Old Phone Security Camera: సిసిటివి అవసరం లేదు.. మీ పాత ఫోన్‌‌‌తో సెక్యూరిటీ కెమెరా తయారు.. చాలా ఈజీ

Convert Old Phone Security Camera| చాలా మంది కొత్త ఫోన్ కొనుగోలు చేశాక పాత ఫోన్‌లు ఇంట్లో ఎక్కడైనా డ్రాయర్‌లో నిరుపయోగంగా పడేస్తారు. చాలా మంది వాటిని పూర్తిగా మర్చిపోతారు. కానీ మీ పాత స్మార్ట్‌ఫోన్‌తో చాలా ఉపయోగాలు ఉన్నాయి. దాన్ని ఇంటి సెక్యూరిటీ కెమెరాగా మార్చుకోవచ్చు. ఇదంతా కేవలం కొన్ని నిమిషాల్లో సెటప్ అవుతుంది. ఆ తరువాత ఖరీదైన సిసిటివి సిస్టమ్ కొనాల్సిన అవసరమే ఉండదు.

సరైన యాప్ డౌన్‌లోడ్ చేయండి

సెక్యూరిటీ కెమెరాలాగా మార్చడానికి పాత ఫోన్‌లో మంచి యాప్ డౌన్‌లోడ్ చేయండి. దీనికోసం ఆల్ఫ్రెడ్ కెమెరా (Alfred Camera) ఉచితంగా బాగా పని చేస్తుంది. మెనీథింగ్ (Manything), ఐపి వెబ్‌క్యామ్ (IP Webcam), హోం సెక్యూరిటీ కెమెరా (Home Security Camera) లాంటి యాప్స్ కూడా ఉన్నాయి. ఈ యాప్స్ లైవ్ వీడియో స్ట్రీమింగ్, మోషన్ డిటెక్షన్, రికార్డింగ్ ఫీచర్స్ ఇస్తాయి. ఇందులో ఏదైనా ఒక యాప్ ఇన్‌స్టాల్ చేసి సెటప్ మొదలుపెట్టండి.

ఫోన్‌ని కెమెరా మోడ్‌లో సెట్ చేయండి

పాత ఫోన్‌లో యాప్ ఓపెన్ చేయండి. “Camera Mode” ఎంచుకోండి. ఇది ఫోన్‌ని రికార్డింగ్, లైవ్ మానిటరింగ్ కోసం సిద్ధం చేస్తుంది. ఫోన్ ఎప్పుడూ ఛార్జర్‌కి పెట్టి ఉంచండి. ఇలా చేస్తే బ్యాటరీ డ్రైన్ కాదు. కెమెరా సెట్టింగ్స్ సరిగ్గా అడ్జస్ట్ చేయండి. మంచి Wi-Fi కనెక్షన్ ఉండేలా చూసుకోండి.

ఫోన్‌ని సరైన ప్రదేశంలో పెట్టండి

సెక్యూరిటీ కోసం సరైన ప్లేస్ ముఖ్యం. మెయిన్ డోర్, విండోస్ స్పష్టంగా కనిపించే చోట పెట్టండి. ట్రైపాడ్ లేదా మొబైల్ స్టాండ్ ఉపయోగించండి. ఫోన్ స్టెడీగా ఉంటుంది. కెమెరా షేక్ కాకుండా ఉంటుంది.

లైవ్ వ్యూ, అలర్ట్స్ ఎలా వాడాలి?

కొత్త ఫోన్‌లో యాప్ ఇన్‌స్టాల్ చేసి లైవ్ ఫీడ్ చూడొచ్చు. ఎక్కడ ఉన్నా ఇంటిని మానిటర్ చేయొచ్చు. మోషన్ డిటెక్షన్ ఆన్ చేయండి.. ఏదైనా కదలిక ఉంటే వెంటనే నోటిఫికేషన్ వస్తుంది. మీరు బయట ఉన్నప్పుడు ఈ ఫోన్ సెక్యూరిటీ కెమెరా చాలా ఉపయోగకరం.

Also Read: ఇంటర్నెట్‌లో యాడ్స్‌తో విసిగిపోయారా? దీనికి కారణం అదే..

ఒకేసారి ఎక్కువ కెమెరాలు సెటప్ చేయొచ్చా?

అవును చేయవచ్చు. మీ వద్ద ఇంకా పాత ఫోన్‌లు ఉంటే వాటిని కూడా కెమెరాలుగా మార్చుకోండి. ఇంట్లో అన్ని ప్రదేశాలు సరిగా మానిటరింగ్ చేయడానికి వీలుగా ఉంటుంది. మల్టీ కెమెరా సెక్యూరిటీ సిస్టమ్ ఉచితంగా రెడీ అవుతుంది.

ఖరీదైన CCTV కొనకుండా పాత ఫోన్‌తోనే ఇంటిని సురక్షితం చేయొచ్చు. మంచి యాప్, స్ట్రాంగ్ Wi-Fi కనెక్షన్, సరైన ప్లేస్‌‌లో అమర్చడం.. ఈ జాగ్రత్తలు పాటిస్తే చాలు. మీ పాత ఫోన్ వెంటనే ఒక విలువైన సెక్యూరిటీ టూల్ అవుతుంది.