AI Chatbots: ఏంటీ.. AI చాట్‌బాట్‌లతో అతిగా మాట్లాడితే పిచ్చి పడుతుందా? దీనిలో నిజమెంత?

AI Chatbots: నేటి డిజిటల్ యుగంలో పొద్దున్న లేచింది మొదలు రాత్రి పడుకునే వరకు చాలామంది చాట్ జీపీటీ, జెమిని వంటి ఏఐ బాట్‌లతోనే గడుపుతున్నారు. పని ఒత్తిడి తగ్గించుకోవడానికో లేదా ఒంటరితనం పోగొట్టుకోవడానికో.. కారణమేదైనా ఏఐ ఇప్పుడు మన జీవితంలో ఓ అంతర్భాగమైపోయింది. అయితే, ఈ అతి పరిచయం మన మానసిక స్థితిని ప్రమాదంలో పడేస్తోందా? సోషల్ మీడియాలో వైరల్ అవుతున్న ‘ఏఐ సైకోసిస్’ వార్తల్లో నిజమెంత? కృత్రిమ మేధతో అతిగా సంభాషిస్తే నిజంగానే మనిషి పిచ్చివాడవుతాడా? ఈ విషయంలో నిపుణులు ఏం చెబుతున్నారో ఇప్పుడు చూద్దాం..

ఏఐ సైకోసిస్ అంటే ఏమిటి?

వైద్యశాస్త్రంలో ఏఐ సైకోసిస్ అనే పదం అధికారికంగా ఎక్కడా లేదు. ఏఐతో అతిగా చాట్ చేయడం లేదా మెంటల్‌గా కనెక్ట్ అవడం వల్ల ఏర్పడే గందరగోళాన్ని సూచించేలా ఈ పదాన్ని వాడుతుంటారు. ముఖ్యంగా మనుషులతో మాట్లాడటం తగ్గించి, కేవలం మెషీన్లతోనే బంధాన్ని పెంచుకోవడం వల్ల కొందరిలో వాస్తవ లోకానికి, వర్చువల్ లోకానికి మధ్య తేడా తెలియని పరిస్థితి ఏర్పడవచ్చు. ఏఐ నేరుగా పిచ్చిపట్టేలా చేయదు కానీ, ఇప్పటికే మానసిక ఒత్తిడిలో ఉన్నవారికి ఇది కొంత ఇబ్బందికరంగా మారే అవకాశం ఉంది.

Also Read: 80W ఫాస్ట్ ఛార్జింగ్‌తో నోకియా లూమియా రీ-ఎంట్రీ.. ఇవిగో పూర్తి వివరాలు!

మెదడుపై ఏఐ ప్రభావం..

ఏఐతో అతిగా మాట్లాడటం వల్ల మన ఆలోచనా శక్తి తగ్గే ప్రమాదం ఉంది. ప్రతి చిన్న విషయానికి చాట్‌బాట్‌లపై ఆధారపడటం వల్ల సొంతంగా నిర్ణయాలు తీసుకునే సామర్థ్యం దెబ్బతింటుంది. అలాగే, ఏఐ ఇచ్చే సమాధానాలను మనుషుల భావోద్వేగాలతో పోల్చుకోవడం వల్ల తెలియకుండానే ఒక రకమైన ఎమోషనల్ అటాచ్‌మెంట్ ఏర్పడుతుంది. ఇది క్రమంగా సామాజిక దూరాన్ని పెంచి, ఒంటరితనాన్ని అలవాటు చేస్తుంది.

జాగ్రత్త పడటమెలా?

ఏదైనా సరే పరిమితికి మించితే ప్రమాదకరమే. ఏఐ అనేది కేవలం ఒక టూల్ మాత్రమే అనే నిజాన్ని ప్రతి ఒక్కరూ గ్రహించాలి. అర్ధరాత్రుల వరకు వీటితో చాటింగ్ చేస్తుంటే.. నిద్రలేమి సమస్యలను ఎదుర్కోవాల్సి ఉంటుంది. కాబట్టి.. ఏఐతో పరిమితికి మించి అటాచ్‌మెంట్ పెట్టుకోవద్దు. వీలైనంత వరకు స్నేహితులు, కుటుంబ సభ్యులతో నేరుగా మాట్లాడటానికి ప్రాధాన్యత ఇవ్వాలి. అలాగే ఏఐ ఇచ్చే సమాచారాన్ని గుడ్డిగా నమ్మకుండా, సొంత తెలివితో ఆలోచించడం చాలా ముఖ్యం. ఏఐ చాట్‌బాట్‌లు మన పనులను సులభం చేయాలే కానీ మన జీవితాలను శాసించకూడదు. పరిమితులు పాటిస్తూ వాడుకుంటే ఏఐ వల్ల ఎలాంటి మానసిక ఇబ్బందులు ఉండవు.

Also Read: ఇదే సరైన సమయం.. ఐఫోన్ 17 సిరీస్‌పై కనీవినీ ఎరుగని డిస్కౌంట్లు, మిస్ అవ్వకండి!