Body Checkup: ఆరోగ్యంగా ఉండాలా ? అయితే ఈ 5 టెస్టులు తప్పక చేయించుకోండి

Body Checkup: చాలా మంది పూర్తి శరీర పరీక్ష చేయించుకుంటే.. అన్ని ఆరోగ్య సమస్యలు తెలిసిపోతాయని నమ్ముతారు. కానీ.. నిజానికి కొన్ని నిర్దిష్టమైన పరీక్షలు ప్రాణాపాయ స్థితిని ముందుగానే గుర్తించడంలో సాధారణ చెకప్ కంటే మెరుగ్గా.. పని చేస్తాయి. వయస్సు, లైఫ్ స్టైల్ బట్టి మన శరీరంలో నిశ్శబ్దంగా పెరిగే జబ్బులను పట్టుకోవడానికి ఈ 5 ప్రత్యేక పరీక్షలు చాలా అవసరం. ఇవి కేవలం రిపోర్టులు ఇవ్వడమే కాకుండా.. రాబోయే పెద్ద ప్రమాదాల నుంచి మనల్ని కాపాడే నిజమైన రక్షణ కవచాలు. ఆ ముఖ్యమైన పరీక్షలేంటో ఇప్పుడు చూద్దాం.

ఫుల్ బాడీ చెకప్ కంటే కీలకమైన 5 ఆరోగ్య పరీక్షలు:
సాధారణ హెల్త్ ప్యాకేజీలలో ఉండే బ్లడ్ టెస్టుల కంటే లోతుగా విశ్లేషించే ఈ పరీక్షలు మీ దీర్ఘకాలిక ఆరోగ్యానికి ఎంతో ముఖ్యం.

1.HbA1c టెస్ట్ (HbA1c – మూడు నెలల షుగర్ లెవల్స్):
సాధారణంగా మనం చేయించుకునే ‘ఫాస్టింగ్ షుగర్’ పరీక్ష ఆ సమయానికి ఉన్న చక్కెర స్థాయిని మాత్రమే చూపుతుంది. కానీ HbA1c పరీక్ష గత 3 నెలల సగటు చక్కెర స్థాయిని తెలియజేస్తుంది. ఇది మీరు మధుమేహం అంచున ఉన్నారో లేదో ఖచ్చితంగా చెబుతుంది. గుండె జబ్బులు, కిడ్నీ సమస్యలను నివారించడానికి ఇది అత్యంత కీలకమైన పరీక్ష.

2. విటమిన్ డి, బి12 పరీక్ష (Vitamin D & B12):
మన దేశంలో దాదాపు 70 శాతం మంది ఈ విటమిన్ల లోపంతో.. బాధపడుతున్నారు. విటమిన్ డి ఎముకల బలానికి, రోగ నిరోధక శక్తికి అవసరం కాగా.. బి12 నరాల ఆరోగ్యానికి ముఖ్యం. అలసట, నీరసం, కీళ్ల నొప్పులకు వీటి లోపమే ప్రధాన కారణం. సాధారణ చెకప్‌లో వీటిని తరచుగా విస్మరిస్తారు. కానీ వీటిని తెలుసుకోవడం చాలా ముఖ్యం.

3. కార్డియాక్ కాల్షియం స్కోర్:
కేవలం కొలెస్ట్రాల్ టెస్ట్ ద్వారా గుండె పోటు వస్తుందో లేదో ఖచ్చితంగా చెప్పలేము. ఈ CT స్కాన్ పరీక్ష గుండె ధమనులలో ఎంత కాల్షియం/ప్లేక్ పేరుకుపోయిందో కొలుస్తుంది. భవిష్యత్తులో గుండెపోటు వచ్చే అవకాశం ఎంత ఉందో ఇది ముందే హెచ్చరిస్తుంది.

Also Read: రక్తహీనతకు చెక్ పెట్టాలంటే.. రోజూ ఈ 5 ఎండుద్రాక్షలు చాలు!

4. లిపిడ్ ప్రొఫైల్‌లో ‘అపో బి’ పరీక్ష:
సాధారణ కొలెస్ట్రాల్ పరీక్ష కంటే ApoB పరీక్ష గుండె జబ్బుల ప్రమాదాన్ని మరింత ఖచ్చితంగా అంచనా వేస్తుంది. ఇది రక్తంలో గుండె జబ్బులకు కారణమయ్యే హానికరమైన కణాల సంఖ్యను లెక్కిస్తుంది. మీ చెడు కొలెస్ట్రాల్ సాధారణంగా ఉన్నా, ApoB ఎక్కువగా ఉంటే ప్రమాదం పొంచి ఉన్నట్లే.

5. థైరాయిడ్ ప్రొఫైల్ :
శరీర మెటబాలిజంను నియంత్రించేది థైరాయిడ్ గ్రంథి. బరువు పెరగడం, జుట్టు రాలడం, మూడ్ స్వింగ్స్ వంటి సమస్యలకు ఇది మూలం. ముఖ్యంగా.. మహిళల్లో థైరాయిడ్ సమస్యలు అధికంగా ఉంటాయి కాబట్టి.. సాధారణ బాడీ చెకప్ కంటే దీనిపై ప్రత్యేక శ్రద్ధ పెట్టడం అవసరం.

Join WhatsApp Channel

Share

• 
• 
• 
• 
• 
•