Royal Enfield: చాలా కాలంగా రాయల్ ఎన్‌ఫీల్డ్‌ ను నడపడం లేదా? అయితే, కాస్త జాగ్రత్త!

Royal Enfield Storage Guide: మీ దగ్గర రాయల్ ఎన్‌ఫీల్డ్‌ బైక్ ఉందా? రకరకాల కారణాలతో దాన్ని నడపడం లేదా? వారాలుగా ఒకే చోట పార్క్ చేసి ఉంచారా? అయితే, కాస్త జాగ్రత్తగా ఉండాలంటున్నారు నిపుణులు. ఒకవేళ వారాల తరబడి బైక్ ను వాడకపోతే ఏం జరుగుతుందో ఇప్పుడు తెలుసుకునే ప్రయత్నం చేద్దాం..

⦿ బ్యాటరీ

అత్యంత సాధారణ సమస్య బ్యాటరీ డ్రెయిన్. బైక్ స్విచ్ ఆఫ్ చేయబడినప్పుడు కూడా, BS6 రాయల్ ఎన్‌ఫీల్డ్‌ బైకులు తక్కువ మొత్తంలో పవర్ ను తీసుకునే ఎలక్ట్రానిక్ భాగాలను కలిగి ఉంటాయి. అవి నెమ్మదిగా బ్యాటరీని బలహీనం చేస్తాయి. రెండు నుండి నాలుగు వారాలలోపు, ఇగ్నిషన్ సమయంలో బ్యాటరీ పని చేతుంది. అంతకంటే ఎక్కువ ఉంటే బ్యాటరీ పూర్తిగా డిశ్చార్జ్ అవుతుంది. ఒకవేళ బైక్ ను నడపకపోయినా, వారానికి ఓసారి కాసేపు స్టార్ట్ చేసి ఉంచితే బ్యాటరీ హెల్దీగా ఉంటుంది.

⦿ ఫ్యూయెల్

పెట్రోల్ కూడా బైక్ లో ఎక్కువ రోజులు ఉండదు. 30 రోజుల తర్వాత, ఫ్యూయెల్ అనేది నెమ్మది డ్రై అవుతుంది. జిగటగా ఉండే పదార్థాన్ని ఏర్పరుస్తుంది. వీటిని తరచుగా గమ్ లేదంటే వార్నిష్ అని పిలుస్తారు. పాత కార్బ్యురేటెడ్ మోడళ్లలో, ఇది జెట్‌ లను మూసుకుపోయేలా చేస్తుంది. తేమ ట్యాంక్‌లోకి ప్రవేశిస్తే, లోపల తుప్పు ఏర్పడుతుంది. ఫలింతంగా రిపేరుకు పెద్ద మొత్తంలో ఖర్చు అయ్యే అవకాశం ఉంది.

⦿ టైర్లు, బరువు

రాయల్ ఎన్‌ఫీల్డ్‌ బైకులు ఎక్కువ బరువును కలిగి ఉంటాయి. వారాలపాటు సైడ్ స్టాండ్‌లో నిలిపి ఉంచినప్పుడు, ఆ బరువు అంతా టైర్‌ మీద పడుతుంది. నెమ్మదిగా ఫ్లాట్ స్పాట్స్ ఏర్పడుతాయి. టైర్లు కూడా నెమ్మదిగా గాలిని కోల్పోతాయి. అలాగే ఉండిపోతే టైర్ వీక్ అవుతుంది. మళ్ళీ రైడ్ చేసే సమయానికి రబ్బరును బలహీనపడుతుంది. పగిలిపోయే అవకాశం ఉంటుంది.

⦿ ఆయిల్ సెటిల్లింగ్, డ్రై స్టార్ట్‌ లు

ఇంజిన్ లోపల, ఆయిల్ రక్షిత ఫిల్మ్ పాత్రను పోషిస్తుంది. బైక్ ఉపయోగించకుండా ఉన్నప్పుడు, ఆయిల్ నెమ్మదిగా ఎగువ ఇంజిన్ భాగాల నుంచి దిగువకు చేరుతుంది. ఇది అంతర్గత భాగాలను పొడిగా ఉంచుతుంది. బైక్‌ను ఆన్ చేసినప్పుడు ఆ భాగాలు సరైన లూబ్రికేషన్ లేకుండా డ్యామేజ్ అవుతాయి. పదేపదే డ్రై స్టార్ట్‌ లు పెరిగితే, ఇంజిన్ భాగాలు అరిగిపోతాయి.

⦿ తుప్పు

క్రోమ్ ఎగ్జాస్ట్‌ లు, నట్‌ లు, బోల్ట్‌ లు, చైన్ లాంటి భాగాలు కూడా దెబ్బతింటాయి. చైన్ తుప్పుపడుతుంది. తేమ పెరిగితే ఇంధన ట్యాంక్ కూడా లోపలి నుంచి తుప్పు పట్టవచ్చు. క్లచ్ ప్లేట్లు కలిసి అతుక్కుపోతాయి. రబ్బరు సీల్స్ ఎండిపోయి పటుత్వాన్ని కోల్పోతాయి. చిన్న సమస్యలు నెమ్మదిగా ఖరీదైన మరమ్మతులుగా మారతాయి.