India’s First Solar Electric Car Vayve Eva: భారతీయ మార్కెట్ లోకి బోలెడు ఎలక్ట్రిక్ కార్లు అందుబాటులోకి వచ్చాయి. ఇంకా వస్తూనే ఉన్నాయి. అయితే, పలు ఆటో మోబైల్ సంస్థలు ఇప్పుడు సోలార్ పవర్ తో నడిచే కార్ల మీద ఫోకస్ పెట్టాయి. హ్యుందాయ్ లాంటి కంపెనీలు ఇప్పటికే ఈ దిశగా అడుగులు వేస్తున్నాయి. ఈ నేపథ్యంలో భారతీయ కంపెనీ వైవ్ మొబిలిటీ క్రేజీ సోలార్ పవర్ కారును తయారు చేసింది. దానికి ‘ఈవా’ అని పేరు పెట్టింది. ఇది దేశంలో సౌరశక్తితో నడిచే తొలి ఎలక్ట్రిక్ కార్లలో ఒకటిగా ప్రత్యేక గుర్తింపు తెచ్చుకుంది. దీనిని భారత్ మొబిలిటీ గ్లోబల్ ఎక్స్ పో 2025లో పరిచయం అయ్యింది. సిటీలో తక్కువ దూర ప్రయాణాల కోసం తక్కువ ఖర్చుతో ఉపయోగించుకునేలా ఈ కారును డిజైన్ చేశారు.
ఈవా ప్రత్యేకత దాని సోలార్ వ్యవస్థ. కారు రూఫ్ మీద అమర్చిన సోలార్ ప్యానెల్స్ రోజూ అదనంగా 10–12 కిలోమీటర్ల వరకు ప్రయాణించేలా సాయపడుతాయి. అంటే, సంవత్సరానికి సుమారు 3,000 కిలోమీటర్ల వరకు అదనపు ప్రయాణాన్ని పొందే అవకాశం ఉంటుంది. ఇది సాధారణ ఛార్జింగ్ తో పాటు ఖర్చును తగ్గించడంలో ఉపయోగపడుతుంది.
బ్యాటరీ పరంగా, ఈవా మూడు వేరియంట్లలో లభిస్తుంది. నోవా, స్టెల్లా, వేగా అనే మోడళ్లలో 9 kWh నుంచి 18 kWh వరకు బ్యాటరీ ఆప్షన్లు ఉన్నాయి. ఒక్కసారి పూర్తిగా ఛార్జ్ చేస్తే, వేరియంట్ను బట్టి 125 కిమీ నుంచి 250 కిమీ వరకు రేంజ్ ఇస్తుంది. DC ఫాస్ట్ ఛార్జింగ్ సపోర్ట్ ఉండటంతో, 15–20 నిమిషాల్లో 10% నుంచి 70% వరకు ఛార్జ్ అవుతుంది. ఇంట్లో సాధారణ 15A సాకెట్ ద్వారా సుమారు 5 గంటల్లో పూర్తిగా ఛార్జ్ అవుతుంది.
డిజైన్ పరంగా చాలా కాంపాక్ట్ గా ఉంటుంది. దాదాపు 3 మీటర్ల పొడవుతో 3 డోర్ మైక్రో కారుగా రూపొందించారు. ఇందులో ముగ్గురు కూర్చునే అవకాశం ఉంటుంది. ఇద్దరు పెద్దలు, ఒక చిన్నారి కూర్చోవచ్చు. చిన్న సైజ్ వల్ల ట్రాఫిక్ లో సులభంగా నడిపే అవకాశం ఉంటుంది. పార్కింగ్ కూడా ఇబ్బందిగా ఉండదు.
భద్రత, సౌకర్యాల విషయంలో కూడా ఈవా మంచి ఫీచర్లను కలిగి ఉంటుంది. మోనోకోక్ ఛాసిస్ పై నిర్మించబడిన ఈ కారు డ్రైవర్ ఎయిర్ బ్యాగ్, ABS, పార్కింగ్ సెన్సార్లు ఉన్నాయి. కొన్ని వేరియంట్లలో పనోరమిక్ సన్ రూఫ్, టచ్ స్క్రీన్ తో ఆపిల్ కార్ ప్లే, ఆండ్రాయిడ్ ఆటో సపోర్ట్, సర్దుబాటు చేసే డ్రైవర్ సీటు, అలాగే చిన్న ఫ్రిజ్ లా పనిచేసే చిల్ బాక్స్ లాంటి ఫీచర్లు ఉన్నాయి.
ఈ కారు ధర సుమారు రూ. 3.25 లక్షలు ఉండబోతోంది. అయితే, బ్యాటరీ యాజ్ ఎ సర్వీస్ (BaaS) విధానంలో ఈ కారును తక్కువ ధరకు కొనుగోలు చేసే అవకాశం ఉంటుంది. పనితీరు పరంగా ఈవా గరిష్టంగా గంటకు 80 కి.మీ వేగాన్ని అందిస్తుంది. 0 నుంచి 40 కి.మీ వేగాన్ని కేవలం 5 సెకన్లలో చేరుకుంటుంది. 300 లీటర్ల బూట్ స్పేస్ ఉంది. తక్కువ దూర ప్రయాణాలకు అనుకూలంగా ఉంటుంది. ఈ ఏడాది చివర్లో డెలివరీలు ప్రారంభమయ్యే అవకాశం ఉంది.
Read Also: ఫీచర్లలో విన్ఫాస్ట్ VF3 సూపర్.. కానీ, ఇండియాలో హిట్ కొట్టేనా?
Share
Tamannaah Bhatia: మద్రాస్ హైకోర్టులో తమన్నాకు చుక్కెదురు.. అసలేం జరిగిందంటే?
మంగ్లీ వల్ల నాకు ప్రాణహాని ఉంది.. నాకు ఏమైనా జరిగితే మంగ్లీనే కారణం: హిమాకాంత్ రెడ్డి
