Oil for Hair: నూనె రాయడం వల్ల జుట్టు ఒత్తుగా పెరుగుతుందనేది ఎంతవరకు నిజం? శాస్త్రీయ ఆధారాలతో సమాధానం ఇదిగో..

Oil for Hair: మన అమ్మమ్మ నుంచి అమ్మ వరకూ తరచూ చెప్పే మాటేంటంటే.. జుట్టుకు ఆయిల్ రాసుకో, లేదంటే జుట్టు పెరగదు అని చెబుతుంటారు. కానీ వైద్య నిపుణులు మాత్రం ఆయిల్ రాసుకుంటే జుట్టు ఒత్తుగా పెరుగుతుందనే నమ్మకాన్ని ఓ అపోహ గానే కొట్టిపారేశారు. తలకు నూనె రాయడం వల్ల జుట్టు ఒత్తుగా పెరుగుతుంది అనడానికి ఎలాంటి శాస్త్రీయ ఆధారాలు లేవని తాజా అధ్యయనం స్పష్టం చేసింది.

నూనె ఒక్కటే కారణం కాదు:

నిజానికి జుట్టు యొక్క ఆరోగ్యం.. మనలోని జన్యువులు, తీసుకునే పౌష్టికాహారం, జీవనశైలిపై ఆధారపడి ఉంటుందని చెబుతున్నారు. పాతకాలం మనుషుల్లో జుట్టు బలంగా, ఒత్తుగా పెరగడానికి కారణం వాళ్లు అనుసరించిన స్వచ్ఛమైన ఆహారమే తప్ప.. నూనె కాదని స్పష్టం చేశారు. నూనె అనేది కేవలం జుట్టుకు ఒక సహజమైన కండీషనర్‌లా పనిచేస్తుంది. దీంతో వెంట్రుకలు మెరిస్తూ, చిక్కుపడకుండా మృదువుగా తయారవుతుందని చెబుతున్నారు.

Also Read: పిల్లల్లో మొబైల్ వ్యసనానికి చెక్ పెట్టాలా? పేరెంట్స్ పాటించాల్సిన సింపుల్ టిప్స్ ఇవే!

అలాంటి వాళ్లు నూనె రాసుకుంటే:

కొన్ని రకాల ఆరోగ్య సమస్యలున్న వాళ్లు తరచూ జుట్టుకు ఆయిల్ రాసుకోవడం వలన మరిన్ని కష్టాలు తెచ్చుకుంటారని వైద్యులు హెచ్చరించారు. ముఖ్యంగా తలలో చుండ్రు ఉన్నవాళ్లు నూనె రాసుకుంటే.. అది చుండ్రును మరింత పెంచి దురదకు కారణమవుతుంది. అలాగే ముఖంపై ఎక్కువగా మొటిమలు ఉన్నవారు, సెబోర్హెయిక్ డెర్మటైటిస్ వంటి సమస్యలు ఉన్నవారు ఆయిల్‌కు దూరంగా ఉండాలట.

అరగంట చాలు:

ఒకవేళ నూనె రాసే అలవాటు ఉంటే.. తలస్నానానికి కేవలం 30 నిమిషాల ముందు మాత్రమే రాసుకోవాలని చెబుతున్నారు. అలా కాదని రాత్రంతా ఉంచడం వల్ల చుండ్రు, జుట్టురాలే సమస్య ఎక్కువ అవుతుందని చెబుతున్నారు. జుట్టు రాలడం వంటి సమస్యలు ఎక్కువగా ఉంటే.. ఆయిల్స్ మీద ఆధారపడకుండా, సరైన వైద్య చికిత్స తీసుకోవడమే ఉత్తమం అని సూచిస్తున్నారు.

Also Read: మితంగా తాగినా ముప్పేనా? నోటి క్యాన్సర్‌పై శాస్త్రవేత్తల సంచలన హెచ్చరిక!