Foot care: మీ పాదాలు అందంగా, ఆరోగ్యంగా ఉండాలా ? ఈ సింపుల్ ఫుట్ కేర్ మీకోసమే..

Foot care: రోజంతా నడక, బిగుతుగా ఉండే షూస్ వేసుకోవడం వల్ల మన పాదాలు ఎంతో ఒత్తిడికి గురవుతాయి. మురికి, చెమట కారణంగా పాదాల దుర్వాసన, పగుళ్లు లేదా ఫంగల్ ఇన్ఫెక్షన్లు రావడం సహజం. వీటన్నింటికీ వంటింట్లో దొరికే వెనిగర్ , ఉప్పు ఒక అద్భుతమైన పరిష్కారం. ఈ రెండింటి మిశ్రమంతో పాదాలను కడగడం వల్ల కలిగే ఆరోగ్య ప్రయోజనాలు, అది పాదాల సౌందర్యాన్ని ఎలా మెరుగుపరుస్తుంది. అంతే కాకుండా వీటిని ఎప్పుడు, ఎలా ఉపయోగించాలో వివరంగా ఇప్పుడు తెలుసుకుందాం.

వెనిగర్, ఉప్పుతో పాదాల సంరక్షణ:
పాదాల ఆరోగ్యాన్ని కాపాడుకోవడానికి “ఫుట్ సోక్” (పాదాలను నీటిలో నానబెట్టడం) ఒక ప్రాచీన పద్ధతి. వెనిగర్ , ఉప్పు కలిపిన నీరు ఎలా పని చేస్తుందంటే..

1. ఫంగల్ ఇన్ఫెక్షన్ల నివారణ:
వెనిగర్‌లో ఉండే ఎసిటిక్ యాసిడ్ సహజ సిద్ధమైన యాంటీ-మైక్రోబియల్ గుణాలను కలిగి ఉంటుంది. ఇది ‘అథ్లెట్స్ ఫుట్’ వంటి ఫంగల్ ఇన్ఫెక్షన్లను తగ్గిస్తుంది. గోళ్ల మధ్య ఉండే ఫంగస్‌ను తొలగించడంలో ఇది చాలా ప్రభావవంతంగా పనిచేస్తుంది.

2. పాదాల దుర్వాసనను తొలగిస్తుంది:
చెమట వల్ల పాదాలపై బ్యాక్టీరియా చేరుతుంది. దీని వల్ల దుర్వాసన వస్తుంది. వెనిగర్ పాదాల చర్మం యొక్క pH స్థాయిని సమతుల్యం చేస్తుంది. ఇది బ్యాక్టీరియా పెరగకుండా అడ్డుకుంటుంది. తద్వారా దుర్వాసన పూర్తిగా తొలగిపోతుంది.

3. మృతకణాల తొలగింపు :
వెనిగర్ చర్మాన్ని మృదువుగా చేస్తుంది. అలాగే ఉప్పు (ముఖ్యంగా ఎప్సమ్ సాల్ట్ లేదా కల్లు ఉప్పు) స్క్రబ్బర్‌లా పనిచేస్తుంది. ఈ మిశ్రమంలో పాదాలను నానబెట్టినప్పుడు, పాదాల కింద ఉండే గట్టి చర్మం, పగుళ్లు , మృతకణాలు సులభంగా తొలగిపోయి పాదాలు మృదువుగా మారతాయి.

4. నొప్పి, అలసట నుంచి ఉపశమనం:
ఉప్పు నీటిలో పాదాలను ఉంచడం వల్ల రక్త ప్రసరణ మెరుగుపడుతుంది. రోజంతా నిలబడి పనిచేసే వారికి లేదా నొప్పులతో బాధపడేవారికి ఈ పద్ధతి తక్షణ ఉపశమనాన్ని ఇస్తుంది.ఇది కండరాల ఒత్తిడిని తగ్గిస్తుంది.

దీన్ని ఎప్పుడు , ఎలా చేయాలి ?
ఈ పద్ధతిని వారానికి ఒకటి లేదా రెండు సార్లు పాటించడం ఉత్తమం.

Also Read: ఎండలు పెరిగితే కిడ్నీలో రాళ్లు ఎందుకు వస్తాయి? తప్పక తెలుసుకోవాల్సిన విషయాలు

తయారీ విధానం:

ఒక వెడల్పాటి టబ్ లో గోరు వెచ్చని నీటిని తీసుకోండి.

అందులో ఒక కప్పు వెనిగర్ (యాపిల్ సైడర్ వెనిగర్ లేదా వైట్ వెనిగర్) కలపండి.

అర కప్పు ఉప్పు (కల్లు ఉప్పు లేదా ఎప్సమ్ సాల్ట్) వేసి బాగా కలపండి.

మీ పాదాలను ఈ నీటిలో 15 నుంచి 20 నిమిషాల పాటు నాన బెట్టండి.

ఆ తర్వాత మెత్తటి బ్రష్‌తో పాదాలను రుద్ది, మంచినీటితో కడిగి ఆరబెట్టండి. చివరగా మాయిశ్చరైజర్ రాయడం మర్చిపోకండి.

మీ పాదాలపై పెద్ద గాయాలు, తీవ్ర మైన పుండ్లు ఉన్నప్పుడు వెనిగర్ ఉపయోగించకండి. ఎందుకంటే ఇది మంటను కలిగిస్తుంది. డయాబెటీస్ ఉన్నవారు నీటి ఉష్ణోగ్రత విషయంలో జాగ్రత్తగా ఉండాలి. వీరు ఏదైనా కొత్త చిట్కా పాటించే ముందు డాక్టర్‌ ని సంప్రదించడం మంచిది.

Share

• 
• 
• 
• 
• 
•