UK: అనుకోకుండా తలపై దాడి.. సగం పుర్రె తొలగింపు

UK: ఆవేశంలో చేసే పనులు ఎన్నో అనార్థాలకు దారి తీస్తాయి. ఎంతో నష్టాన్ని కలిగిస్తాయి. ఒక్కోసారి ఇతరుల ప్రాణాల మీదకు కూడా తెస్తాయి. ఇలానే బ్రిటన్‌లో ఓ వ్యక్తి చేసిన పనికి బాధితుడి తల భాగాన్ని కొంత మేర కోల్పోవాల్సి వచ్చింది.

బ్రాండెన్ స్ట్రామ్‌బెర్గ్ అనే యువకుడు గతేడాది మేలో తన ప్రియురాలితో కలిసి లండన్‌లో షాపింగ్‌కు వెళ్లాడు. అక్కడ అనుకోకుండా ఓ వ్యక్తి స్ట్రామ్‌బెర్గ్ తలపై గట్టిగా పంచ్ ఇచ్చాడు. దీంతో అతడు కుప్పకూలిపోయాడు. వెంటనే స్థానికులు అతడిని ఆసుపత్రికి తరలించారు. వైద్య పరీక్షలు నిర్వహించిన డాక్టర్లు.. అతడి బ్రెయిన్‌లో రక్తస్రావం అయినట్లు గుర్తించారు. అప్పటికే స్ట్రామ్‌మెర్గ్ కోమాలోకి వెళ్లిపోయాడు.

ఆ తర్వాత అతడికి శస్త్రచికిత్స చేసిన వైద్యులు సగం పుర్రెను తొలగించారు. ఇటీవల అతడు కోలుకొని కోమాలో నుంచి బయటకు వచ్చినప్పటికీ.. జ్ఞాపకశక్తిని కోల్పోయాడు. ప్రియురాలు అతడి వెంటనే ఉంటూ తిరిగి మామూలు మనిషిని చేయడానికి ప్రయత్నిస్తోంది. గతంలో జరిగిన విషయాలను అన్నింటిని అతడికి వివరిస్తుంది. ఇక మరోసారి తలకు దెబ్బతగిలితే ప్రాణాలు పోయే అవకాశం ఉండడంతో బాధితుడు ఎటువెళ్లినా హెల్మెట్ పెట్టుకొని వెళ్తున్నాడు. ప్రస్తుతం బాధితుడికి సంబంధించిన ఫొటోలు సోషల్ మీడియాలో వైరలవుతున్నాయి.