Massive Encounter: బీజాపూర్‌‌లో భారీ ఎన్‌కౌంటర్.. మావోయిస్టు టాప్ కమాండర్ ఉదయ్ సింగ్ హతం

Massive Encounter: ఛత్తీస్‌గఢ్‌లోని బీజాపూర్ జిల్లాలో భద్రతా దళాలు జరిపిన భారీ ఆపరేషన్‌లో నిషేధిత నక్సలైట్ సంస్థకు చెందిన కీలక కమాండర్ ఉధమ్ సింగ్ మరణించారు. జిల్లాలోని పెద్దగళూరు అటవీ ప్రాంతంలో నక్సలైట్లు సంచరిస్తున్నారన్న పక్కా సమాచారంతో గాలింపు చేపట్టిన బలగాలకు, మావోయిస్టులకు మధ్య ఎదురుకాల్పులు చోటుచేసుకున్నాయి. ఈ క్రమంలో భద్రతా దళాల వ్యూహాత్మక దాడిని తట్టుకోలేక నక్సలైట్లు వెనకడుగు వేయగా, ఘటనా స్థలంలో ఉధమ్ సింగ్ మృతదేహాన్ని బలగాలు గుర్తించాయి.

ఈ ఆపరేషన్‌ను డిస్ట్రిక్ట్ రిజర్వ్ గార్డ్ (DRG), సీఆర్‌పీఎఫ్ కోబ్రా (CoBRA) బలగాలు సంయుక్తంగా నిర్వహించాయి. అటవీ ప్రాంతంలోని దట్టమైన పొదల్లో నక్కిన నక్సలైట్లు ఒక్కసారిగా కాల్పులకు తెగబడటంతో బలగాలు దీటుగా స్పందించాయి. సుదీర్ఘ సమయం పాటు జరిగిన ఈ భీకర పోరులో కీలక నేతను కోల్పోవడం నక్సలైట్ వ్యవస్థకు పెద్ద దెబ్బగా భావిస్తున్నారు. ఆ ప్రాంతంలో ఇంకా ఎవరైనా నక్కి ఉన్నారా అనే అనుమానంతో భద్రతా దళాలు కార్డన్ సెర్చ్‌ను కొనసాగిస్తున్నాయి.

ఎన్‌కౌంటర్ జరిగిన ప్రదేశంలో బలగాలు తనిఖీలు చేపట్టగా, అత్యాధునికమైన AK-47 రైఫిల్‌తో పాటు భారీగా పేలుడు పదార్థాలు, విప్లవ సాహిత్యం, కిట్ బ్యాగులను స్వాధీనం చేసుకున్నారు. మరణించిన ఉధమ్ సింగ్ గతంలో అనేక హింసాత్మక ఘటనల్లో పాల్గొన్నట్లు సమాచారం. ప్రభుత్వం ఈయనపై భారీగా రివార్డును కూడా ప్రకటించినట్లు తెలుస్తోంది. ఈ ఆయుధాల రికవరీ ద్వారా నక్సలైట్లు ఏదైనా పెద్ద కుట్రకు ప్లాన్ చేస్తున్నారా అనే కోణంలో పోలీసులు విచారణ జరుపుతున్నారు.

Also Read: తెలంగాణ గ్రామ పంచాయతీలకు గుడ్ న్యూస్.. 15వ ఆర్థిక సంఘం నిధుల విడుదల

బస్తర్ ప్రాంతంలో శాంతి భద్రతల స్థాపన కోసం ప్రభుత్వం చేపట్టిన ‘ఆపరేషన్ కగార్’లో భాగంగా ఈ ఎన్‌కౌంటర్ జరిగినట్లు విశ్లేషకులు భావిస్తున్నారు. ఇటీవలి కాలంలో అటవీ ప్రాంతాల్లో భద్రతా బలగాల పహారా పెరగడం, నిరంతర నిఘా కొనసాగడం వల్ల నక్సలైట్ కార్యకలాపాలు గణనీయంగా తగ్గుముఖం పడుతున్నాయి. ఈ తాజా విజయంతో బీజాపూర్ సరిహద్దు ప్రాంతాల్లో భద్రతను మరింత కట్టుదిట్టం చేశారు.

ఎన్‌కౌంటర్‌లో నక్సలైట్ కమాండర్ ఉధమ్ సింగ్ మృతి!

ఛత్తీస్‌గఢ్-బీజాపూర్ జిల్లా పెద్దగళూరు అటవీ ప్రాంతంలో ఎన్‌కౌంటర్

భద్రతా దళాలు, నక్సలైట్ల మధ్య భారీగా ఎదురుకాల్పులు

డీఆర్‌జీ, సీఆర్‌పీఎఫ్ కోబ్రా బలగాల సంయుక్త ఆపరేషన్

ఘటనాస్థలంలో ఆటోమేటిక్ AK-47 రైఫిల్ స్వాధీనం

Naxalite… pic.twitter.com/BBgRTRKZ4Q

— BIG TV Breaking News (@bigtvtelugu) February 5, 2026

Share

• 
• 
• 
• 
• 
•