Fact Check: గత కొంతకాలంగా చాలామందికి CBI లేదా సైబర్ క్రైమ్ డిపార్ట్‌మెంట్ పేరుతో ఈ-మెయిల్స్ వస్తున్నాయి. అవి చూసినప్పుడు నిజంగా ప్రభుత్వ శాఖల నుంచి పంపినట్లే అనిపిస్తాయి. భాష, లోగో, అధికారిక పదాలు అన్నీ నమ్మకం కలిగించేలా ఉంటాయి. కానీ నిజానికి అవి పూర్తిగా మోసపూరిత ఈ-మెయిల్స్ మాత్రమే.
ఈ నకిలీ ఈమెయిల్స్‌లో ప్రధానంగా భయాన్ని సృష్టించే పదాలను ఎక్కువగా వాడతారు. ఎలాగంటే.. కోర్టు ఆర్డర్ జారీ అయింది, చట్టపరమైన చర్యలు తీసుకుంటాం, తక్షణ అరెస్ట్, భారీ జరిమానా.. ఇలా చదివిన వెంటనే ఎక్కడలేని భయంపుట్టేలా, వారి మెయిల్స్‌కు వెంటనే స్పందించాల్సిందే అన్న ఒత్తిడిని సృష్టిస్తారు.
మరికొన్ని మెయిల్స్ ద్వారా.. మీరు అశ్లీల చిత్రాలు, వీడియోలు చూశారని ఆరోపిస్తూ బెదిరిస్తారు. కానీ ఇక్కడ మీరు గుర్తుంచుకోవాల్సిన ముఖ్యమైన విషయం ఒక్కటే. CBI గానీ, సైబర్ క్రైమ్ విభాగం గానీ ఎప్పుడూ వ్యక్తిగత ఈ-మెయిల్స్ ద్వారా ఇలాంటి నోటీసులు పంపవు. కాబట్టి అలాంటి మెయిల్స్ వస్తే అది నకిలీదేనని గుర్తించాలి.
ఈ స్కామ్ వెనుక ఉన్న అసలు ఉద్దేశ్యం మిమ్మల్ని భయపెట్టడం. అలాగే అలాంటి మెయిల్స్ చూసిన వెంటనే భయపడిన వ్యక్తి వాళ్లు పంపిన లింక్‌పై క్లిక్ చేయడం లేదా అటాచ్ చేసిన ఫైల్‌ను డౌన్‌లోడ్ చేయడం జరుగుతుంది. అలా చేసిన వెంటనే మీ మొబైల్ లేదా కంప్యూటర్‌లో మాల్వేర్ ఇన్‌స్టాల్ అవుతుంది. దాని ద్వారా బ్యాంకు వివరాలు, పాస్‌వర్డ్‌లు, వ్యక్తిగత సమాచారం అన్నీ దొంగిలించే ప్రయత్నం చేస్తారు. కాబట్టి.. అలాంటి మెయిల్స్ రాగానే స్పందించకపోవడమే ఉత్తమం.
ఇలాంటి బెదిరింపు మెయిల్స్ మీకు ఎదురైతే స్పందించాల్సిన అవసరం లేదు. వారు పంపే లింక్‌లను క్లిక్ చేయడం, అటాచ్ చేసిన ఫైల్‌లను డౌన్‌లోడ్ చేయడం వంటివి అస్సలు చేయకూడదు. వాటిని డిలీట్ చేయడమో లేదా స్పామ్‌గా గుర్తించడమో చేయాలి. ఒకవేళ ఏదైనా అనుమానం ఉంటే, భద్రత కోసం 1930 హెల్ప్‌లైన్‌కు కాల్ చేయండి లేదా cybercrime.gov.in వెబ్‌సైట్‌లో ఫిర్యాదు చేయండి. భయాన్ని సృష్టించి మోసం చేయడమే ఈ స్కామ్‌ల ప్రధాన వ్యూహం. సరైన సమాచారం తెలుసుకుని జాగ్రత్తగా ఉంటేనే మీరు కూడా సేఫ్‌గా ఉండగలరని గుర్తుంచుకోండి.
Share
Skull Scare: హైదరాబాద్లో మహిళ పుర్రె కలకలం.. ఇంతకీ ఎవరామె?
Balakrishna: సినిమా హిట్టు.. ఫ్లాప్ తో సంబంధం లేదు.. విశ్వనాథుడి సన్నిధిలో బాలయ్య!
