Summer Tips: ఎండాకాలంలో మీ ఇంటిని ఏసీ లేకుండానే చల్లగా ఉంచుకోండి ఇలా!

Summer Tips: వేసవి కాలం రాగానే భానుడి ప్రతాపానికి ఇళ్లు నిప్పుల కొలిమిలా మారుతుంటాయి. పెరిగిన ఉష్ణోగ్రతల నుంచి ఉపశమనం కోసం చాలామంది ఏసీలపై ఆధారపడతారు. అయితే.. రోజంతా ఏసీ వాడటం వల్ల కరెంట్ బిల్లులు భారీగా పెరగడమే కాకుండా, పర్యావరణానికి, ఆరోగ్యానికి కూడా అంత మంచిది కాదు. కేవలం కొన్ని చిన్న మార్పులు, సహజమైన పద్ధతుల ద్వారా ఎలాంటి ఖర్చు లేకుండానే మీ ఇంటి ఉష్ణోగ్రతను తగ్గించవచ్చు. పురాతన పద్ధతులు , చిట్కాలు కలగలిపి మీ ఇంటిని చల్లని స్వర్గధామంలా ఎలా మార్చుకోవాలో ఇప్పుడు తెలుసుకుందాం.

ఇంటిని చల్లబరిచే ముఖ్యమైన చిట్కాలు:
1. కిటికీలు, తలుపుల నిర్వహణ:
పగటిపూట ఎండ తీవ్రత ఎక్కువగా ఉన్నప్పుడు (ఉదయం 10 నుంచి సాయంత్రం 5 గంటల వరకు) కిటికీలు, తలుపులను మూసి ఉంచాలి. దీని వల్ల బయట ఉండే వేడి గాలి లోపలికి రాకుండా ఉంటుంది. కిటికీలకు లేత రంగు కర్టెన్స్ లేదా వెదురు తడికలు వాడటం వల్ల సూర్యరశ్మి నేరుగా ఇంట్లోకి రాదు. సాయంత్రం వేళల్లో గాలి చల్లబడిన తర్వాత కిటికీలు తెరిస్తే గాలి ప్రసరణ బాగుంటుంది.

2. క్రాస్ వెంటిలేషన్:
రాత్రి సమయాల్లో గాలి ఇంట్లోకి రావడానికి ఎదురెదురుగా ఉన్న కిటికీలను తెరవండి. దీని వల్ల లోపల ఉన్న వేడి గాలి బయటకు వెళ్లిపోయి.. చల్లని గాలి లోపలికి చేరుతుంది. ఇది సహజమైన కూలింగ్ ప్రక్రియలా పనిచేస్తుంది.

3. కాటన్ బెడ్ షీట్లు, కర్టెన్లు:
సింథటిక్ బట్టలు వేడిని పట్టి ఉంచుతాయి. కాబట్టి ఎండాకాలంలో కాటన్ (నూలు)బట్టలు, బెడ్ షీట్లు వాడటం శ్రేయస్కరం. అలాగే కిటికీలకు ఉన్న కర్టెన్లపై కొద్దిగా నీళ్లు చిలకరిస్తే.. బయటి గాలి ఆ తడిని తగిలి ఇంట్లోకి చల్లగా వస్తుంది.

4. ఎగ్జాస్ట్ ఫ్యాన్ల వాడకం:
వంట గదిలో , బాత్‌రూమ్‌లలో ఎగ్జాస్ట్ ఫ్యాన్లను వాడటం వల్ల లోపల పేరుకుపోయిన వేడి గాలి, ఆవిరి త్వరగా బయటకు వెళ్లిపోతాయి. వంట చేసేటప్పుడు వీలైనంత వరకు వేడి తక్కువగా వెలువడే పద్ధతులను పాటించడం మంచిది.

5. ఇండోర్ ప్లాంట్స్ (మొక్కలు):
ఇంట్లో మొక్కలను పెంచడం వల్ల గాలి శుద్ధి అవ్వడమే కాకుండా ఉష్ణోగ్రత కూడా తగ్గుతుంది. కలబంద, స్నేక్ ప్లాంట్,మనీ ప్లాంట్ వంటివి గాలిలోని తేమను పెంచి వాతావరణాన్ని చల్లగా ఉంచుతాయి.

6. లైటింగ్ , ఎలక్ట్రానిక్ వస్తువులు:
సాధారణ బల్బులు ఎక్కువ వేడిని విడుదల చేస్తాయి. వాటి స్థానంలో LED బల్బులను వాడండి. అలాగే అనవసరంగా టీవీలు, కంప్యూటర్లు, ఇతర ఎలక్ట్రానిక్ వస్తువులను ఆన్ చేసి ఉంచకండి. ఎందుకంటే అవి కూడా వేడిని ఉత్పత్తి చేస్తాయి.స

Also Read: మీ పాదాలు అందంగా, ఆరోగ్యంగా ఉండాలా ? ఈ సింపుల్ ఫుట్ కేర్ మీకోసమే..

7. టెర్రస్ కూలింగ్:
మీరు సొంత ఇంటిలో ఉంటే,టెర్రస్ పైన తెల్లటి సున్నం పూయడం లేదా ‘హీట్ రిఫ్లెక్టివ్ పెయింట్’ వేయడం వల్ల సూర్యరశ్మి పరావర్తనం చెంది కింది గదులు చల్లగా ఉంటాయి. సాయంత్రం పూట మిద్దెపై నీళ్లు చల్లడం వల్ల కూడా రాత్రిపూట ఇల్లు చల్లగా ఉంటుంది.

ఏసీ ఇచ్చే చల్లదనం తాత్కాలికమే కావచ్చు. కానీ ఈ సహజ పద్ధతులు మీ ఇంటిని దీర్ఘకాలికంగా చల్లగా ఉంచుతాయి. పైన చెప్పిన చిన్న చిన్న జాగ్రత్తలు పాటిస్తే ఎండల నుంచి తప్పించుకోవచ్చు. అంతే కాకుండా ఎండలు ఎంత ఎక్కువగా ఉన్నా కూడా ఆరోగ్యంగా జీవించవచ్చు.