Instagram: నేటి డిజిటల్ ప్రపంచంలో ఇన్స్టాగ్రామ్ అనేది మన జీవితంలో ఒక ముఖ్యమైన భాగంగా మారిపోయింది. అయితే, దీని వాడకం ఎంతగా పెరుగుతోందో.. ఖాతాలను హ్యాక్ చేసే ముఠాలు కూడా అంతే వేగంగా చొరబడుతున్నాయి. సైబర్ నేరగాళ్లు రకరకాల మార్గాల్లో వినియోగదారులను మోసం చేస్తూ అకౌంట్లను తమ ఆధీనంలోకి తీసుకుంటున్నారు. వారు అనుసరిస్తున్న కొన్ని ప్రధానమైన పద్ధతులను తెలుసుకుని అప్రమత్తంగా ఉండటం ఎంతో అవసరం.
చాలామంది యూజర్లకు ఇన్స్టాగ్రామ్ లేదా మెటా సంస్థ నుంచి వచ్చినట్లుగా కొన్ని ఈ-మెయిల్స్ లేదా డైరెక్ట్ మెసేజ్లు వస్తుంటాయి. మీ అకౌంట్ కాపీరైట్ నిబంధనలను ఉల్లంఘించిందని, వెంటనే స్పందించకపోతే అకౌంట్ బ్లాక్ అవుతుందని అందులో భయపెడతారు. ఆ కంగారులో యూజర్లు వారు పంపిన లింక్లను క్లిక్ చేసి మోసపోతుంటారు. తీరా చూస్తే.. ఆ లింక్ ద్వారా తెరుచుకునే పేజీలు అచ్చం ఇన్స్టాగ్రామ్ లాగే కనిపిస్తాయి. అక్కడ మీ యూజర్ నేమ్, పాస్వర్డ్ ఎంటర్ చేయగానే, ఆ వివరాలతో పాటు టూ-ఫ్యాక్టర్ అథెంటికేషన్ కోడ్ కూడా హ్యాకర్ల చేతికి వెళ్లిపోతుంది.
ఎక్కువ మంది ఫాలోవర్లు ఉన్న ఇన్ఫ్లుయెన్సర్లు, బ్రాండ్లను టార్గెట్ చేస్తూ హ్యాకర్లు సరికొత్త మోసాలకు తెరతీస్తున్నారు. పెద్ద కంపెనీల ప్రతినిధుల తరహాలో నటిస్తూ భారీగా డబ్బులు ఇస్తామంటూ స్పాన్సర్షిప్ డీల్స్ ఆఫర్ చేస్తారు. ఒప్పంద పత్రాల పేరుతో కొన్ని ఫైళ్లను పంపుతారు. ఆ ఫైళ్లను డౌన్లోడ్ చేసి ఓపెన్ చేయగానే.. ఫోన్ లేదా కంప్యూటర్లలోకి మాల్వేర్ అనే వైరస్ ప్రవేశించి మన డేటాను దొంగిలిస్తుంది.
అకౌంట్కు బ్లూ వెరిఫికేషన్ బ్యాడ్జ్ వస్తే సెలబ్రిటీ హోదా వస్తుందనే ఆశ చాలామందిలో ఉంటుంది. సైబర్ నేరగాళ్లు దీనిని ఒక ఆయుధంగా వాడుకుంటున్నారు. ఉచితంగా లేదా చాలా వేగంగా బ్లూ టిక్ ఇప్పిస్తామంటూ ఆటోమేటెడ్ బాట్ల ద్వారా మెసేజ్లు పంపుతారు. ఆ ప్రక్రియ కోసం వెరిఫికేషన్ పేజీల పేరిట మన వ్యక్తిగత వివరాలను, లాగిన్ ఐడీలను అడిగి అకౌంట్లను దౌర్జన్యంగా లాగేసుకుంటారు.
Also Read: 50MP కెమెరా, 6,500mAh బ్యాటరీతో Motorola Edge 70 Pro+ లాంచ్.. ధర వింటే షాకే!
గతంలో వేరే వెబ్సైట్లలో జరిగిన డేటా లీకేజీల ఆధారంగా హ్యాకర్లు ఇన్స్టాగ్రామ్ అకౌంట్లను హ్యాక్ చేస్తుంటారు. చాలామంది అన్ని చోట్లా ఒకే పాస్వర్డ్ను వాడుతుంటారు. దీనిని ఆసరాగా చేసుకుని సాఫ్ట్వేర్ల సాయంతో అకౌంట్లను ఓపెన్ చేస్తారు. అంతేకాకుండా.. నకిలీ బ్రౌజర్ ఎక్స్టెన్షన్ల ద్వారా బ్రౌజర్లోని సెషన్ కుకీలను దొంగిలించి, పాస్వర్డ్ అవసరం లేకుండానే నేరుగా మీ ఇన్స్టాగ్రామ్ ప్రొఫైల్లోకి ప్రవేశిస్తారు.
ఇలాంటి ముప్పుల నుంచి మన డిజిటల్ గుర్తింపును కాపాడుకోవడానికి ఎల్లప్పుడూ అప్రమత్తత అవసరం. అపరిచిత వ్యక్తులు పంపే లింక్లను ఎట్టిపరిస్థితుల్లోనూ క్లిక్ చేయకూడదు. యాప్ ఆధారిత టూ-ఫ్యాక్టర్ అథెంటికేషన్ను ఆన్ చేసుకోవడం, ప్రతి అకౌంట్కు వేర్వేరు స్ట్రాంగ్ పాస్వర్డ్లను సెట్ చేసుకోవడం ద్వారా మన ప్రొఫైల్ను సురక్షితంగా ఉంచుకోవచ్చు.
Also Read: ఏసీలో పడుకుంటే తలనొప్పి వస్తోందా? నిపుణులు చెబుతున్న అసలు కారణాలివే!
Share
ఫ్లిప్కార్ట్ అదిరిపోయే ఆఫర్.. రూపాయి ఖర్చు లేకుండా 'నెట్ఫ్లిక్స్' ఉచితం!
టీచర్లు, ఆన్లైన్ ట్యూటర్ల పని సులువు చేసే టాప్-5 AI టూల్స్ ఇవే!
