బర్గ్ మాన్ స్ట్రీట్‌కు ABS వేరియంట్, క్రేజీ అప్ డేట్ ఇచ్చిన సుజుకి!

Burgman Street 2026: రీసెంట్ గా మార్గెట్ లోకి అడుగు పెట్టిన కొత్త సుజుకి బర్గ్ మాన్ స్ట్రీట్ స్కూటర్ ఇప్పటికే మంచి ఆదరణ దక్కించుకుంది. ఈ స్కూటర్ ప్రారంభ ధర సుమారు రూ.1.02 లక్షలు కాగా, కొత్త ఫీచర్లు, మంచి డిజైన్, పెద్ద బూట్ స్పేస్‌ తో ఈ మోడల్ మరింత ఆకర్షణీయంగా మారింది. సిటీ ప్రయాణాలకు అనువైన ఈ స్కూటర్ ప్రస్తుతం రెండు వేరియంట్లలో అందుబాటులో ఉంది. అందులో ఒకటి రైడ్ కనెక్ట్, మరొకటి TFT/కీలెస్ ఇగ్నిషన్. అయితే, ఈ రెండు వేరియంట్లలో కూడా యాంటీ లాక్ బ్రేకింగ్ సిస్టమ్(ABS) అందుబాటులో లేకపోవడంతో కొంత మంది నిరాశ వ్యక్తం చేస్తున్నారు.

భవిష్యత్ లో బర్గ్ మాన్ స్ట్రీట్‌కు ABS వేరియంట్‌

సుజుకి యాక్సెస్ లాంటి ఇతర స్కూటర్లలో ABS సదుపాయం ఇప్పటికే అందుబాటులో ఉంది. బర్గ్ మాన్ స్ట్రీట్‌ లో కూడా అదే ఫీచర్ ఎందుకు ఇవ్వలేదన్న ప్రశ్న వినియోగదారుల నుంచి వస్తోంది. ఈ విషయం కంపెనీ అధికారులకు తెలియడంతో రానున్న రోజుల్లో బర్గ్ మాన్ స్ట్రీట్‌ కు ABS వేరియంట్‌ను ప్రవేశపెట్టే అవకాశం చెప్పుకొచచారు. మరికొద్ది రోజుల్లోనే ఈ స్కూటర్ మరిన్ని భద్రతా ఫీచర్లతో మార్కెట్‌లోకి రావచ్చని తెలుస్తోంది.

ABS గురించి..

ABS అనేది కేవలం పెద్ద ఇంజిన్ బైక్‌ లకే అవసరమనే ఆలోచన చాలా మందిలో ఉంటుంది. కానీ, మన దేశంలోని రోడ్ల పరిస్థితులు చూస్తే, చిన్న స్కూటర్‌ కైనా ABS చాలా ఉపయోగపడుతుంది. దుమ్ము, కంకర, తడి రోడ్లు, అకస్మాత్తుగా బ్రేక్ వేయాల్సిన పరిస్థితుల్లో, టైర్లు లాక్ కాకుండా నియంత్రణలో ఉంచడంలో ABS కీలక పాత్ర పోషిస్తుంది. ముఖ్యంగా సిటీ ట్రాఫిక్‌ లో ఇది రైడర్‌కు అదనపు భద్రతను ఇస్తుంది. ప్రస్తుతం టాప్ వేరియంట్ అయిన బర్గ్ మాన్ స్ట్రీట్ రైడ్ కనెక్ట్ TFT మోడల్ ధర సుమారు రూ. 1.13 లక్షల వరకు ఉంటుంది. ఒకవేళ ABS వేరియంట్‌ ను తీసుకువస్తే, దాని ధర సుమారు రూ. 5,000 నుంచి రూ. 6,000 వరకు పెరగవచ్చని తెలుస్తోంది. అయితే, అదనపు ఖర్చుతో వచ్చే సేఫ్టీ ఫీచర్లు పరిగణనలోకి తీసుకుంటే, అది వినియోగదారులకు మంచి డీల్‌గా భావించవచ్చు.

ABSతో వస్తే మరింత పోటీ ఇచ్చే అవకాశం

సుజుకి సంస్థ ఈ ఫీచర్‌ను పరిచయం చేస్తే, బర్గ్మాన్ స్ట్రీట్ పోటీ మోడల్స్ కు మరింత గట్టి పోటీ ఇచ్చే అవకాశం ఉంటుంది. ముఖ్యంగా ప్రీమియం స్కూటర్ సెగ్మెంట్‌ లో భద్రతా ఫీచర్లు కీలకంగా మారుతున్న ఈ సమయంలో, ABS చేరడం ద్వారా ఈ మోడల్‌కు మరింత డిమాండ్ పెరిగే అవకాశం ఉంది. ఇప్పటికే స్టైల్, కంఫర్ట్, ఫీచర్ల పరంగా మంచి స్థాయిలో ఉన్న బర్గ్ మాన్ స్ట్రీట్, భవిష్యత్తులో ABS వేరియంట్‌ తో వస్తే, మరింత క్రేజీ స్కూటర్‌ గా మారుతుంది. వినియోగదారుల అవసరాలను దృష్టిలో ఉంచుకుని సుజుకి తీసుకునే నిర్ణయాలపై అందరి దృష్టి పడింది.