Pawan Kalyan: సినిమాలు, రాజకీయాలు మాత్రమే కాదు.. మార్షల్ ఆర్ట్స్ (యుద్ధకళలు) పట్ల తనకున్న అమితమైన అభిరుచిని ఆంధ్రప్రదేశ్ ఉప ముఖ్యమంత్రి, పవర్ స్టార్ పవన్ కళ్యాణ్ మరోసారి ప్రపంచానికి చాటి చెప్పారు. మూడు దశాబ్దాలకు పైగా ఆయన సాగించిన అకుంఠిత దీక్షకు ప్రతిఫలంగా, ప్రాచీన జపనీస్ కత్తిసాము కళ అయిన ‘కెంజుట్సు’ (Kenjutsu) లో పవన్ కళ్యాణ్ అధికారికంగా ప్రవేశం పొందారు. ఇది ఒక తెలుగు వ్యక్తికి, అంతర్జాతీయ స్థాయిలో లభించిన అత్యంత అరుదైన గౌరవంగా నిలిచింది.
పవన్ కళ్యాణ్ కేవలం నటుడిగానో, రాజకీయ నాయకుడిగానో కాకుండా ఒక నిబద్ధత గల మార్షల్ ఆర్టిస్టుగా ఈ స్థాయిని చేరుకున్నారు. జపాన్ వెలుపల, ప్రతిష్ఠాత్మకమైన ‘సోకే మురమత్సు సెన్సై’లోని ‘టకెడా షింగెన్ క్లాన్’ (Takeda Shingen Clan) లో ప్రవేశం పొందిన తొలి తెలుగు వ్యక్తిగా ఆయన చరిత్ర సృష్టించారు. జపాన్ సంప్రదాయ సమురాయ్ యుద్ధకళల్లో అత్యంత గౌరవనీయమైన సంస్థ ‘సోగో బుడో కన్రి కై’ నుండి పవన్కు ‘ఫిఫ్త్ డాన్’ (5th Dan) పురస్కారం లభించడం ఆయన ప్రతిభకు నిదర్శనం.
పవన్ కళ్యాణ్ మార్షల్ ఆర్ట్స్ ప్రయాణం సినిమాల్లోకి రాకముందే ప్రారంభమైంది. చెన్నైలో ఉన్న కాలంలోనే కరాటే వంటి విద్యల్లో కఠిన శిక్షణ పొందారు. ఆయన తన సినిమాలైన తమ్ముడు, ఖుషి, అన్నవరం నుండి రాబోయే ఓజీ (OG) వరకు మార్షల్ ఆర్ట్స్ ప్రాముఖ్యతను తెరపై అద్భుతంగా ప్రదర్శించారు. శారీరక దృఢత్వానికే పరిమితం కాకుండా, జపనీస్ మార్షల్ ఆర్ట్స్లోని తత్వశాస్త్రాన్ని, క్రమశిక్షణను ఆయన తన జీవితంలో భాగం చేసుకున్నారు.
భారతదేశంలోని ప్రముఖ బుడో నిపుణుడు హాన్షి ప్రొఫెసర్ డాక్టర్ సిద్ధిక్ మహ్మూదీ వద్ద పవన్ కళ్యాణ్ ‘కెండో’లో అత్యున్నత స్థాయి శిక్షణ పొందారు. ఆయన శిక్షణలో పవన్ సాంకేతిక నైపుణ్యంతో పాటు లోతైన తాత్విక అవగాహనను సంపాదించారు. ఈ అంకితభావాన్ని గుర్తించి, గోల్డెన్ డ్రాగన్స్ సంస్థ ఆయనకు “టైగర్ ఆఫ్ మార్షల్ ఆర్ట్స్” అనే విశిష్ట బిరుదును ప్రదానం చేసింది.
సినిమా, యుద్ధకళలు, తత్వశాస్త్రం.. ఈ మూడింటిని అంతర్జాతీయ స్థాయిలో సమన్వయం చేసిన అతికొద్ది మంది భారతీయుల్లో పవన్ కళ్యాణ్ ఒకరిగా నిలిచారు. కెంజుట్సులో ఆయన ప్రవేశం కేవలం ఒక బిరుదు మాత్రమే కాదు, క్రమశిక్షణ మరియు వినయంతో కూడిన ఒక నిరంతర అభ్యాస ప్రక్రియకు దక్కిన గౌరవం. ఇది ప్రపంచవ్యాప్తంగా ఉన్న ఆయన అభిమానులకు మరియు మార్షల్ ఆర్ట్స్ సాధకులకు గొప్ప స్ఫూర్తినిస్తోంది.
Read Also: వచ్చే నెలలో డీఎస్సీ నోటిఫికేషన్?.. భారీగానే ఉపాధ్యాయ ఖాళీలు
Share
Visakhapatnam News: మహిళల రక్షణే మా ప్రాధాన్యత.. విశాఖ పోలీసుల పనితీరుపై సీఎం చంద్రబాబు ప్రశంసలు
Bus in Wall: బిల్డింగ్పై వేలాడుతోన్న బస్సు.. కంగారు పడొద్దు, ఆ డిజైనే అంత!
