Kanthalloor: కేరళలో ఉన్న కాశ్మీరం ఇది, ఈ గ్రామానికి వెళితే తిరిగి రావాలనిపించదు

కేరళలోని ఇడుక్కి జిల్లాలో కొండల నడుమ అందమైన గ్రామం కాంతాల్లూరు. ఇది పర్యాటకులకు కొత్త ఆకర్షణగా మారింది. ఇక్కడి చల్లటి వాతావరణం, పచ్చని కొండచరియలు, మబ్బులతో నిండిన పర్వతాలు… ఇవి అన్నీ కలసి ఈ గ్రామానికి ‘కేరళ కాశ్మీర్’ అనే పేరును తెచ్చాయి. సాధారణంగా కేరళ గురించి ఆలోచిస్తే బీచ్‌లు, బ్యాక్‌వాటర్స్ గుర్తుకువస్తాయి. కానీ కాంతాల్లూరు పూర్తిగా భిన్నం. ఇది 5,000 అడుగుల ఎత్తులో ఉండటం వల్ల ఏడాదంతా చల్లదనాన్ని ఆస్వాదించవచ్చు. ముఖ్యంగా శీతాకాలంలో ఇక్కడి ప్రకృతి మరింత అందంగా కనిపిస్తుంది. ఈ అందాలు, ఇక్కడి ప్రశాంతతను అనుభవించేందుకు రాష్ట్రం నలుమూలల నుంచి, అలాగే తమిళనాడు, కర్ణాటక రాష్ట్రాల నుంచి కూడా పర్యాటకులు తరలివస్తున్నారు.

చుట్టూ పండ్లతోటలే
కాంతాల్లూరులో ఆపిల్, ప్లమ్, పీచ్, స్ట్రాబెర్రీ వంటి చల్లటి ప్రాంతాల్లో మాత్రమే పండే పళ్ళను సాగు చేస్తారు. ఈ పండ్ల తోటలు ఈ ఊరికి నిజమైన ఆకర్షణ. ఉదయం పొగమంచులో మెరిసే ఆపిల్ తోటలు, పక్కనే స్ట్రాబెర్రీ తోటలు, చిన్న చిన్న కూరగాయల పొలాలు.. ఈ దృశ్యాలు పర్యాటకులకు అద్భుత అనుభవం ఇస్తాయి. పండ్ల సీజన్‌లో పర్యాటకులకు తోటల్లోనే పండ్లు కోసుకునే అవకాశం కూడా ఉంటుంది. గ్రామ ప్రజలు వ్యవసాయం ప్రధానంగా ఆధారపడటం వల్ల వారి జీవనశైలి కూడా చాలా సరళంగా ఉంటుంది. ఈ గ్రామీణ వాతావరణం, ప్రకృతితో కలసి జీవించే సౌందర్యం కన్థల్లూరును మరింత ప్రత్యేకంగా నిలబెడుతోంది.

మున్నార్ కు దగ్గర్లోనే
మున్నార్‌కు సమీపంలో ఉన్న కన్థల్లూరు ప్రశాంతతను కోరుకునే వారికి సరైన గమ్యం. పెద్దగా వాణిజ్య రద్దీ లేదు, పెద్ద రిసార్ట్‌లు లేవు. బదులుగా చిన్న హోమ్‌స్టేలు, పల్లెటూరు మంటలపొయ్యిల రుచితో కూడిన భోజనం, పర్వతాల మధ్య నిశ్శబ్దం మాత్రమే కనిపిస్తాయి. పర్యాటకులు ఇక్కడ ఉదయపు ట్రెక్కింగ్‌లు, అటవీ ప్రాంతాల లోపలి చిన్న జలపాతాలు, అడవి దారులు, వీక్షణ స్థలాలు పర్యటించవచ్చు. పచ్చిక మైదానాలు, మబ్బులతో కప్పబడిన కొండ శిఖరాలు, రాత్రిళ్లు ఆకాశమంతా నక్షత్రాల వెలుగు… ఇవన్నీ కాంతాల్లూరు ప్రత్యేకతలు. కుటుంబ ప్రయాణాలకు, జంటలకు, ఫోటోగ్రఫీ ప్రేమికులకు అనువైన ప్రదేశంగా ఈ గ్రామాన్ని చెప్పుకోవచ్చు. గ్రామ ప్రజలు పర్యాటకులకు ఇచ్చే ఆతిథ్యం కూడా ఇక్కడి చాలా అందంగా ఉంటుంది.

ఎలా వెళ్లాలి?
కాంతాల్లూరుకు చేరుకోవడం కూడా సులభం. సమీప విమానాశ్రయం కొచ్చి కాగా, అక్కడి నుంచి రోడ్డు మార్గంలో మూడు నుంచి నాలుగు గంటల్లో చేరుకోవచ్చు. మున్నార్ నుంచి కేవలం 50 కిలోమీటర్ల దూరంలో ఉండటం వల్ల చాలా మంది మున్నార్ ట్రిప్‌లో భాగంగా కాంతాల్లూరును కూడా సందర్శిస్తున్నారు. సెప్టెంబర్ నుంచి మార్చి వరకు సమయం ఇక్కడ పర్యటనకు అనువైనది. చల్లటి వాతావరణం ప్రేమించే వారికి శీతాకాలం ప్రత్యేక అనుభూతిని ఇస్తుంది. గ్రామం పూర్తిగా వాణిజ్యకేంద్రంగా మారకపోవడం వల్ల ధరలు కూడా సాధారణంగానే ఉంటాయి. అయితే చలికి సరిపడ దుస్తులు తీసుకెళ్లడం, రాత్రిళ్లు ఉష్ణోగ్రతలు తగ్గే అవకాశం ఉండటంతో జాగ్రత్తలు తీసుకోవడం మంచిది. ప్రకృతి ప్రేమికులకు, ప్రశాంతత కోరేవారికి, పల్లెటూరు అందాలను అనుభవించాలనుకునేవారికి కాంతాల్లూరు సరైన ప్రదేశం.

Share

• 
• 
• 
• 
• 
•