Stress: ఒత్తిడితో ఇబ్బంది పడుతున్నారా ? వీటితో ప్రాబ్లమ్ సాల్వ్

Stress: ఒత్తిడి అనేది ప్రస్తుతం ఒక భాగమైపోయింది. అయితే.. మనకు ‘స్ట్రెస్’ ఉందని మనమే గుర్తించలేనంతగా.. దానికి అలవాటు పడిపోవడమే అసలైన ప్రమాదం. చాలా సార్లు మన శరీరం, మనస్సు ఒత్తిడిలో ఉన్నామని రకరకాల సంకేతాల ద్వారా.. హెచ్చరిస్తున్నా.. మనం వాటిని పని ఒత్తిడి అనుకుంటూ నిర్లక్ష్యం చేస్తాం. ఈ దీర్ఘకాలిక ఒత్తిడి కేవలం మానసిక ఆరోగ్యాన్నే కాకుండా.. శారీరక ఆరోగ్యాన్ని కూడా తీవ్రంగా దెబ్బతీస్తుంది. మీరు కూడా తెలియకుండానే.. విపరీతమైన ఒత్తిడికి లోనవుతున్నారా ? మీ శరీరం పంపిస్తున్న ఆ 10 ‘సైలెంట్’ సంకేతాలేమిటో తెలుసుకోవడం అవసరం.

ఎక్కువ ఒత్తిడిలో ఉన్నారని చెప్పే 10 సంకేతాలు:
1. చిన్న చిన్న విషయాలకే చిరాకు పడటం:
గతంలో మిమ్మల్ని పెద్దగా ఇబ్బంది పెట్టని చిన్న విషయాలు ఇప్పుడు మీకు విపరీతమైన కోపాన్ని లేదా చిరాకును కలిగిస్తున్నాయా? ఎవరైనా ఏదైనా అడిగినా లేదా చిన్న పొరపాటు చేసినా మీరు అసహనానికి గురవుతుంటే.. మీ మనస్సు తీవ్రమైన ఒత్తిడిని మోస్తోందని అర్థం.

2. నిరంతర అలసట:
రాత్రంతా 7-8 గంటలు పడుకున్నా.. ఉదయం లేవగానే ఇంకా నీరసంగా అనిపిస్తుంటే.. అది మానసిక ఒత్తిడికి సంకేతం. ఒత్తిడి వల్ల మన మెదడు నిరంతరం పనిచేస్తూనే.. ఉంటుంది. దీని వల్ల శరీరం త్వరగా అలసిపోతుంది.

3. నిర్ణయాలు తీసుకోవడంలో తడబాటు :
ఏం తినాలి? ఏ బట్టలు వేసుకోవాలి? వంటి చిన్న నిర్ణయాలు తీసుకోవడానికి కూడా మీరు కన్ఫ్యూజ్ అవుతున్నారా? ఒత్తిడి మీ ఏకాగ్రతను దెబ్బతీస్తుంది. దీనినే ‘బ్రెయిన్ ఫాగ్’ అంటారు. దీని వల్ల స్పష్టంగా ఆలోచించడం కష్టమవుతుంది.

4. శారీరక నొప్పులు :
ఒత్తిడిలో ఉన్నప్పుడు మన కండరాలు తెలియకుండానే బిగుసుకుపోతాయి. ముఖ్యంగా భుజాల నొప్పులు, మెడ నొప్పి, తరచుగా వచ్చే తలనొప్పి.. మీరు ఒత్తిడిలో ఉన్నారని చెప్పడానికి శరీరమిచ్చే ప్రధాన సంకేతాలు.

5. నిద్రలేమి సమస్యలు:
పడుకోగానే పాత విషయాలు గుర్తుకురావడం లేదా భవిష్యత్తు గురించి ఆందోళన చెందడం వల్ల నిద్ర పట్టకపోవడం ఒత్తిడికి పరాకాష్ట. నిద్ర మధ్యలో మెలకువ రావడం, మళ్ళీ నిద్ర పట్టకపోవడం వంటివి జరిగితే మీరు మానసిక ప్రశాంతత కోల్పోతున్నారని గుర్తించాలి.

6. ఆహారపు అలవాట్లలో మార్పు:
ఒత్తిడిలో ఉన్నప్పుడు కొందరు అస్సలు తినరు, మరికొందరు ‘ఎమోషనల్ ఈటింగ్’ పేరుతో విపరీతంగా జంక్ ఫుడ్ తింటుంటారు. ముఖ్యంగా.. స్వీట్లు లేదా చిప్స్ వంటివి అతిగా తినాలనిపిస్తుంటే.. అది మీ ఒత్తిడిని తగ్గించుకోవడానికి.. మెదడు చేసే ప్రయత్నం కావచ్చు.

7. తరచుగా అనారోగ్యానికి గురవ్వడం:
దీర్ఘకాలిక ఒత్తిడి మీ రోగ నిరోధక శక్తిని తగ్గిస్తుంది. దీని వల్ల మీకు తరచుగా జలుబు, దగ్గు లేదా ఇన్ఫెక్షన్లు సోకుతుంటాయి. శరీరం తనను తాను రక్షించుకునే శక్తిని కోల్పోతోందని దీని అర్థం.

8. సామాజిక దూరం:
స్నేహితులను కలవడానికి ఆసక్తి లేకపోవడం, ఎవరితోనూ మాట్లాడాలని అనిపించకపోవడం లేదా ఒంటరిగా ఉండటమే మేలని భావించడం ఒత్తిడి వల్ల కలిగే ప్రధాన మార్పు. ఇతరుల సమక్షం మీకు భారంగా అనిపించవచ్చు.

9. అతిగా ఆలోచించడం:
జరిగిన విషయాల గురించి పదే పదే మదనపడటం లేదా జరగబోయే.. వాటి గురించి భయపడటం మిమ్మల్ని మానసికంగా కృంగదీస్తుంది. ప్రతి చిన్న సమస్యను కొండంతలుగా ఊహించుకోవడం ఒత్తిడి లక్షణం.

10. మరపు:
ముఖ్యమైన పనులు మర్చిపోవడం, వస్తువులను ఎక్కడ పెట్టామో గుర్తుండకపోవడం వంటివి జరుగుతున్నాయా? ఒత్తిడి వల్ల మెదడులోని జ్ఞాపక శక్తికి సంబంధించిన భాగం ప్రభావితం అవుతుంది.

ఒత్తిడిని ఎలా తగ్గించుకోవాలి?
లోతైన శ్వాస: రోజుకు 10 నిమిషాలు ప్రాణాయామం చేయండి.

డిజిటల్ డిటాక్స్: ఫోన్ , సోషల్ మీడియాకు దూరంగా కొంత సమయం గడపండి.

నడక: ప్రకృతిలో కాసేపు నడవడం వల్ల ఒత్తిడి హార్మోన్లు తగ్గుతాయి.

సహాయం కోరండి: నమ్మకమైన స్నేహితులతో లేదా కౌన్సెలర్ తో మాట్లాడండి

Share

• 
• 
• 
• 
• 
•