Viral Video: యమహా అద్భుతం.. ఈ బైక్ పడేసినా పడిపోదు!

Yamaha Self-Balancing Bike: ఆటో దిగ్గజం యమహా.. ఎప్పటికప్పుడు సరికొత్త టెక్నాలజీని తీసుకొస్తూ అందరినీ ఆశ్చర్యానికి గురి చేస్తూనే ఉంది. తాజాగా ఈ కంపెనీ మరో అద్భుతమైన టెక్నాలజీని పరిచయం చేసింది. ఏకంగా సెల్ఫ్ బ్యాలెన్సింగ్ బైక్ ను ఆవిష్కనించింది. ఈ బైక్ భవిష్యత్ టెక్నాలజీకి ప్రతిరూపంగా అభివర్ణించింది. ఈ బైక్‌ ను యమహా ‘మోటరాయిడ్’ కాన్సెప్ట్ పేరుతో అభివృద్ధి చేసింది. ఇది సాధారణ బైక్‌ లా కాకుండా, ఆటోమేటిక్ గా నిలబడుతుంది. కింద పడేసేందుకు ప్రయత్నించినా పడిపోదు. అంతేకాదు, రైడర్‌ను గుర్తించడం లాంటి ప్రత్యేక ఫీచర్లతో అందరి దృష్టిని ఆకర్షిస్తోంది.

స్టాండ్ లేకుండా నిలబడే యమహా బైక్

సాధారణంగా మనం చూసే బైక్‌ లు నిలబడాలంటే స్టాండ్ అవసరం. కానీ ఈ మోటరాయిడ్ బైక్‌ లో స్టాండ్ అవసరం లేదు. ఇందులో ఉన్న ప్రత్యేకమైన టెక్నాలజీ కారణంగా ఆటోమేటిక్ గా బ్యాలెన్స్ చేసుకుంటూ నిలబడుతుంది. ఇందుకోసం యమహా యాక్టివ్ మాస్ సెంటర్ కంట్రోల్ సిస్టమ్ (AMCES) అనే టెక్నాలజీని ఉపయోగించింది. ఈ బైక్ బరువును లోపలే కంట్రోల్ చేస్తూ, సెంటర్ ఆఫ్ గ్రావిటీని సర్దుబాటు చేసి బైక్ పడిపోకుండా నిలబెడుతుంది.

రైడర్ ను గుర్తించేలా ఏఐ ఫీచర్లు

ఇంకా ఆసక్తికరమైన విషయం ఏమిటంటే.. ఈ బైక్ కేవలం నిలబడడమే కాదు, రైడర్‌ ను గుర్తిస్తుంది కూడా. ఆర్టిఫిషియల్ ఇంటెలిజెన్స్ ఆధారంగా యజమాని ముఖాన్ని, చేతి సిగ్నల్స్ ను గుర్తించి రియాక్ట్ అవుతుంది. అంటే, యజమాని దగ్గరకు రాగానే బైక్ అతడి వైపు రావడం, వారి సూచనలకు అనుగుణంగా కదలడం చేస్తుంది. ఈ బైక్‌లో మరో ప్రత్యేకత ఏమిటంటే.. ఇది మనిషి, యంత్రం మధ్య ఒక కొత్త రకం సంబంధాన్ని ఏర్పరచేలా రూపొందించబడింది. సాధారణంగా వాహనం ఒక సాధనం మాత్రమే. కానీ మోటరాయిడ్ మాత్రం పార్ట్ నర్ గా కొనసాగేలా యమహా రూపొందిస్తోంది. ఇది రైడర్ బాడీ మూవ్ మెంట్స్ ను గుర్తించి, దానికి అనుగుణంగా స్పందించే హ్యూమన్ మెషీన్ ఇంటర్‌ ఫేస్‌ను కలిగి ఉంది.

ఎలక్ట్రిక్ వెహికల్ గా అందుబాటులోకి..

ఈ బైక్ పెట్రో వెర్షన్ లో కాకుండా ఎలక్ట్రిక్ మోడల్ గా రానుంది. భవిష్యత్తులో కాలుష్యం తగ్గించడానికి, స్మార్ట్ మొబిలిటీని పెంచడానికి ఇలాంటి బైక్స్ ఉపయోగపడుతాయని టెక్ నిపుణులు అభిప్రాయపడుతున్నారు. ప్రస్తుతం ఇది మార్కెట్‌లో అందుబాటులో లేని కాన్సెప్ట్ మోడల్. కానీ, భవిష్యత్తులో ఇలాంటి బైక్‌ లు సాధారణంగా మారే అవకాశం కనిపిస్తోంది. మొత్తంగా యమహా సెల్ఫ్ బ్యాలెన్సింగ్ బైక్ అనేది ఒక వాహనం మాత్రమే కాదు, టెక్నాలజీ, ఆర్టిఫిషియల్ ఇంటెలిజెన్స్, భవిష్యత్ ప్రయాణానికి గుర్తుగా నిలువబోతోంది. ఇప్పటి వరకు చూసిన బైక్‌ లకు భిన్నంగా, మనిషితో కలిసి పని చేసే స్మార్ట్ మెషీన్‌ గా మారే అవకాశం కనిపిస్తోంది.