Mobile Charging Hacks: రోజంతా గంటల కొద్ది స్మార్ట్ఫోన్ వాడాలంటే.. దానికి ఇంటర్నెట్ ఎంత ముఖ్యమో, ఛార్జింగ్ పెట్టే కేబుల్ అంత కంటే ఎక్కువ ఇంపార్టెంట్. కానీ ఎంత ఖరీదైన ఒరిజినల్ కేబుల్ కొన్నా.. కొద్ది రోజులకే అది పిన్ దగ్గర నలిగిపోవడమో లేదా విరిగిపోవడమో జరుగుతుంటుంది. అప్పుడు మనం కంపెనీ వాళ్లను తిట్టుకుంటాం. కానీ నిజానికి తప్పు మనదే అని మీలో ఎంత మందికి తెలుసు? కేబుల్స్ ఎందుకు అంత త్వరగా పాడవుతాయో, దాని వెనుకున్న అసలు సంగతేంటో ఇప్పుడు చూద్దాం.
కేబుల్ను చుట్టేటప్పుడు లేదా ఫోన్ వాడుతూ ఛార్జింగ్ పెట్టేటప్పుడు అది విపరీతంగా బెండ్ అవుతుంది. ఇలా వంచిన ప్రతిసారీ కేబుల్ లోపల ఉండే సన్నని వైర్లు తీవ్రమైన ఒత్తిడికి లోనవుతాయి. దీనిని సైన్స్ భాషలో ప్లాస్టిక్ డిఫార్మేషన్ అంటారు. అంటే.. వైరు ఒకసారి గట్టిగా వంగితే అది మళ్లీ తన పాత స్థితికి రాలేనంతగా దెబ్బతింటుంది. బయటకు వైరు బాగున్నట్టు కనిపిస్తుంది కానీ, లోపల మాత్రం అది మెల్లమెల్లగా నలిగిపోతూనే ఉంటుంది.
కేబుల్ అంతా బాగున్నా.. సరిగ్గా ఆ చివరన పిన్ దగ్గరే ఎందుకు విరుగుతుందో ఎప్పుడైనా ఆలోచించారా? మనం ఫోన్ వాడుతున్నప్పుడు కేబుల్ను ఆ చివరనే ఎక్కువగా వంచుతాం. దీన్నే ర్యాచెటింగ్ ఎఫెక్ట్ అంటారు. దీంతో పదే పదే ఒకే చోట ఒత్తిడి పడటం వల్ల లోపల ఉండే వైర్లు తమ బలాన్ని కోల్పోతాయి. దీనివల్ల కేబుల్ మన్నిక దాదాపు 30 శాతం తగ్గిపోతుందని నిపుణులు చెబుతున్నారు.
Also Read: ఇంట్లోనే థియేటర్ వైబ్స్ ఇచ్చే టాప్-5 JBL Soundbars.. మూవీ నైట్ ఇక నెక్ట్స్ లెవల్!
కేబుల్ పాడవడానికి కేవలం వంచడం మాత్రమే కారణం కాదు.. దాని గుండా ప్రవహించే కరెంట్ కూడా మరో కారణమే. కేబుల్ వంగి ఉన్నప్పుడు విద్యుత్ ప్రవాహం వల్ల కొంత వేడి పుడుతుంది. ఆ వేడి వల్ల లోపల ఉండే మెటీరియల్ ఇంకా త్వరగా బలహీనపడుతుంది. ముఖ్యంగా ఫోన్ను వేలాడదీసి ఛార్జింగ్ పెట్టడం లేదా వైరును గట్టిగా లాగి పట్టుకోవడం వల్ల ఈ నష్టం చాలా వేగంగా జరుగుతుంది.
కేబుల్ను ఎంత టైట్గా వంచితే అది అంత త్వరగా పాడవుతుంది. వంపు తిరిగే చోట వైశాల్యం తక్కువగా ఉంటే.. ఆ పాయింట్ దగ్గర ప్రెజర్ పెరిగి వైర్లు లోపల తెగిపోతాయి. అందుకే కేబుల్ను ఎప్పుడూ గుండ్రంగా, వదులుగా చుట్టాలి. పిన్ దగ్గర వైరు నేరుగా ఉండేలా చూసుకుంటే.. అది చాలాకాలం మన్నిక వస్తుంది.
కేబుల్స్ ఎక్కువ కాలం రావాలంటే క్వాలిటీతో పాటు దానిని వాడే పద్ధతి కూడా మారాలి. ఛార్జింగ్లో ఉన్నప్పుడు ఫోన్ పట్టుకుని కేబుల్ మీద ఒత్తిడి పడకుండా చూసుకోవాలి. అవసరమైతే కేబుల్ చివరన ప్రొటెక్టివ్ స్లీవ్స్ లేదా స్ప్రింగ్స్ లాంటివి వాడటం మంచిది. దీనివల్ల వంపు ఒకే చోట పడకుండా సమానంగా సర్దుకుంటుంది. ఈ చిన్న జాగ్రత్తలు పాటిస్తే చాలు.. మాటిమాటికీ కొత్త కేబుల్ కోసం షాపులకు పరుగులు పెట్టక్కర్లేదు.
Share
భారీ వర్షం, గంటలోపే గ్రౌండ్ సిద్ధం..బంగ్లాదేశ్ను చూసి నేర్చుకో అంటూ బీసీసీఐపై ట్రోలింగ్
కేంద్రం కీలక నిర్ణయం.. తమిళనాడు సీఎం విజయ్కి Z+ భద్రత
