Winter Skin Care: చలికాలంలో చర్మం రంగు మారుతుందా ? ఈ టిప్స్‌ పాటిస్తే ప్రాబ్లమ్ సాల్వ్

Winter Skin Care: చలికాలం వచ్చిందంటే చాలు.. వాతావరణంలో తేమ తగ్గి, గాలి పొడిగా మారుతుంది. ఇది మన చర్మంపై చాలా ఎక్కువ ప్రభావాన్ని చూపుతుంది. చాలా మందికి ఈ సమయంలో చర్మం పొడిబారడం, పగుళ్లు రావడం, దురద వంటి సమస్యలు కూడా ఎదురవుతాయి. అంతేకాదు.. ముఖం రంగు మారడం (లేదా కాంతి తగ్గడం) కూడా చాలా మందిలో కనిపించే సాధారణ మార్పు. ఇంతకీ చలికాలంలో చర్మం రంగు ఎందుకు మారుతుంది. ఈ సమయంలో గ్లోయింగ్ స్కిన్ కోసం ఎలాంటి టిప్స్ పాటించాలనే విషయాలను గురించిన పూర్తి వివరాలను ఇప్పుడు తెలుసుకుందాం.

చర్మం రంగు ఎందుకు మారుతుంది ?
చలికాలంలో ముఖం రంగు మారడానికి లేదా చర్మం కాంతి తగ్గడానికి కారణాలు:

తేమ లేకపోవడం: పొడి గాలి కారణంగా చర్మంలోని సహజ నూనెలు (సెబమ్) తగ్గి, తేమ త్వరగా ఆవిరైపోతుంది. తేమ లేకపోవడం వల్ల చర్మం నిస్తేజంగా, నిర్జీవంగా కనిపిస్తుంది. అంతే కాకుండా దాని సహజ రంగు మసకబారుతుంది.

పొడిబారడం (డ్రైనెస్): చర్మం బాగా పొడిబారినప్పుడు, చర్మం ఉపరితలంపై డెడ్ స్కిన్ సెల్స్ పేరుకుపోతాయి. ఈ పేరుకు పోయిన పొర కారణంగా చర్మం కాంతిని కోల్పోయి.. నల్లబడినట్లు లేదా ముదురు రంగులో కనిపిస్తుంది.

ఎర్రబారడం: కొంతమందికి చల్లటి గాలికి, వేడి నీటి స్నానాలకు చర్మం సున్నితంగా మారి ఎర్రబడుతుంది. ఈ ఎరుపుదనంతో పాటు చర్మం అసహజంగా కనిపిస్తుంది.

గ్లోయింగ్ స్కిన్ కోసం పాటించాల్సిన ముఖ్యమైన టిప్స్:
ముఖం రంగు మారకుండా.. చలికాలంలో కూడా మీ చర్మం నిగారింపుతో మెరవాలంటే.. ఈ సులభమైన చిట్కాలను తప్పక పాటించాలి.

1. మాయిశ్చరైజర్ తప్పనిసరి:
హైడ్రేటింగ్ క్లెన్సర్: ముఖం శుభ్రం చేసుకోవడానికి సబ్బుకు బదులుగా.. హైడ్రేటింగ్ (తేమను ఇచ్చే) లేదా క్రీమ్ ఆధారిత క్లెన్సర్ వాడండి.ఇది చర్మాన్ని శుభ్రపరుస్తుంది.కానీ సహజ నూనెలను తొలగించకుండా చేస్తుంది.

చిక్కటి మాయిశ్చరైజర్: చలికాలంలోలోషన్లకు బదులుగా.. సిరామైడ్స్, షియా బట్టర్ లేదా హైలురోనిక్ యాసిడ్ వంటి పదార్థాలు ఉన్న చిక్కటి (ఎక్కువ క్రీమీగా ఉండే) మాయిశ్చరైజర్‌ను ఉపయోగించండి. స్నానం చేసిన వెంటనే.. చర్మం కొద్దిగా తేమగా ఉన్నప్పుడే దీనిని అప్లై చేయడం ఉత్తమం.

నైట్ స్కిన్ కేర్: నిద్రపోయే ముందు.. ముఖానికి కొద్దిగా ఫేషియల్ ఆయిల్ (ఉదాహరణకు, బాదం నూనె లేదా ఆలివ్ నూనె) లేదా నైట్ క్రీమ్ రాసుకుంటే, రాత్రంతా చర్మం రిపేర్ అయ్యి, ఉదయం తాజాగా కనిపిస్తుంది.

2. వేడి నీటిని తగ్గించండి:
చలిగా ఉందని మరీ వేడి నీటితో స్నానం చేయడం లేదా ముఖం కడగడం చేయకూడదు. అధిక వేడి చర్మంలోని తేమను తొలగిస్తుంది. గోరువెచ్చని నీటిని మాత్రమే ఉపయోగించండి.

3. ఎక్స్‌ఫోలియేషన్:
చలికాలంలో చర్మం పొడిబారడం వల్ల డెడ్ స్కిన్ సెల్స్ పేరుకుపోతాయి. వాటిని తొలగించడానికి ఎక్స్‌ఫోలియేషన్ అవసరం. కానీ వారానికి ఒకటి లేదా రెండుసార్ల కంటే ఎక్కువగా చేయకూడదు. మరీ కఠినమైన స్క్రబ్‌లకు బదులుగా.. సున్నితమైన కెమికల్ ఎక్స్‌ఫోలియేటర్స్ వాడటం మంచిది.

Also Read: వీటిని పొరపాటున కూడా.. ఉడికించి తినొద్దు ! ఎందుకంటే ?

4. లోపలి నుంచి హైడ్రేషన్:
చర్మం బయట ఎంత మాయిశ్చరైజ్ చేసినా, లోపలి నుంచి హైడ్రేషన్ చాలా ముఖ్యం. రోజూ తగినంత నీరు తాగాలి. తాజా పండ్లు, కూరగాయలు, నట్స్ (ఉదా: బాదం) వంటి ఆరోగ్యకరమైన ఆహారం తీసుకోవడం వల్ల చర్మానికి అవసరమైన పోషకాలు అందుతాయి.

5. సన్‌స్క్రీన్ మర్చిపోకూడదు:
చలికాలంలో సూర్యుడు అంత ప్రకాశవంతంగా లేకపోయినా.. యూవీ కిరణాలు చర్మాన్ని దెబ్బతీస్తాయి. ఇవి చర్మం రంగు మారడానికి, వృద్ధాప్య ఛాయలు రావడానికి కారణమవుతాయి. కాబట్టి.. ఇంట్లో ఉన్నా, బయటకి వెళ్లినా SPF 30 లేదా అంతకంటే ఎక్కువ ఉన్న సన్‌స్క్రీన్‌ను తప్పకుండా వాడండి.