ఇక వాట్సప్ చాట్ నుంచే డైరెక్ట్‌గా రీల్స్ షేరింగ్.. కొత్త ఫీచర్ వచ్చేస్తోంది మామా!

WhatsApp Reels Shortcut: వాట్సప్‌లో చాటింగ్ చేసే వారికి ఉపయోగపడే కొత్త ఫీచర్ అందుబాటులోకి వస్తోంది. ఇన్‌స్టాగ్రామ్‌లో నచ్చిన రీల్స్‌ను వాట్సప్ చాట్‌లో షేర్ చేయడానికి ప్రత్యేకమైన షార్ట్‌కట్‌ను తీసుకొస్తోంది. దీనివల్ల వీడియోలను షేర్ చేయడం మరింత సులభం కానుంది. ప్రస్తుతం ఈ ఫీచర్‌ను కొంతమంది ఆండ్రాయిడ్ బీటా యూజర్లకు అందిస్తోంది. త్వరలో ఇతర యూజర్లకు కూడా అందుబాటులోకి వచ్చే అవకాశం ఉంది.

చాట్‌లోనే రీల్స్ బటన్:

వాట్సప్ కొత్త అప్‌డేట్‌లో చాట్ అటాచ్‌మెంట్ మెనూలో ప్రత్యేకంగా రీల్స్ బటన్ కనిపించనుంది. సాధారణంగా ఇన్‌స్టాగ్రామ్ రీల్స్‌ను వాట్సప్‌లో షేర్ చేయాలంటే ముందుగా మీడియా పికర్‌లోకి వెళ్లి వెతకాల్సి ఉంటుంది. కొత్త ఫీచర్‌తో ఆ పని చేయాల్సిన అవసరం తగ్గుతుంది. చాట్‌లోని అటాచ్‌మెంట్ మెనూలో ఉన్న రీల్స్ బటన్‌ను నొక్కితే చాలు. అక్కడి నుంచి నచ్చిన వీడియోను ఎంచుకుని నేరుగా వాట్సప్ చాట్‌లో షేర్ చేయవచ్చు.

Also Read: కొత్త ఫోన్ కొనేముందు ఈ విషయాలు తెలుసుకోండి.. ఎన్నేళ్ల వరకు విడిభాగాలు దొరుకుతాయంటే?

నచ్చిన వీడియోలను ఎంచుకోవచ్చు:

ఈ షార్ట్‌కట్ ద్వారా యూజర్లు ఇన్‌స్టాగ్రామ్‌లో ఇటీవల చూసిన వీడియోలు, సేవ్ చేసిన రీల్స్, లైక్ చేసిన వీడియోలను చూడవచ్చు. వీటిలో తమకు నచ్చిన రీల్‌ను ఎంచుకుని స్నేహితులకు లేదా గ్రూపుల్లో షేర్ చేయవచ్చు. దీంతో ఇన్‌స్టాగ్రామ్‌లో చూసిన వీడియోను మళ్లీ వెతికి పట్టుకోవాల్సిన పని ఉండదు. ముఖ్యంగా రోజూ ఎక్కువగా రీల్స్ చూసేవారికి ఈ ఫీచర్ ఉపయోగపడుతుంది.

అకౌంట్లను లింక్ చేయాలి:

ఈ ఫీచర్ ఉపయోగించాలంటే వాట్సప్ అకౌంట్‌ను మెటా అకౌంట్స్ సెంటర్‌కు లింక్ చేయాలి. ఇన్‌స్టాగ్రామ్, ఫేస్‌బుక్ వంటి యాప్‌లతో వాట్సప్‌ను లింక్ చేయకూడదనుకునే వారు యథావిధిగా వాట్సప్‌ను ఉపయోగించవచ్చు. అయితే వారికి చాట్ అటాచ్‌మెంట్ మెనూలో కొత్త రీల్స్ బటన్ కనిపించదు. ఇప్పటికే వాట్సప్‌లో మీడియా పికర్ ద్వారా ఇన్‌స్టాగ్రామ్ పోస్టులు, స్టోరీలు, రీల్స్ షేర్ చేసే అవకాశం ఉంది. కొత్త షార్ట్‌కట్ ఆ ప్రక్రియను మరింత సులభం చేస్తుంది.

అందరికీ ఎప్పుడు వస్తుంది?

WABetaInfo సమాచారం ప్రకారం.. వాట్సప్ ఆండ్రాయిడ్ బీటా వెర్షన్ 2.26.42.9లో ఈ ఫీచర్ కనిపించింది. గూగుల్ ప్లే స్టోర్ ద్వారా ఈ బీటా వెర్షన్‌ను ఉపయోగిస్తున్న కొంతమందికి మాత్రమే ప్రస్తుతం అందుతోంది. అప్‌డేట్ ఇన్‌స్టాల్ చేసిన ప్రతి ఒక్కరికీ వెంటనే ఈ బటన్ కనిపించకపోవచ్చు. ఈ ఫీచర్‌ను అందరికీ ఎప్పుడు విడుదల చేస్తారనే విషయంపై వాట్సప్ ఇంకా అధికారిక ప్రకటన చేయలేదు. అప్పటివరకు యూజర్లు ప్రస్తుత పద్ధతిలోనే రీల్స్‌ను షేర్ చేసుకోవచ్చు.

Also Read: వాట్సప్, టెలిగ్రామ్ యూజర్లకు బిగ్ అలర్ట్.. జనవరి 1 నుంచి ఆ రూల్స్ నిజమేనా? కేంద్రం క్లారిటీ!