వైసీపీకి బిగ్ షాక్.. నామినేషన్ల గడువు పెంపు పిటిషన్‌ను కొట్టివేసిన హైకోర్టు!

AP High Court: ఆంధ్రప్రదేశ్ మున్సిపల్ ఎన్నికల వేళ ప్రతిపక్ష వైఎస్సార్ కాంగ్రెస్ పార్టీకి (YSRCP) ఉన్నత న్యాయస్థానంలో తీవ్ర విఘాతం ఎదురైంది. పలు ప్రాంతాల్లో తీవ్ర ప్రతికూల పరిస్థితుల వల్ల తమ పార్టీ అభ్యర్థులు నామినేషన్లు వేయలేకపోయారని, అందుకు మరికొంత సమయం ఇవ్వాలని కోరుతూ వైసీపీ వేసిన హౌస్‌మోషన్ పిటిషన్‌ను ఏపీ హైకోర్టు కొట్టివేసింది.

ఎన్నికల ప్రక్రియలో జోక్యం చేసుకోలేం

వైసీపీ వేసిన అత్యవసర పిటిషన్‌పై విచారణ చేపట్టిన హైకోర్టు ధర్మాసనం కీలక వ్యాఖ్యలు చేసింది. ఒకసారి ఎన్నికల నోటిఫికేషన్ విడుదలయ్యాక, ప్రక్రియ కొనసాగుతుండగా తాము జోక్యం చేసుకోలేమని తేల్చిచెప్పింది. రాజ్యాంగబద్ధంగా ఎన్నికల నిర్వహణ బాధ్యత రాష్ట్ర ఎన్నికల కమిషన్‌ పరిధిలో ఉంటుందని స్పష్టం చేస్తూ.. నామినేషన్ల గడువు పెంచాలన్న అభ్యర్థనను తోసిపుచ్చింది.

మధ్యాహ్నానికే ముగిసిన గడువు

కాగా, మున్సిపల్ ఎన్నికల నామినేషన్ల స్వీకరణ గడువు ఆదివారం మధ్యాహ్నం 3 గంటలకే అధికారికంగా ముగిసింది. నిర్ణీత సమయం ముగియడంతో రిటర్నింగ్ అధికారులు నామినేషన్ ప్రక్రియను పూర్తి చేశారు.

వైసీపీ నేతల ఆరోపణలు

రాష్ట్రంలోని కొన్ని నియోజకవర్గాల్లో కూటమి నేతలు, అధికార యంత్రాంగం అడ్డంకులు సృష్టించడం వల్లే తమ అభ్యర్థులు నామపత్రాలు సమర్పించలేకపోయారని వైసీపీ నేతలు ఆరోపిస్తున్నారు. అభ్యర్థులకు తగిన భద్రత కల్పించి, గడువు పొడిగించాలని కోరినప్పటికీ న్యాయస్థానం నుంచి ఉపశమనం లభించకపోవడంతో ఆ పార్టీకి ఇప్పుడు గట్టి ఎదురుదెబ్బ తగిలినట్లయింది.

Also Read: సీబీఐ, ఈడీ అధికారులమంటూ మోసం.. రిటైర్డ్ ఉద్యోగికి రూ.29 లక్షల టోకరా!