New GIVI X36 Modular Helmet: బైక్‌ మీద వెళ్లేవారికి హెల్మెట్ భద్రతతో పాటు సౌకర్యం కూడా చాలా ముఖ్యం. రైడింగ్ సమయంలో అవసరాన్ని బట్టి హెల్మెట్ ను మార్చుకునే అవకాశం ఉంటే బాగుంటుంది. ఈ ఆలోచనతోనే GIVI తన కొత్త X36 మాడ్యులర్ హెల్మెట్ ను తీసుకొచ్చింది. ఈ ఫ్లాగ్‌షిప్ హెల్మెట్ లో 180 డిగ్రీలు తిరిగే చిన్ గార్డ్ ఆకట్టుకుంటుంది.
సాధారణ ఫ్లిప్ అప్ హెల్మెట్లలో చిన్ గార్డ్ పైకి లేచి నుదుటి దగ్గర ఆగిపోతుంది. అయితే GIVI X36లో పరిస్థితి భిన్నంగా ఉంటుంది. దీని చిన్ గార్డ్ ను పూర్తిగా 180 డిగ్రీలు వెనక్కి తిప్పి హెల్మెట్ వెనుక భాగంలోకి తీసుకెళ్లవచ్చు. దీంతో హెల్మెట్ ఓపెన్ చేసినప్పుడు ముందు భాగంలో బరువు ఉండదు. రైడర్ కు బ్యాలెన్స్ మెరుగ్గా అనిపించడంతో పాటు జెట్ హెల్మెట్ తరహాలో ఎక్కువ గాలి తగిలే అవకాశం ఉంటుంది.
X36కు ECE 22.06 P/J ఆమోదం ఉంది. అంటే, చిన్ గార్డ్ మూసి ఉన్నప్పుడు ఫుల్ ఫేస్ హెల్మెట్ గా, వెనక్కి తిప్పినప్పుడు ఓపెన్ కాన్ఫిగరేషన్‌ లో ఉపయోగించేందుకు గ్రీన్ సిగ్నల్ ఇవ్వబడింది. ఈ ఫీచర్ ముఖ్యంగా టూరింగ్ రైడర్లకు ఉపయోగపడొచ్చు. హైవేపై ఎక్కువ వేగంతో ప్రయాణించేటప్పుడు చిన్ గార్డ్ ను మూసి ఫుల్ ఫేస్ మోడ్ లో ఉండవచ్చు. సిటీలో తక్కువ వేగంతో వెళ్తున్నప్పుడు దాన్ని వెనక్కి తిప్పుకుని ఓపెన్ మోడ్‌లో రైడ్ చేయవచ్చు.
GIVI X36ను మూడు రకాల షెల్ మెటీరియల్స్‌తో అందిస్తోంది. ఇందులో కార్బన్, ఫైబర్‌గ్లాస్, టెక్నోపాలిమర్ ఆప్షన్లు ఉన్నాయి. కార్బన్ వెర్షన్ తక్కువ బరువుతో పాటు ప్రీమియం ఆప్షన్‌గా ఉంటుంది. ఫైబర్‌గ్లాస్ మధ్యస్థ ఎంపికగా ఉండగా.. టెక్నోపాలిమర్ వెర్షన్ మరింత మంది రైడర్లకు అందుబాటులో ఉండేలా రూపొందించారు. GIVI ప్రకారం X36 కార్బన్ బరువు 1,590 గ్రాములు. మాడ్యులర్ హెల్మెట్‌లో చిన్ మెకానిజం, లాకింగ్ సిస్టమ్, సన్ వైజర్ వంటి అదనపు భాగాలు ఉన్నప్పటికీ ఈ బరువు తక్కువగానే ఉంటుంది.
X36లో ఇంటర్నల్ సన్ వైజర్, పిన్‌లాక్ లెన్స్, వెంటిలేషన్ వ్యవస్థ, మైక్రోమెట్రిక్ స్ట్రాప్ లాంటి ఫీచర్లు ఉన్నాయి. విండ్ డిఫ్లెక్టర్, తొలగించేలా ఉన్న లైనింగ్‌ ను కూడా అందించారు. కార్బన్ వెర్షన్‌తో క్లియర్ వైజర్, పిన్‌లాక్ లెన్స్ తో పాటు డార్క్ ఔటర్ వైజర్ కూడా లభిస్తుంది.
రైడర్లకు నచ్చిన విధంగా ఉండేలా X36ను పలు రంగులు, గ్రాఫిక్స్ లో అందిస్తున్నారు. మొత్తం 19 కలర్, గ్రాఫిక్ కాంబినేషన్లు ఉన్నాయి. సైజులు XS నుంచి XXL వరకు అందుబాటులో ఉంటాయి. ఫైబర్‌ గ్లాస్ వెర్షన్ లో మ్యాట్ బ్లాక్, మ్యాట్ టైటానియం, మెటాలిక్ బ్లూ, మెటాలిక్ బర్గుండి, వైట్ లాంటి రంగులు ఉన్నాయి. గ్రాఫిక్స్ కావాలనుకునేవారికి ప్రత్యేక డిజైన్లు కూడా ఉన్నాయి.
X36ను కూడా భారత మార్కెట్లో అందుబాటులోకి తీసుకురావడానికి కంపెనీ ప్రయత్నిస్తోంది. అయితే భారత్‌లో ధర, అమ్మకం తేదీపై పూర్తి వివరాలు ఇంకా వెల్లడించలేదు.
Read Also: చేతులతో పనిలేకుండానే డిక్కీ ఓపెన్.. ఈ EV బైక్‌లో అదిరిపోయే ఫీచర్!
Share
15 కేజీ బంగారంతో చిక్కిన మహిళ, మాఫియాతో లింకులు.. సరిహద్దులో పసిడి పంట
నేలపై కూర్చొని భోజనం చేయడం మంచిదేనా? వాస్తు ప్రకారం ప్రభావం ఇదే
