Old Phone – New Phone: కొత్త ఫోన్ అవసరం లేదు.. మీ స్మార్ట్‌ఫోన్ స్పీడ్ పెంచడానికి ఈ సెట్టింగ్స్ మార్చండి చాలు

Old Phone – New Phone: మన జీవితం మొత్తం ఫోన్ చుట్టూనే తిరుగుతోంది. ఉదయం నిద్ర లేచిన క్షణం నుంచి రాత్రి నిద్రపోయే వరకూ కాల్స్, మెసేజ్‌లు, సోషల్ మీడియా, వీడియోలు, ఆఫీస్ పని, బ్యాంకింగ్ అవసరాలు అన్నీ ఫోన్ ద్వారానే జరుగుతున్నాయి. కొత్తగా ఫోన్ కొనుగోలు చేసినప్పుడు అది చాలా స్పీడ్‌గా, స్మూత్‌గా పనిచేస్తుంది. స్క్రీన్ టచ్ చేసిన వెంటనే రెస్పాన్స్ వస్తుంది, యాప్‌లు వెంటనే ఓపెన్ అవుతాయి. కానీ కొన్ని నెలలు లేదా సంవత్సరాలు గడిచిన తరువాత అదే ఫోన్ నెమ్మదిగా మారుతుంది. యాప్‌లు ఓపెన్ అవ్వడానికి ఎక్కువ టైమ్ తీసుకోవడం, ఒక్కసారిగా హ్యాంగ్ అవ్వడం, బ్యాటరీ త్వరగా ఖాళీ అవడం లాంటి సమస్యలు మొదలవుతాయి. దీనికి కారణం ఫోన్ పాతదైపోవడం మాత్రమే కాదు, మనం ఫోన్‌ను ఎలా వాడుతున్నాము అన్నదీ కూడా ఒక కారణం అవుతుంది.

అనవసర ఫైల్‌లు యాప్‌లు తొలగించడం

కొన్ని రోజులు గడిచిన తరువాత మన ఫోన్‌లో అవసరం లేని ఫైల్‌లు మెల్లగా పేరుకుపోతాయి. ఒక్కోసారి మనకు తెలియకుండానే ఎన్నో యాప్‌లు ఇన్‌స్టాల్ అవుతాయి. అలాగే చూడని ఫోటోలు, అవసరం లేని వీడియోలు స్టోరేజ్‌ను నింపేస్తాయి. స్టోరేజ్ ఎక్కువగా నిండిపోయినప్పుడు ఫోన్ ఆటోమేటిక్‌గా స్లో అవుతుంది. ఫోన్‌కు ఆలోచించే స్థలం తగ్గినట్టుగా మారుతుంది. అందుకే నిజంగా అవసరమైన ఫైల్‌లు మాత్రమే ఉంచుకుని, వాడని యాప్‌లను డిలీట్ చేయడం చాలా అవసరం. ఇలా చేయడం వల్ల బ్యాక్‌గ్రౌండ్‌లో జరిగే పనులు తగ్గుతాయి, ఫోన్ స్పీడ్ కూడా క్రమంగా మెరుగుపడుతుంది.

హోమ్ స్క్రీన్ క్లీన్‌గా ఉంచడం

చాలామంది హోమ్ స్క్రీన్‌ను పూర్తిగా విడ్జెట్‌లతో నింపేస్తారు. టైమ్, న్యూస్, స్టెప్ కౌంట్, బ్యాటరీ స్టేటస్ లాంటి ఎన్నో విడ్జెట్‌లు ఒకేసారి పనిచేస్తూ ఉంటాయి. స్క్రీన్ ఆన్ చేసిన వెంటనే ఇవన్నీ డేటా లోడ్ అవ్వాలి అంటే ప్రాసెసర్‌పై ఎక్కువ భారం పడుతుంది. దీని వల్ల ఫోన్ స్పందన నెమ్మదిస్తుంది. అవసరం ఉన్న విడ్జెట్‌లు మాత్రమే ఉంచుకుని, మిగతావన్నీ తీసేస్తే ఫోన్ చాలా లైట్‌గా ఫీలవుతుంది. రోజూ వాడేటప్పుడు కూడా స్క్రీన్ రెస్పాన్స్ స్పీడ్‌గా ఉంటుంది.

