తండ్రిపై కోర్టుకెక్కిన కూతురు.. పీపీఎఫ్ డబ్బులు తీసుకున్నారని కేసు.. తీర్పు ఇదే

Father vs Daughter PPF Case: పిల్లల భవిష్యత్తు కోసం తల్లిదండ్రులు పొదుపు చేస్తుంటారు. అయితే, ఆ పొదుపు డబ్బులు పిల్లల పేరుతో ఉంటే వాటిపై హక్కు ఎవరికి ఉంటుంది? తండ్రి తన కూతురు పేరుతో తెరిచిన పబ్లిక్ ప్రావిడెంట్ ఫండ్ (PPF) ఖాతాలోని డబ్బులను తీసుకోవచ్చా? ఈ ప్రశ్నకు ఢిల్లీ హైకోర్టు కీలక తీర్పుతో సమాధానమిచ్చింది.

కూతురు పేరుతో పీపీఎఫ్ ఖాతా తెరిచిన తండ్రి

ఢిల్లీకి చెందిన ఓ వ్యక్తి 1999 డిసెంబర్ 9న తన మైనర్ కూతురు పేరుతో స్టేట్ బ్యాంక్ ఆఫ్ ఇండియా జనక్‌పురి శాఖలో పీపీఎఫ్ అకౌంట్ తెరిచారు. ఈ ఖాతా 2016 మార్చి 31న మెచ్యూరిటీకి వచ్చింది. అదే ఏడాది నవంబర్ 13న కూతురు మేజర్‌గా మారింది. 2017 సెప్టెంబర్‌లో ఆమె బ్యాంకుకు వెళ్లి ఇక తాను మేజర్‌నని అందువల్ల అకౌంట్ తన పేరుతో మార్చాలని కోరింది. అయితే, అప్పటికే తండ్రి.. అకౌంట్ క్లోజ్ చేసి అందులోని డబ్బంతా తీసుకున్నట్లు బ్యాంకు అధికారులు తెలిపారు. దీంతో ఆమె తన తండ్రిపై న్యాయపోరాటం చేయాలని నిర్ణయించుకుంది.

కూతురు ఖాతా నుంచి తండ్రి ఎంత డబ్బు తీసుకున్నారు?

తండ్రి పీపీఎఫ్ ఖాతా నుంచి మొత్తం రూ.8,13,853.79 విత్‌డ్రా చేసి తన వ్యక్తిగత ఖాతాకు బదిలీ చేసుకున్నారు. ఈ డబ్బును కూతురి ఉన్నత విద్య, సంక్షేమం కోసం ఖర్చు చేస్తానని బ్యాంకుకు హామీ ఇచ్చినట్లు కేసులో వెల్లడైంది. అయితే, తన తల్లిదండ్రుల మధ్య వైవాహిక విభేదాలు ఉన్నాయని, తాను తల్లితో కలిసి ఉంటున్నానని కూతురు కోర్టుకు తెలిపింది. తన బీబీఏ చదువుకు ఏడాదికి రూ.85,200 ఫీజు చెల్లించాల్సి ఉందని వివరించింది. తన పొదుపు డబ్బులు అందుబాటులో లేకపోవడంతో విద్య, ఇతర ఖర్చులకు ఇబ్బందులు ఎదురవుతున్నాయని వాదించింది.

Also Read: ఆఫీస్‌లో సహోద్యోగులతో స్నేహం మంచిదే.. కానీ ఈ విషయాలు మాత్రం వారికి చెప్పకూడదు

తండ్రి కోర్టులో ఏం వాదించారు?

కూతురి పీపీఎఫ్ ఖాతా మెచ్యూరిటీకి రావడంతోనే డబ్బులు తీసుకున్నానని తండ్రి చెప్పారు. ఎలాంటి దురుద్దేశం తనకు లేదని, కూతురి ప్రయోజనాల కోసమే ఆ మొత్తం ఉపయోగించాలనుకున్నానని వాదించారు. అంతేకాకుండా, కుటుంబ న్యాయస్థానం ఆదేశాల ప్రకారం కూతురికి నెలకు రూ.12,000 నిర్వహణ భత్యం చెల్లించానని తెలిపారు. ఇప్పటివరకు రూ.6 లక్షలు చెల్లించానని పేర్కొంటూ, ఆ మొత్తాన్ని పీపీఎఫ్ డబ్బుల్లో సర్దుబాటు చేయాలని కోరారు.

Also Read: భర్త సంపాదన నెలకు రూ.11 వేలు.. విడాకుల తరువాత భార్యకు నెలవారీ రూ.25000 చెల్లించాలన్న కోర్టు

ఢిల్లీ హైకోర్టు ఏం తీర్పు ఇచ్చింది?

కూతురి మెయింటెనెన్స్ ఖర్చులు భరించడం తండ్రి చట్టపరమైన బాధ్యత అని హైకోర్టు స్పష్టం చేసింది. ఆ బాధ్యతను నెరవేర్చడానికి పిల్లల పేరుతో ఉన్న పొదుపు డబ్బులను ఉపయోగించలేరని పేర్కొంది. గతంలో చెల్లించిన నిర్వహణ భత్యాన్ని కూతురి పీపీఎఫ్ సొమ్ముతో సర్దుబాటు చేయడానికి కూడా కోర్టు అంగీకరించలేదు.
చివరగా, కింది కోర్టు ఇచ్చిన తీర్పును ఢిల్లీ హైకోర్టు సమర్థించింది. తండ్రి రూ.8,13,853.79 మొత్తాన్ని 8 శాతం వార్షిక వడ్డీతో కూతురికి తిరిగి చెల్లించాలని ఆదేశించింది.

ఈ తీర్పు ద్వారా పిల్లల పేరుతో ఉన్న పెట్టుబడులను తల్లిదండ్రులు తమ వ్యక్తిగత బాధ్యతల కోసం వినియోగించలేరనే విషయం స్పష్టమైంది.

Join WhatsApp Channel

Share

• 
• 
• 
• 
• 
•