ తేదీనే థియేటర్లలోకి రావాలని పట్టుదలతో ఉన్నారు.

సినిమా హైలైట్స్

ఈ చిత్రంలో నాని గతంలో ఎన్నడూ చూడని విధంగా ఒక పవర్‌ఫుల్ రా మాస్ పాత్రలో కనిపిస్తున్నారు. ఆయన మేకోవర్ ఇప్పటికే నెట్టింట సెన్సేషన్ క్రియేట్ చేస్తోంది. ఈ సినిమాలో కలెక్షన్ కింగ్ మోహన్ బాబు ఒక కీలక పాత్ర పోషిస్తుండటం విశేషం. ఆయన పాత్ర సినిమాకు ప్రధాన ఆకర్షణగా నిలవనుంది. రాక్‌స్టార్ అనిరుద్ రవిచందర్ ఈ చిత్రానికి సంగీతం అందిస్తున్నారు. ‘దసరా’కు సంతోష్ నారాయణన్ మ్యాజిక్ చేస్తే, ఈసారి అనిరుద్ తన బ్యాక్‌గ్రౌండ్ స్కోర్‌తో థియేటర్లను దద్దరిల్లజేయడానికి సిద్ధంగా ఉన్నారు. ఎస్‌ఎల్‌వి సినిమాస్ బ్యానర్‌పై సుధాకర్ చెరుకూరి ఎక్కడా రాజీ పడకుండా భారీ బడ్జెట్‌తో ఈ యాక్షన్ డ్రామాను నిర్మిస్తున్నారు. మొత్తానికి ‘ద పారడైజ్’ టీమ్ ప్రస్తుతం రేసు గుర్రంలా పరిగెడుతోంది. ఆగష్టు 21న నాని తన బాక్సాఫీస్ ప్రతాపాన్ని చూపిస్తారో లేక షూటింగ్ ఆలస్యం వల్ల మరో తేదీని వెతుక్కుంటారో చూడాలి. దీనిపై అధికారిక ప్రకటన వచ్చే వరకు అభిమానులు మరికొంత కాలం వేచి చూడాల్సిందే.