Best Vitamins for Digestion: మనం ఎంత మంచి ఆహారం తిన్నా, అది సరిగ్గా జీర్ణం కాకపోతే శరీరానికి అందాల్సిన పోషకాలు అందవు. నేటి కాలంలో మారిన జీవనశైలి, జంక్ ఫుడ్ వల్ల చాలామంది గ్యాస్, మలబద్ధకం వంటి జీర్ణ సమస్యలతో ఇబ్బంది పడుతున్నారు. కేవలం ఫైబర్ మాత్రమే కాకుండా, కొన్ని రకాల విటమిన్లు మన జీర్ణవ్యవస్థను, ముఖ్యంగా పేగుల్లో ఉండే మంచి బ్యాక్టీరియాను రక్షించడంలో కీలక పాత్ర పోషిస్తాయి. మన పొట్టను ఆరోగ్యంగా ఉంచే ఆ బెస్ట్ విటమిన్లు ఏంటో ఇప్పుడు తెలుసుకుందాం.
జీర్ణక్రియను మెరుగుపరిచే బెస్ట్ విటమిన్లు:
ఆరోగ్యం అనేది మన ‘పొట్ట’ నుంచే మొదలవుతుంది. మన పేగుల్లో కొన్ని కోట్ల మంచి బ్యాక్టీరియాలు ఉంటాయి. ఇవి ఆహారాన్ని విచ్ఛిన్నం చేయడమే కాకుండా రోగనిరోధక శక్తిని కూడా పెంచుతాయి. వీటికి సరైన పోషణ అందించే విటమిన్లు ఇవే:
1. విటమిన్ B కాంప్లెక్స్:
జీర్ణక్రియకు విటమిన్ B అత్యంత ముఖ్యమైంది. ఇందులో ముఖ్యంగా..
B1 : ఇది కార్బోహైడ్రేట్లను శక్తిగా మారుస్తుంది.
B3: జీర్ణవ్యవస్థ పనితీరును క్రమబద్ధీకరిస్తుంది. దీని లోపం వల్ల వికారం, వాంతులు అయ్యే అవకాశం ఉంది.
B12: ఇది నరాల ఆరోగ్యంతో పాటు ఆహారం జీర్ణం కావడానికి అవసరమైన ఎంజైమ్ల ఉత్పత్తికి సహాయ పడుతుంది.
లభించే ఆహారం: మిల్లెట్స్, ఆకుకూరలు, గుడ్లు, పాలు.
2. విటమిన్ C:
విటమిన్ C కేవలం రోగనిరోధక శక్తికే కాదు, జీర్ణ క్రియకు కూడా మేలు చేస్తుంది. ఇది ఐరన్ గ్రహించడంలో శరీరానికి సహాయ పడుతుంది. అలాగే పేగుల్లోని కొల్లాజెన్ ఉత్పత్తికి తోడ్పడి, జీర్ణకోశ గోడలను బలంగా ఉంచుతుంది.
లభించే ఆహారం: నిమ్మ, ఉసిరి, జామ, నారింజ.
3. విటమిన్ D:
విటమిన్ D లోపం ఉన్నవారిలో ఐబిఎస్ వంటి సమస్యలు ఎక్కువగా కనిపిస్తున్నాయని పరిశోధనలు చెబుతున్నాయి. ఇది పేగుల్లో మంటను తగ్గించి, పేగు క్యాన్సర్ రాకుండా రక్షిస్తుంది.
లభించే మార్గం: సూర్యరశ్మి, చేపలు, ఫోర్టిఫైడ్ మిల్క్.
4. విటమిన్ A:
జీర్ణకోశం లోపలి పొరలు ఆరోగ్యంగా ఉండటానికి విటమిన్ A అవసరం. ఇవి ఆహారం సాఫీగా కదలడానికి అంతే కాకుండా ఇన్ఫెక్షన్లు రాకుండా కాపాడతాయి.
లభించే ఆహారం: క్యారెట్, చిలగడదుంప, బొప్పాయి.
5. మెగ్నీషియం,జింక్ :
ఇవి విటమిన్లు కాకపోయినా, జీర్ణక్రియకు చాలా అవసరం. మెగ్నీషియం మలబద్ధకాన్ని తగ్గిస్తుంది. జింక్ జీర్ణ ఎంజైమ్ల ఉత్పత్తికి తోడ్పడుతుంది.
లభించే ఆహారం: డ్రై ఫ్రూట్స్, గింజలు, డార్క్ చాక్లెట్.
6. ప్రోబయోటిక్స్:
మన పేగుల్లో ఉండే మంచి బ్యాక్టీరియాను పెంచడానికి ప్రోబయోటిక్స్ అవసరం. ఇవి జీర్ణక్రియను వేగవంతం చేసి, పొట్ట ఉబ్బరాన్ని తగ్గిస్తాయి.
లభించే ఆహారం: పెరుగు, మజ్జిగ, పులియబెట్టిన ఆహార పదార్థాలు.
జీర్ణక్రియ బాగుండాలంటే మరికొన్ని చిట్కాలు:
నీరు పుష్కలంగా తాగాలి: నీరు తక్కువైతే విటమిన్లు సరిగ్గా పనిచేయవు , మలబద్ధకం వస్తుంది.
నమిలి తినండి: ఆహారాన్ని బాగా నమిలి తినడం వల్ల లాలాజలంలోని ఎంజైమ్లు జీర్ణక్రియను సులభం చేస్తాయి.
ఒత్తిడి తగ్గించుకోండి: మన మెదడుకి, పొట్టకి దగ్గర సంబంధం ఉంటుంది. ఒత్తిడి వల్ల కూడా జీర్ణ సమస్యలు వస్తాయి.
జీర్ణ సమస్యలు కేవలం కడుపునొప్పికి మాత్రమే పరిమితం కావు, అవి మొత్తం శరీరంపై ప్రభావం చూపుతాయి. పైన చెప్పిన విటమిన్లు కలిగిన ఆహారాన్ని మీ డైట్లో భాగం చేసుకుంటే.. మీ పొట్ట ఎప్పుడూ ప్రశాంతంగా ఉంటుంది. ఒకవేళ సమస్య తీవ్రంగా ఉంటే మాత్రం సప్లిమెంట్స్ వాడే ముందు డాక్టరును సంప్రదించడం మర్చిపోకండి!
Share
Today Horoscope in Telugu: రాశి ఫలితాలు మే 02: ఆ రాశి వారికి అకస్మిక ధన నష్టం - వారికి ప్రయాణాలలో ఇబ్బందులు
Today Movies in TV : శనివారం సినీ ప్రియులకు పండగే.. వీటిని అస్సలు మిస్ చెయ్యకండి..
