Amazon Prime Video : ప్రైమ్ వీడియో రికార్డులు కొల్లగొడుతున్న 2 గంటల 6 నిమిషాల మర్డర్ మిస్టరీ… ఇంకా చూడలేదా ?

Amazon Prime Video : ఓటీటీలలో మర్డర్ మిస్టరీలకు ప్రత్యేకంగా క్రేజ్ ఉంటుందన్న విషయం అందరికీ తెలిసిందే. తాజాగా ఈ జానర్లో విడుదలైన ఓ క్రేజీ థ్రిల్లర్ ఇప్పుడు రికార్డులు కొల్లగొడుతోంది. మరి ఆ మూవీ ఏంటి? రికార్డులు బద్దలు కొట్టేంత ఆ మూవీలో ఏముంది ? ఆ మూవీ ఏ ఓటీటీలో ఉంది? అనే విషయాలపై ఇప్పుడు ఒక లుక్కేద్దాం పదండి.

ప్రైమ్ వీడియోలో స్ట్రీమింగ్

శోభితా ధూళిపాళ నటించిన తాజా చిత్రం ‘చీకటిలో’ (cheekatilo) ఓటీటీలో దుమ్మురేపుతోంది. ఈ ఏడాది ప్రైమ్ వీడియో ఇండియా (Amazon Prime Video)లో అత్యధికంగా వీక్షించిన సినిమాలలో ఒకటిగా నిలిచింది.ఈ తెలుగు మర్డర్ మిస్టరీ రికార్డు స్థాయిలో వ్యూస్‌ను సాధించింది. ఈ ఏడాది జనవరిలో విడుదల అయిన ‘చికటిలో’ చిత్రం ప్రారంభ వారంలో అత్యధికంగా ప్రసారం అయిన సౌత్ ఒరిజినల్ చిత్రంగా నిలిచిందని ప్రైమ్ వీడియో ఇండియా సోషల్ మీడియాలో ప్రకటించింది. ఈ మూవీ విడుదలైన మొదటి వారాంతంలో బాగా ట్రెండ్ అయింది. అంతేకాదు అన్ని ప్రాంతాలలో అద్భుతమైన స్పందనను పొందింది. మంచి కథ ఉంటే భాష అడ్డు కాదనే విషయాన్ని ఈ మూవీ మరోసారి నిరూపించింది. .

సురేష్ ప్రొడక్షన్స్ బ్యానర్ పై సురేష్ బాబు నిర్మించిన ‘చీకటిలో’ చిత్రానికి శరణ్ కొప్పిశెట్టి దర్శకత్వం వహించారు. ఈ చిత్రంలో సంధ్యగా శోభిత ధూళిపాళ కన్పించగా, విశ్వదేవ్ రాచకొండ మరో మెయిన్ లీడ్ గా నటించారు. చైతన్య విశాలాక్షి, ఇషా చావ్లా, ఝాన్సీ, ఆమని, వడ్లమాని శ్రీనివాస్ కూడా కీలక పాత్రలు పోషించారు. ఈ ఉత్కంఠభరితమైన మర్డర్ మిస్టరీ ప్రైమ్ వీడియో టాప్ సౌత్ ఒరిజినల్స్‌లో ఒకటిగా మారింది. ఇది ప్రైమ్ వీడియోలో టాప్ 5లో స్థానం సంపాదించింది. జనవరి 23న ప్రపంచవ్యాప్తంగా ప్రీమియర్ అయిన “చికటిలో”, ప్రైమ్ వీడియో సౌత్ ఒరిజినల్స్ పోర్ట్‌ఫోలియోకు ఒక మైలురాయిగా నిలిచింది. దీనికి IMDbలో 6.6 రేటింగ్ ఉంది. ఒక సీరియల్ రేపిస్ట్ బండారాన్ని బయట పెట్టాలనే దృఢనిశ్చయం ఉన్న యువతి కథే ఈ చిత్రం.

కథలోకి వెళ్తే…

హైదరాబాద్ నేపథ్యంలో జరిగే ఉత్కంఠభరితమైన హత్య రహస్యం ‘చికటిలో’. ఇందులో సంధ్య అనే క్రైమ్ ఇన్వెస్టిగేటివ్ గ్రాడ్యుయేట్ మంచి టీవీ కెరీర్‌ను వదిలి, కోల్డ్ కేసులను పరిష్కరించడానికి తన సొంత యూట్యూబ్ పాడ్‌ కాస్ట్‌ ను స్టార్ట్ చేస్తుంది. ఈ నేపథ్యంలోనే ఒక ఇంటర్న్ దారుణంగా హత్యకు గురవుతాడు. అయితే అతని మరణం వెనకున్న మర్డర్ మిస్టరీని వెలికితీసేందుకు తన సొంత పాడ్‌ కాస్ట్ “చికటిలో”ను మొదలు పెడుతుంది. ఇన్‌స్పెక్టర్ రాజీవ్‌తో కలిసి, ఈ ప్రమాదకరమైన కేసును దర్యాప్తు చేస్తుంది. దీంతో ఆ విచారణలో చాలా కాలంగా పోలీసులకు చిక్కకుండా తిరుగుతున్న హంతకుడిని పట్టుకోవడానికి ట్రై చేస్తుంది. న్యాయం కోసం, మహిళలను రక్షించాలనే ఆలోచనతో ఉన్న సంధ్యకు పాడ్‌కాస్ట్‌ అనేది ఆయుధంగా మారుతుంది. మరి ఇంతకీ ఆ ఇంటర్న్ ను ఎవరు ఎందుకు చంపారు ? చివరికి హీరోయిన్ హంతకుడిని కనిపెట్టగలిగిందా ? అనేది మూవీని చూసి తెలుసుకోవాల్సిందే.