Diwali Firecracker Insurance| దీపావళి వచ్చిందంటే చాలు.. ఇళ్లన్నీ దీపాల వెలుగులతో మెరిసిపోతాయి. చిన్నా, పెద్దా అందరూ టపాసులు (బాణాసంచా) కాలుస్తూ పండుగను ఆనందంగా జరుపుకుంటారు. అయితే, బాణసంచా కాల్చే సమయంలో చిన్నపాటి నిర్లక్ష్యం కూడా అగ్రి ప్రమాదాలు, కాలిన గాయాలు, ఇతర ప్రమాదాలకు దారితీయవచ్చు. ఇలాంటి పరిస్థితుల్లో వైద్య ఖర్చుల కోసం ఆర్థికంగా కొంత అండగా ఉండేందుకు ఫోన్‌పే ప్రత్యేక ఇన్సూరెన్స్ పాలసీని అందిస్తోంది. కేవలం రూ.11 ప్రీమియంతో ప్రారంభమయ్యే ఈ పాలసీ ద్వారా రూ.25,000 వరకు కవరేజ్ లభిస్తుంది. మరి ఈ బీమా ఎలా పనిచేస్తుంది? ఎవరికి వర్తిస్తుంది? ఎలా తీసుకోవాలో తెలుసుకుందాం.
వినియోగదారుల కోసం ఫోన్‌పే రెండు రకాల ఫైర్‌క్రాకర్ ఇన్సూరెన్స్ ప్లాన్లను అందిస్తోంది. వీటి ధరలు, కవరేజ్ కాలపరిమితులు వేర్వేరుగా ఉంటాయి.
30 రోజుల ప్లాన్ ధర రూ.21 కాగా, ఇది అక్టోబర్ 15 నుంచి అందుబాటులోకి వచ్చింది. మరోవైపు, 11 రోజుల ప్లాన్ ధర రూ.11. ఈ ప్లాన్ నవంబర్ 5 నుంచి అందుబాటులోకి రావాల్సి ఉంది.
పాలసీ తీసుకునే ముందు కవరేజ్ ప్రారంభమయ్యే తేదీ, ముగింపు తేదీని తప్పనిసరిగా పరిశీలించాలి.
ఈ పాలసీ ద్వారా రూ.25,000 వరకు వైద్య ఖర్చులకు కవరేజ్ లభిస్తుంది.
బాణసంచా ప్రమాదాల కారణంగా గాయాలైతే, అర్హత కలిగిన వైద్య ఖర్చులకు రూ.25,000 వరకు కవరేజ్ లభిస్తుంది. 24 గంటలకు మించి ఆసుపత్రిలో చేరి చికిత్స పొందినప్పుడు ఈ ప్రయోజనం వర్తిస్తుంది.
ఈ మెడికల్ కవరేజ్ ప్రధాన పాలసీదారుతో పాటు జీవిత భాగస్వామికి, ఇద్దరు పిల్లలకు కూడా వర్తిస్తుంది. అయితే, బీమా సంస్థ నిబంధనల ప్రకారం క్లెయిమ్ పరిశీలిస్తుంది.
ఆసుపత్రిలో ఎక్కువసేపు ఉండాల్సిన అవసరం లేని చికిత్సలకూ ప్రయోజనం ఉంటుంది.
కొన్ని బాణసంచా ప్రమాదాల్లో కాలిన గాయాలకు తక్కువ సమయంలోనే చికిత్స అందించవచ్చు. 24 గంటలలోపు పూర్తయ్యే డే కేర్ చికిత్సలకు కూడా ఈ పాలసీ కవరేజ్ అందిస్తుంది. అయితే, ఏయే చికిత్సలు వర్తిస్తాయో పాలసీ నిబంధనల్లో పరిశీలించాలి.
బాణసంచా ప్రమాదం కారణంగా ప్రధాన పాలసీదారుడు మరణిస్తే, నిబంధనలకు లోబడి రూ.25,000 ప్రమాద మరణ బీమా ప్రయోజనం లభిస్తుంది. ఈ ప్రయోజనం ప్రధాన బీమాదారుడికి మాత్రమే వర్తిస్తుంది.
Also Read: భారీ ఖర్చు చేశాక పెళ్లి వాయిదా లేదా రద్దు అయిందా.. ఆర్థిక భద్రత కోసం ఇన్సూరెన్స్ ఉందిగా
1. మీ స్మార్ట్‌ఫోన్‌లో ఫోన్‌పే యాప్‌ను తెరవండి.
2. ఇన్సూరెన్స్ విభాగంలో ఫైర్‌క్రాకర్ ఇన్సూరెన్స్ ఆప్షన్ చూడండి.
3. అందుబాటులో ఉన్న ప్లాన్లు, ధరలు, కవరేజ్ వివరాలను పరిశీలించండి.
4. పాలసీ నిబంధనలు, మినహాయింపులు, అర్హతలను చదవండి.
5. అవసరమైన వివరాలను నమోదు చేసి డిజిటల్ చెల్లింపు పూర్తి చేయండి.
6. పాలసీ నిర్ధారణ సందేశాన్ని పరిశీలించి, కవరేజ్ ప్రారంభ తేదీని తెలుసుకోండి.
Also Read: పెళ్లిలో లభించిన బహుమతులుపై ట్యాక్స్ కట్టాలా? ఆదాయపు పన్ను నిబంధనలు ఇవే..
రూ.25,000 అనేది గరిష్ఠ కవరేజ్ పరిమితి మాత్రమే. ప్రతి క్లెయిమ్‌కు అంత మొత్తం తప్పనిసరిగా అందుతుందని అర్థం కాదు. వైద్య ఖర్చుల రీయింబర్స్‌మెంట్, క్లెయిమ్ పత్రాలు, మినహాయింపుల వివరాలను ముందుగానే తెలుసుకోవాలి.
దీపావళి సందర్భంగా బాణసంచా ప్రమాదాల వల్ల కలిగే ఆర్థిక భారాలను తగ్గించుకోవడానికి ఫోన్‌పే ఇన్సూరెన్స్ ఉపయోగపడుతుంది. అయితే, బీమా ఉన్నంత మాత్రాన ప్రమాదాలు జరగకుండా ఆగవు. కాబట్టి, టపాసులు కాల్చేటప్పుడు భద్రతా నియమాలు పాటించండి. పాలసీ తీసుకునే ముందు దాని పూర్తి నిబంధనలను చదవండి.
Share
ప్రేమ కోసం షోలోకి... కెమెరాలు ఆగాక వాళ్ల బంధాలు ఏమయ్యాయి ? క్రేజీ కొరియన్ సిరీస్
ఒక్క పాటతో ఓవర్‌నైట్ క్రేజ్.. సోషల్ మీడియాలో వైరల్ అవుతున్న ఫోక్ సాంగ్స్!