Also Read: Best Foldable Phones 2025: ఫోల్డ్ ఫోన్ల ఫైట్ షురూ.. 200ఎంపి కెమెరాతో శామ్‌సంగ్.. భారీ బ్యాటరీతో వివో.. ఏఐ పవర్‌తో గూగుల్

డెవలపర్ ఆప్షన్స్ ద్వారా స్పీడ్ పెంపు

డెవలపర్ ఆప్షన్స్ అనేది చాలా మందికి తెలియని ఒక ఉపయోగకరమైన సెట్టింగ్. ఇందులో కొన్ని చిన్న మార్పులు చేస్తే ఫోన్ స్పీడ్ రాను రాను పెరుగుంది. బ్యాక్‌గ్రౌండ్ ప్రాసెస్ లిమిట్ తగ్గిస్తే ఒకేసారి బ్యాక్‌గ్రౌండ్‌లో నడిచే యాప్‌ల సంఖ్య తగ్గుతుంది. అలాగే యానిమేషన్ స్కేల్, యానిమేషన్ డ్యూరేషన్ తగ్గించినప్పుడు స్క్రీన్ మార్పులు వెంటనే జరుగుతున్నట్టు అనిపిస్తాయి. నిజానికి ఫోన్ స్పీడ్ అదే అయినా, మనకు ఫాస్ట్‌గా ఫీలవుతుంది. ఇవి చిన్న మార్పుల్లా కనిపించినా రోజువారీ ఫోన్ వాడకంలో మంచి తేడా తీసుకువస్తాయి.

ఆపరేటింగ్ సిస్టమ్ అప్డేట్స్ అవసరం

ఫోన్ ఆపరేటింగ్ సిస్టమ్‌ను చాలామంది పట్టించుకోరు. కానీ ఇది ఫోన్ పర్‌ఫార్మెన్స్‌కు చాలా కీలకం. కొత్త అప్డేట్స్‌లో బగ్స్ ఫిక్స్ అవుతాయి, సెక్యూరిటీ మెరుగుపడుతుంది. అలాగే బ్యాటరీ మేనేజ్‌మెంట్ కూడా కొంత బాగా పని చేస్తుంది. అప్డేట్స్‌ను నిర్లక్ష్యం చేస్తే ఫోన్ స్లో అవ్వడం, యాప్‌లు సరిగ్గా పని చేయకపోవడం లాంటి సమస్యలు ఎక్కువ అవుతాయి. అందుకే అవకాశం వచ్చినప్పుడల్లా ఆపరేటింగ్ సిస్టమ్‌ను అప్డేటెడ్‌గా ఉంచడం మంచిది.

చివరిగా.. ఫ్యాక్టరీ రీసెట్.. అంటే ఏమిటి?

ఇన్ని ప్రయత్నాలు చేసినా ఫోన్ ఇంకా చాలా స్లోగా ఉంటే చివరి పరిష్కారంగా ఫ్యాక్టరీ రీసెట్ ఉపయోగపడుతుంది. ఫ్యాక్టరీ రీసెట్ చేసినప్పుడు ఫోన్ పూర్తిగా కొత్త స్థితికి వెళ్లిపోతుంది. మొదటిసారి కొనుగోలు చేసినప్పుడు ఎలా ఉంటుందో, దానికి దగ్గరగా మారుతుంది. అయితే ఇది చేయడానికి ముందు తప్పనిసరిగా ఫోటోలు, కాంటాక్ట్స్, అవసరమైన డేటా బ్యాకప్ తీసుకోవాలి. ఈ సింపుల్ చిట్కాలు పాటిస్తే పాత ఫోన్ అయినా కొంతవరకు ఫాస్ట్‌గా, స్మూత్‌గా ఉపయోగించుకోవచ్చు.