భారత్‌ లోకి 3 విన్‌ ఫాస్ట్ ఎలక్ట్రిక్ స్కూటర్లు.. చేతక్, ఐక్యూబ్‌ కు ఇక చుక్కలేనా?

VinFast India Scooter Lineup: వియత్నాంకు చెందిన ప్రముఖ ఎలక్ట్రిక్ వాహన తయారీ సంస్థ విన్‌ ఫాస్ట్ భారత మార్కెట్లో మరింత విస్తరించేందుకు సిద్ధమవుతోంది. ఇప్పటికే VF 6, VF 7 ఎలక్ట్రిక్ కార్లను దేశంలో అందుబాటులోకి తీసుకొచ్చిన కంపెనీ.. ఇప్పుడు ఎలక్ట్రిక్ స్కూటర్ విభాగంపై దృష్టి పెట్టింది. దేశంలో పెరుగుతున్న ఈవీ డిమాండ్‌ ను దృష్టిలో ఉంచుకుని మూడు కొత్త ఎలక్ట్రిక్ స్కూటర్లను తీసుకురావాలని ప్రణాళికలు రూపొందిస్తోంది.

ఒకేసారి మూడు ఈవీ స్కూటర్లు విడుదల

విన్‌ ఫాస్ట్ ఇండియన్ ఈవీ మార్కెట్ లోకి ఇవో (Evo), ఫెలిజ్ (Feliz), వైపర్ (Vyper) పేర్లతో మూడు స్కూటర్లను అందుబాటులోకి తీసుకురానుంది. ప్రస్తుతం ఈ మోడళ్లు విదేశీ మార్కెట్లలో అందుబాటులో ఉన్నాయి. వీటిని భారత రోడ్లకు, వినియోగదారుల అవసరాలకు అనుగుణంగా కొన్ని మార్పులు చేసి విడుదల చేయనుంది. ఈ స్కూటర్లను తమిళనాడులో ఏర్పాటు చేస్తున్న విన్‌ ఫాస్ట్ ప్లాంట్‌ లో అసెంబుల్ చేయనున్నారు. కంపెనీ కంప్లీట్లీ నాక్డ్ డౌన్ (CKD) కిట్ల రూపంలో భాగాలను దిగుమతి చేసుకుని ఇక్కడే తయారీ ప్రక్రియను పూర్తి చేయనుంది. దీంతో ధరలను పోటీ స్థాయిలో ఉంచే అవకాశం ఉంటుంది.

విన్‌ ఫాస్ట్ ఈవీల రేంజ్!

విన్‌ ఫాస్ట్ తీసుకురానున్న మోడళ్లలో ఫెలిజ్, వైపర్ స్కూటర్లు ఇప్పటికే ఇతర ఆసియా దేశాల్లో మంచి ఆదరణ పొందాయి. ఫెలిజ్ మోడల్‌ లో 3 kWh బ్యాటరీ ప్యాక్‌ తో పాటు 2.8 kW ఎలక్ట్రిక్ మోటార్‌ ను అందిస్తున్నారు. ఇది రోజువారీ నగర ప్రయాణాలకు అనుకూలంగా రూపొందించబడింది. మరోవైపు, వైపర్ స్కూటర్ మరింత శక్తివంతమైన మోడల్‌ గా రానుంది. ఇందులో 4.8 kWh బ్యాటరీ ప్యాక్‌ తో పాటు 3 kW ఎలక్ట్రిక్ మోటార్ ఉంటుంది. ఎక్కువ రేంజ్‌ తో పాటు మెరుగైన పనితీరును కోరుకునే వినియోగదారులను ఇది ఆకర్షించే అవకాశం ఉంది. ఇక ఇవో మోడల్ సంప్రదాయ స్కూటర్ డిజైన్‌ను కలిగి ఉంటుంది. భారత మార్కెట్లో ఇప్పటికే ప్రాచుర్యం పొందిన బజాజ్ చేతక్, ఏథర్ రిజ్టా, టీవీఎస్ ఐక్యూబ్ లాంటి మోడళ్లకు గట్టి పోటీ ఇవ్వనుంది. ఇందులో 2.4 kWh బ్యాటరీ ప్యాక్, 2.25 kW హబ్ మౌంటెడ్ ఎలక్ట్రిక్ మోటార్‌ ను అందించనున్నారు.

భారత్ మరింత పోటీ తప్పదా?

దేశంలో ఎలక్ట్రిక్ టూవీలర్స్ మార్కెట్ వేగంగా పెరుగుతున్న నేపథ్యంలో విన్‌ ఫాస్ట్ ఎంట్రీ పోటీని మరింత పెంచే అవకాశం ఉంది. ధరలు, రేంజ్, ఫీచర్లకు సంబంధించిన పూర్తి వివరాలు ఇంకా వెల్లడికాలేదు. అయితే, స్థానికంగా అసెంబుల్ చేసే కారణంగా ఈ స్కూటర్లు సరసమైన ధరల్లో అందుబాటులోకి వచ్చే అవకాశముందని మార్కెట్ వర్గాలు భావిస్తున్నాయి.