తక్కువ ధరలో ఎక్కువ రేంజ్.. కళ్లు చెదిరే ఎంట్రీ-లెవల్ ఈవీలు రెడీ!

Affordable EVs with Higher Range: భారత్ లో ఎంట్రీ లెవల్ ఎలక్ట్రిక్ కార్ల మార్కెట్ వేగంగా మారుతోంది. ఇప్పటి వరకు చిన్న పరిమాణంలో, నగర ప్రయాణాలకు మాత్రమే సరిపోయే ఈవీలు ఎక్కువగా కనిపించాయి. ఎంజీ మోటార్ తీసుకొచ్చిన కామెట్ EV, టాటా మోటార్స్ పంచ్ EV లాంటి మోడల్స్ ఈ సెగ్మెంట్ కు బలమైన పునాది వేశాయి. అయితే, రాబోయే రోజుల్లో ఈ సెగ్మెంట్ మరింత విస్తరించే అవకాశం కనిపిస్తోంది.

చిన్న పరిమాణం.. ఎక్కువ రేంజ్

ప్రస్తుతం ఆటోమొబైల్ కంపెనీలు చిన్న పరిమాణంలోనే ఎక్కువ రేంజ్‌, మెరుగైన పనితీరు, ఆధునిక ఫీచర్లతో కూడిన కొత్త సబ్ కాంపాక్ట్ ఎలక్ట్రిక్ SUVలను తీసుకురావడానికి రెడీ అవుతున్నాయి. వీటిలో ముఖ్యంగా రెనాల్ట్ బ్రిడ్జర్ EV, హ్యుందాయ్ మోటార్ కంపెనీ భారత మార్కెట్ కోసం అభివృద్ధి చేస్తున్న కొత్త కాంపాక్ట్ EV, అలాగే మహీంద్రా విజన్ X కాన్సెప్ట్ ఆధారంగా వచ్చే మోడల్‌ పై ఓ రేంజ్ లో క్యూరియాసిటీ నెలకొంది. వీటిని కేవలం నగరాల్లో చిన్న ప్రయాణాలకు మాత్రమే పరిమితమయ్యే వాహనాలు కాకుండా, కుటుంబ అవసరాలు, రోజువారీ ప్రయాణాలతో పాటు దూర ప్రయాణాలకు కూడా సరిపోయేలా డెవలప్ చేస్తున్నారు. అంటే, చిన్న సైజులో ఉన్నప్పటికీ, పెద్ద SUV అనుభూతిని ఇవ్వాలనే లక్ష్యంతో కంపెనీలు పనిచేస్తున్నాయి.

పూర్తిగా మారబోతున్న బ్యాటరీ టెక్నాలజీ

ఈ కొత్త EVలలో ప్రధానంగా మారబోయేది బ్యాటరీ టెక్నాలజీ. ప్రారంభ దశలో వచ్చిన సరసమైన ఎలక్ట్రిక్ కార్లలో రేంజ్‌, బ్యాటరీ పనితీరు వంటి అంశాల్లో కొంత పరిమితి ఉండేది. కానీ, ఇప్పుడు మెరుగైన బ్యాటరీ ప్యాకేజింగ్‌, అధునాతన థర్మల్ మేనేజ్‌మెంట్ సిస్టమ్‌ల వల్ల ఎక్కువ దూరం ప్రయాణించే సామర్థ్యం లభించే అవకాశం ఉంది. ముఖ్యంగా భారత్ లో ఎక్కువ ఉష్ణోగ్రతలు, ట్రాఫిక్ పరిస్థితులు EV పనితీరుపై ప్రభావం చూపుతాయి. అందుకే, కొత్త మోడళ్లలో బ్యాటరీ కూలింగ్‌, పవర్ యూసేజ్ కంట్రోల్ పై కంపెనీలు ఎక్కువ దృష్టి పెడుతున్నాయి.

అత్యాధునిక ఫీచర్లు

ఇక ఫీచర్ల విషయంలో కూడా ఈ కొత్త తరం EVలు ఆకట్టుకోనున్నాయి. ఆధునిక టచ్‌ స్క్రీన్ ఇన్ఫోటైన్‌ మెంట్‌, కనెక్టెడ్ కార్ టెక్నాలజీ, డిజిటల్ డిస్‌ప్లేలు, అడ్వాన్స్‌డ్ సేఫ్టీ ఫీచర్లు లాంటి అంశాలు అందుబాటులోకి వచ్చే అవకాశం ఉంది. అదనంగా SUV స్టైల్ డిజైన్‌కు ప్రాధాన్యత ఇవ్వనున్నారు. ప్రస్తుతం భారత మార్కెట్లో SUVలకు ఉన్న డిమాండ్‌ను దృష్టిలో పెట్టుకుని కంపెనీలు డిజైన్‌ను మరింత ఆకర్షణీయంగా తీర్చిదిద్దుతున్నాయి.

ధర ఎలా ఉంటుందంటే?

ధర పరంగా చూస్తే, ఈ కొత్త మోడళ్లు ఇప్పటికే మార్కెట్లో ఉన్న హ్యుందాయ్ క్రెటా EV, టాటా నెక్సాన్ EV కంటే తక్కువ ధరలో ఉండే అవకాశం ఉంది. అంటే, మధ్యతరగతి వినియోగదారులను ఎక్కువగా ఆకర్షించేలా కంపెనీలు ప్లాన్ చేస్తున్నారు.