Eating Fast: టైం లేదని త్వరగా తింటున్నారా ? మీ జీర్ణవ్యవస్థ పడుతున్న ఇబ్బందులు తెలుసుకోండి

Fast Eating : నేటి ఉరుకుల పరుగుల జీవితంలో మనకు దేనికీ తీరిక ఉండటం లేదు. కనీసం ప్రశాంతంగా కూర్చుని భోజనం చేయడానికి కూడా సమయం కేటాయించలేకపోతున్నాం. ఆఫీసు పనుల ఒత్తిడిలోనో లేదా టీవీ, ఫోన్లు చూస్తూనో చాలా మంది ఆహారాన్ని నమలడం మానేసి నేరుగా మింగేస్తుంటారు. అయితే.. ఇలా వేగంగా తినడం వల్ల మనకు తెలియకుండానే అనేక తీవ్రమైన ఆరోగ్య సమస్యలను కొని తెచ్చుకుంటున్నాము. ఆహారం తీసుకునే వేగం మన శరీర బరువును, జీర్ణక్రియను , హార్మోన్ల సమతుల్యతను ఎలా ప్రభావితం చేస్తుందో ఇప్పుడు వివరంగా తెలుసుకుందాం.

వేగంగా తినడం.. మీ ఆరోగ్యానికి ఒక నిశ్శబ్ద శత్రువు:
“అన్నం పరబ్రహ్మ స్వరూపం” అని మన పెద్దలు చెబుతుంటారు. ఆహారాన్ని గౌరవించి, నిమ్మళంగా నమిలి తినడం వల్ల ఆ శక్తి మన శరీరానికి పూర్తి స్థాయిలో అందుతుంది. కానీ.. ప్రస్తుత కాలంలో పది నిమిషాల్లో ముగించాల్సిన భోజనాన్ని రెండు నిమిషాల్లోనే ముగించేస్తున్నాం. ఈ ‘ఫాస్ట్ ఈటింగ్’ అలవాటు వల్ల కలిగే నష్టాలు ఇవే:

1. ఊబకాయం , బరువు పెరగడం:
మనం ఆహారం తిన్నప్పుడు.. కడుపు నిండిందనే సంకేతం మెదడుకు చేరడానికి దాదాపు 20 నిమిషాల సమయం పడుతుంది. మనం వేగంగా తిన్నప్పుడు, మెదడుకు ఆ సంకేతం అందేలోపే అవసరానికి మించి ఎక్కువ ఆహారాన్ని తినేస్తాం. దీని వల్ల శరీరంలోకి అదనపు కేలరీలు చేరి, అతి త్వరగా బరువు పెరగడానికి దారితీస్తుంది.

2. జీర్ణక్రియ సమస్యలు:
జీర్ణక్రియ అనేది నోటి నుంచే ప్రారంభమవుతుంది. ఆహారాన్ని బాగా నమిలినప్పుడు లాలాజలంలోని ఎంజైమ్లు కలిసి ఆహారం మెత్తగా మారుతుంది. వేగంగా తిన్నప్పుడు ఆహారం సరిగ్గా నలగదు. పెద్ద పెద్ద ముక్కలుగా కడుపులోకి వెళ్లడం వల్ల జీర్ణకోశంపై అదనపు భారం పడుతుంది. దీని వల్ల అజీర్తి, గ్యాస్, కడుపు ఉబ్బరం , ఎసిడిటీ వంటి సమస్యలు నిరంతరం వేధిస్తాయి.

3. ఇన్సులిన్ రెసిస్టెన్స్ ,డయాబెటిస్:
వేగంగా తినడం వల్ల రక్తంలో చక్కెర స్థాయిలు ఒక్కసారిగా పెరుగుతాయి. దీనిని నియంత్రించడానికి శరీరం ఎక్కువ ఇన్సులిన్‌ను విడుదల చేయాల్సి వస్తుంది. కాలక్రమేణా, ఇది ‘ఇన్సులిన్ రెసిస్టెన్స్’కు దారితీస్తుంది. ఫలితంగా టైప్-2 డయాబెటిస్ వచ్చే ప్రమాదం రెండింతలు పెరుగుతుందని పరిశోధనలు చెబుతున్నాయి.

4. మెటబాలిక్ సిండ్రోమ్:
వేగంగా తినే వారిలో మెటబాలిక్ సిండ్రోమ్ వచ్చే అవకాశం ఎక్కువ. ఇది అధిక రక్తపోటు (BP), కొలెస్ట్రాల్ పెరగడం, నడుము చుట్టూ కొవ్వు పేరుకుపోవడం వంటి సమస్యల సమాహారం. ఇవన్నీ కలిసి గుండె జబ్బులకు దారితీస్తాయి.

5. ఉక్కిరిబిక్కిరి కావడం:
వేగంగా మింగడం వల్ల ఆహారం శ్వాసనాళంలో చిక్కుకునే ప్రమాదం ఉంది. ముఖ్యంగా పిల్లలు, వృద్ధులలో ఇది ప్రాణాంతకంగా మారవచ్చు. సరిగ్గా నమలకపోవడం వల్ల ఆహారం గొంతులో అడ్డుపడి అసౌకర్యానికి గురి చేస్తుంది.

ఆరోగ్యకరంగా తినడం ఎలా?

32 సార్లు నమలండి: ప్రతి ముద్దను కనీసం 20 నుంచి 32 సార్లు నమలడం అలవాటు చేసుకోండి.

చిన్న ముద్దలు: పెద్ద పెద్ద ముద్దలకు బదులు చిన్న ముద్దలు తీసుకోండి.

Also Read: ఎండాకాలంలో ఎగ్స్ తింటున్నారా ? ఈ జాగ్రత్తలు తీసుకోకపోతే సమస్యలు తప్పవు

డిస్ట్రాక్షన్స్ వద్దు: భోజనం చేసేటప్పుడు మొబైల్ ఫోన్, టీవీ లేదా ల్యాప్‌టాప్ చూడటం మానేయండి. కేవలం ఆహారంపైనే దృష్టి పెట్టండి.

నీరు తాగడం: భోజనానికి అరగంట ముందు నీరు తాగండి. కానీ తింటున్నప్పుడు ఎక్కువగా తాగకండి.

సమయం కేటాయించండి: భోజనం కోసం కనీసం 20 నిమిషాల సమయాన్ని కేటాయించుకోండి.

మనం ఏమి తింటున్నామనేది ఎంత ముఖ్యమూ.. ఎలా తింటున్నామనేది కూడా అంతే ముఖ్యం. నిమ్మళంగా తినడం వల్ల ఆహారం రుచిని ఆస్వాదించడమే కాకుండా.. ఆరోగ్యంగా కూడా ఉండవచ్చు. కాబట్టి, నేటి నుంచే మీ భోజన వేగాన్ని తగ్గించి, సంపూర్ణ ఆరోగ్యం వైపు అడుగులు వేయండి.