చేతులతో పనిలేకుండానే డిక్కీ ఓపెన్.. ఏథర్ కోనార్క్‌ లో అదిరిపోయే ఫీచర్!

Ather Konark AutoPop Feature: ఎలక్ట్రిక్ స్కూటర్లలో కొత్త కొత్త ఫీచర్లను పరిచయం చేస్తూ వస్తున్న ఏథర్ ఎనర్జీ.. తాజాగా కోనార్క్ స్కూటర్‌ తో మరో క్రేజీ టెక్నాలజీని తీసుకొచ్చింది. సాధారణంగా స్కూటర్ డిక్కీ ఓపెన్ చేయాలంటే చేతితో సీటును పైకి ఎత్తాల్సి ఉంటుంది. కానీ, కోనార్క్‌లో మాత్రం ఆ అవసరం లేకుండా డిక్కీని ఓపెన్ చేసే అవకాశం తీసుకొచ్చింది. ఇందుకోసం ఆటోపాప్ అనే ఫీచర్ ను పరిచయం చేసింది. చేతుల్లో బ్యాగులు, సామాన్లు ఉన్నప్పుడు ఈ ఫీచర్ ఎంతో ఉపయోగపడుతుంది.

అసలు ఆటోపాప్ ఎలా పని చేస్తుంది?

కోనార్క్‌ తో పాటు మ్యాజిక్ కీ అనే స్మార్ట్ కీ వస్తుంది. ఈ కీ జేబులో, బ్యాగులో ఉంటే స్కూటర్‌ ను ఈజీగా యాక్సెస్ చేయవచ్చు. స్కూటర్ దగ్గరకు వెళ్లిన తర్వాత వెనుక భాగంలో, టెయిల్ ల్యాంప్ పైన ఉన్న బటన్‌ ను మోకాలితో లేదంటే కాలితో నొక్కితే చాలు. సీటు ఆటోమేటిక్‌గా పైకి లేస్తుంది. దీంతో చేతుల్లో వస్తువులు ఉన్నా వాటిని కింద పెట్టాల్సిన అవసరం ఉండదు. డిక్కీ తెరవడానికి స్కూటర్‌ కు కీ పెట్టి తిప్పాల్సిన అవసరం కూడా లేదు.

కీతో కూడా రిమోట్‌ గా ఓపెన్

స్కూటర్ వెనుక ఉన్న బటన్‌ తో పాటు మ్యాజిక్ కీ ఫాబ్ ద్వారా కూడా డిక్కీని తెరిచే అవకాశం ఉంటుంది. ఫాబ్‌ మీద ఉన్న బటన్‌ ను నొక్కితే రిమోట్‌గా బూట్ ఓపెన్ అవుతుంది. సీటు పైకి లేవడానికి ఇందులో హైడ్రాలిక్ స్ట్రట్ ఏర్పాటు చేశారు. దీంతో బటన్ నొక్కిన తర్వాత సీటు పూర్తిగా పైకి లేస్తుంది. సీటును చేత్తో పట్టుకుని పైకి లేపాల్సిన అవసరం ఉండదు. ప్రస్తుతానికి ఈ బూట్ ఓపెనింగ్ టెక్నాలజీ కోనార్క్ Z లైన్ వేరియంట్లలో ప్రత్యేకంగా అందుబాటులో ఉంది.

సూపర్ స్మార్ట్ ఫీచర్లు

ఈ స్కూటర్‌ లో 7 ఇంచుల డీప్‌ వ్యూ డిస్‌ప్లే, ఆటోహోల్డ్, ఫాల్‌సేఫ్ లాంటి ఫీచర్లు ఉన్నాయి. స్కూటర్‌ను ఈజీగా ఉపయోగించుకునేందుకు ఎయిర్‌ వాక్ లాంటి ఫీచర్‌ను కూడా అందించారు.

ధర జస్ట్ రూ.99,999 నుంచే ప్రారంభం

ఏథర్ కోనార్క్ ప్రారంభ ధర రూ.99,999గా కంపెనీ నిర్ణయించింది. ఈ స్కూటర్‌ను S 100, S 125, S 161 అనే వేరియంట్లలో అందిస్తున్నారు. భవిష్యత్తులో టాప్ ఎండ్ Z లైన్ వేరియంట్లు కూడా అందుబాటులోకి రానున్నాయి. వేరియంట్‌ను బట్టి ఈ స్కూటర్ రేంజ్ 100 కిలోమీటర్ల నుంచి 161 కిలోమీటర్ల వరకు ఉంటుంది. మరింత ఎక్కువ రేంజ్ ఇచ్చే 200 కిలోమీటర్ల మోడల్‌ను కూడా భవిష్యత్తులో తీసుకురావాలని కంపెనీ చూస్తోంది.

కుటుంబ అవసరాలకు అనుకూలంగా..

కోనార్క్‌ ను ప్రధానంగా కుటుంబ వినియోగదారులను దృష్టిలో పెట్టుకుని రూపొందించారు. మెటల్ బాడీ, 14 ఇంచుల ఫ్రంట్ వీల్‌తో పాటు 31 లీటర్ల అండర్-సీట్ స్టోరేజ్ ఇందులో ఉంది. రోజువారీ అవసరాలకు కావాల్సిన సామాన్లు పెట్టుకోవడానికి ఈ స్టోరేజ్ ఉపయోగపడుతుంది.