Zombie Movie OTT : ప్రపంచంలో ఎవరూ లేకుండా మనం మాత్రమే జీవించి ఉంటే ఎంత బాగుంటుందో అనే ఆలోచన మీకెప్పుడైనా వచ్చిందా? ఈ ఆలోచన ఊహించడానికి బాగానే ఉంటుంది కానీ రియాల్టీలోను, రీల్‌ లైఫ్‌లోనూ సీన్‌ కాస్త డిఫెరెంట్‌గా, భయంకరంగా ఉంటుంది. మాట్లాడటానికి మనుషులే లేకుండా.. వినిపించే శబ్దం గాలిది మాత్రమే అయితే ఆ నిశ్శబ్దం ఎంత భయంకరంగా మారుతుందో ఊహించుకుంటునే ఎంతో భయంవేస్తుంది. పగలు ఖాళీగా కనిపించే నగరం.. రాత్రి పడే సరికి మాత్రం ప్రాణాలు తీసే చీకటి ప్రపంచంగా మారితే అక్కడ ఒక్కరోజు గడపడం కూడా ఎంత కష్టమో కదా. ఇలాంటి భయం, ఒంటరితనం, ప్రాణాల కోసం పోరాటంతో ముందుకు సాగే కథే ‘ఐ యమ్‌ లెజెండ్'(I Am Legend). ఇది ఒక మనిషి ఆశ కోల్పోకుండా ఎలా బతికాడో చూపించే సర్వైవల్ థ్రిల్లర్. మొదటి సీన్‌ నుంచే ఖాళీగా కనిపించే నగరం ప్రేక్షకుడిలో ఒక విచిత్రమైన భయాన్ని కలిగిస్తుంది.
2007లో విడుదలైన ఈ హాలీవుడ్ సైన్స్ ఫిక్షన్ థ్రిల్లర్ ప్రస్తుతం అమెజాన్‌ ప్రైమ్‌ వీడియోలో స్ట్రీమ్‌ అవుతోంది. ఈ చిత్రానికి ఫ్రాన్సిస్ లారెన్స్ దర్శకత్వం వహించారు. విల్ స్మిత్ ప్రధాన పాత్రలో నటించారు. సినిమా మొత్తం ఎక్కువ భాగం ఆయన పాత్ర చుట్టూనే తిరుగుతుంది. ఒంటరిగా జీవించే వ్యక్తి పరిస్థితిని ఆయన చాలా సహజంగా చూపించారు. పాడైపోయిన నగరం, ఖాళీ రోడ్లు, రాత్రి వచ్చే భయంకర జీవులు సినిమాకు ప్రధాన ఆకర్షణగా నిలుస్తాయి. ముఖ్యంగా బ్యాక్‌ గ్రౌండ్‌ మ్యూజిక్ గూస్‌బంప్స్‌ అనే చెప్పాలి. ఇక కొన్ని సీన్స్‌ను ఎలాంటి మ్యూజిక్ లేకుండా సైలెంట్‌గా చూపించిన విధానం మూవీని నెక్ట్స్‌ లెవల్‌కు తీసుకెళ్లింది.
క్యాన్సర్‌కు మందుగా తయారు చేసిన ఒక వైరస్ అనుకోకుండా ప్రపంచాన్ని నాశనం చేసే స్థాయికి చేరుతుంది. ఆ వైరస్ కారణంగా చాలా మంది మనుషులు చనిపోతారు. ఇంకొందరు భయంకర జీవులుగా మారిపోతారు. ఈ పరిస్థితిలో న్యూయార్క్ నగరంలో రాబర్ట్ నెవిల్ అనే వ్యక్తి మాత్రమే సాధారణ మనిషిగా మిగిలిపోతాడు.
అతను ఒక శాస్త్రవేత్త. వైరస్‌కు మందు కనుగొనడానికి ప్రతిరోజూ ప్రయత్నిస్తుంటాడు. పగలు నగరమంతా తిరిగి అవసరమైన వస్తువులు సేకరిస్తాడు. రాత్రి అయితే ఇంట్లో దాక్కుంటాడు. ఎందుకంటే చీకటి పడిన తర్వాత వైరస్ బారినపడిన జీవులు బయటకు వస్తాయి. అవి మనుషులపై దాడి చేస్తాయి. రాబర్ట్ జీవితంలో అతని కుక్క మాత్రమే తోడుగా ఉంటుంది. మాట్లాడటానికి మనుషులు లేకపోవడంతో అతని ఒంటరితనం మరింత పెరుగుతుంది. అయినా కూడా ఆశ వదలకుండా వైరస్‌కు చికిత్స కనుగొనడానికి ప్రయత్నిస్తూనే ఉంటాడు. ఈ క్రమంలో కొన్ని ప్రమాదకర ఘటనలు జరుగుతాయి. ఒక దశలో ఇంకా కొంతమంది బతికి ఉన్నారని అతనికి తెలుస్తుంది.
అక్కడి నుంచి కథ మరింత ఎమోషనల్‌గా మారుతుంది. వైరస్‌కు మందు కనుగొనే ప్రయత్నంలో రాబర్ట్ తీసుకునే నిర్ణయాలు కథను క్లైమాక్స్‌కు తీసుకెళ్తాయి. చివరికి ప్రపంచాన్ని కాపాడటానికి అతను చేసే త్యాగం ఈ కథకి హైలెట్‌గా నిలుస్తుంది. ఒంటరితనం, భయం, ఆశ కలిసిన ఈ సినిమా చివరి వరకు ప్రేక్షకుడిని స్టోరీలో ఇన్వాల్వ్‌ అయ్యేలా చేస్తుందని కచ్చితంగా చెప్పవచ్చు.
Share
కోడి గుడ్డు బాయిల్ చేస్తే ఈ గుర్తులు కనిపిస్తే పొరపాటున కూడా తినకండి.. చాలా ప్రమాదం
బెంగాల్‌లో దారుణం.. సువేందు అధికారి పీఏ కాల్చివేత.. పాయింట్ బ్లాంక్ రేంజ్‌లో కాల్పులు!
