Thalapathy Vijay: ప్రభుత్వం ఇచ్చే డబ్బును తీసుకోండి కానీ ఓటు మాత్రం టీవీకేకే వేయండి.. దళపతి విజయ్

Thalapathy Vijay: తమిళనాడు అసెంబ్లీ ఎన్నికలకు సమయం దగ్గరపడుతున్న వేళ, తమిళగ వెట్రి కళగం (TVK) అధినేత, దళపతి విజయ్ సేలంలో నిర్వహించిన భారీ బహిరంగ సభ రాజకీయంగా పెను సంచలనం సృష్టించింది. అధికార డీఎంకే (DMK) లక్ష్యంగా విజయ్ చేసిన విమర్శలు ఆ రాష్ట్ర రాజకీయాల్లో హీట్ పెంచాయి. తమిళనాడు ముఖ్యమంత్రి ఎం.కె. స్టాలిన్ నేతృత్వంలోని ప్రభుత్వం అధికార దుర్వినియోగానికి, అవినీతికి పాల్పడుతోందని ఆయన ఘాటుగా ఆరోపించారు. ఈ సందర్భంగా ఆయన తన పార్టీ గుర్తును ఉద్దేశిస్తూ, రాబోయే ఎన్నికల్లో ఓటర్లంతా “విజిల్ వేయాలి” అని పిలుపునిచ్చారు.

మహిళా ఓటర్లను ఆకర్షించేందుకు డీఎంకే ప్రభుత్వం ప్రవేశపెట్టిన పథకాలను విజయ్ తప్పుబట్టారు. రాష్ట్ర ప్రభుత్వం మహిళలకు రూ. 3,000 అడ్వాన్స్ పేమెంట్ ఇవ్వడం మరియు ఎన్నికల్లో గెలిస్తే ‘సమ్మర్ బోనంజా’ కింద మరో రూ. 2,000 ఇస్తామని హామీ ఇవ్వడం ఓటర్లను కొనడమేనని ఆయన విమర్శించారు. “మంచి టీవీకే (TVK) కు ఓటు వేస్తారా లేదా చెడు డీఎంకే (DMK) కు వేస్తారా?” అని ప్రజలను ప్రశ్నించిన ఆయన, ప్రభుత్వం ఇచ్చే డబ్బును తీసుకోండి కానీ ఓటు మాత్రం టీవీకేకే వేయండి అని కోరారు. తన నాయకత్వంలో నిజమైన సంక్షేమ రాజ్యాన్ని అందిస్తానని ఆయన హామీ ఇచ్చారు.

విజయ్‌కి రాజకీయ అనుభవం లేదన్న విమర్శలకు ఆయన తనదైన శైలిలో సమాధానమిచ్చారు. “డీఎంకే అనుభవం అంతా అవినీతిలోనే ఉంది.. ఆ విషయంలో మాకు అనుభవం లేదన్నది నిజమే” అని ఎద్దేవా చేశారు. ప్రజలను మోసం చేసేవారిని, అధికార గర్వంతో ఉన్నవారిని తాను గద్దె దించుతానని, తనను నమ్మిన వారిని ఎప్పటికీ నిరాశపరచబోనని స్పష్టం చేశారు. సేలం సభకు ప్రభుత్వం విధించిన ఆంక్షలపై కూడా ఆయన ఆగ్రహం వ్యక్తం చేశారు. జనాన్ని పరిమితం చేయడం వంటి చర్యలు స్టాలిన్ భయాన్ని సూచిస్తున్నాయని, ఇవన్నీ “స్టాలిన్ ఆపరేటింగ్ ప్రొసీజర్” లో భాగమని మండిపడ్డారు.

తమిళనాడు రాజకీయాల్లో టీవీకే ఒక బలమైన శక్తిగా ఎదుగుతోందని విశ్లేషకులు భావిస్తున్నారు. విజయ్ డీఎంకేను తన ప్రధాన రాజకీయ శత్రువుగా ప్రకటించడమే కాకుండా, ఆ పార్టీతో పొత్తుకు ఏమాత్రం ఆస్కారం లేదని తేల్చి చెప్పారు. మరోవైపు, ప్రధాన ప్రతిపక్షం ఏఐఏడీఎంకే పై ఆయన కొంత మెతక వైఖరిని ప్రదర్శించడం గమనార్హం. ఎంజీఆర్ వారసత్వాన్ని అందిపుచ్చుకుంటూ, ఆ పార్టీలోని అసంతృప్త నేతలను తనవైపు తిప్పుకునే ప్రయత్నంలో భాగంగానే ఈ వ్యూహాన్ని అనుసరిస్తున్నట్లు కనిపిస్తోంది. దశాబ్దాలుగా డీఎంకే, ఏఐఏడీఎంకేల మధ్య సాగుతున్న ద్రవిడ రాజకీయాల్లో విజయ్ ఎంట్రీ కొత్త సమీకరణాలకు దారితీస్తోంది.

Read Also: Ajith vs Vijay: రోడ్డుపై కొట్టుకున్న హీరోలు అజీత్, విజయ్.. దిగజారిన దళపతి ఫ్యాన్స్, ఇదిగో వీడియో

Share

• 
• 
• 
• 
• 
•