టేస్టీ అండ్ స్పైసీ క్యాప్సికమ్ రైస్..నిమిషాల్లో తయారయ్యే రెసిపీ!

Capsicum rice recipe: రోజువారీ వంటకాలతో బోర్ కొట్టి, ఏదైనా కొత్తగా, కారంగా , రుచిగా తినాలనిపిస్తోందా? లేదా ఉదయాన్నే ఆఫీసులకు, పిల్లల స్కూల్ బాక్సులకు క్షణాల్లో తయారయ్యే వంటకం కోసం వెతుకుతున్నారా? అయితే మీకు ‘క్యాప్సికమ్ రైస్’ పర్ఫెక్ట్ ఛాయిస్! విటమిన్ సి , ఫైబర్ పుష్కలంగా ఉండే క్యాప్సికమ్‌తో చేసే ఈ ఘుమఘుమలాడే మసాలా రైస్ ఆరోగ్యానికి మంచిదే కాకుండా రుచిలోనూ నెక్స్ట్ లెవల్‌లో ఉంటుంది. చాలా తక్కువ సమయంలో అతి తక్కువ పదార్థాలతో రెస్టారెంట్ స్టైల్ క్యాప్సికమ్ రైస్ ఎలా తయారు చేసుకోవాలో ఇప్పుడు చూద్దాం.

నోరూరించే క్యాప్సికమ్ రైస్ తయారీ విధానం:

మసాలా ఫ్లేవర్‌తో కరకరలాడే క్యాప్సికమ్ ముక్కల కాంబినేషన్‌లో ఈ రైస్ తింటుంటే అమృతంలా ఉంటుంది. ఉదయం మిగిలిపోయిన అన్నంతో కూడా దీన్ని చాలా ఈజీగా ఇన్స్టెంట్‌గా చేసుకోవచ్చు.

కావలసిన పదార్థాలు:

వండిన అన్నం: 2 కప్పులు (పొడిపొడిగా ఉండాలి)

క్యాప్సికమ్ ముక్కలు: 1 కప్పు (సన్నగా పొడవుగా లేదా ముక్కలుగా కోసినవి)

ఉల్లిపాయ: 1 (సన్నగా తరిగినది)

పచ్చిమిర్చి: 2 (నిలువుగా కోసినవి)

అల్లం వెల్లుల్లి పేస్ట్: 1 టీస్పూన్

ఆవాలు, జీలకర్ర: అర టీస్పూన్ చొప్పున

పసుపు: పావు టీస్పూన్

కారం: 1 టీస్పూన్ (మీ రుచికి తగినంత)

గరం మసాలా: అర టీస్పూన్

ధనియాల పొడి: 1 టీస్పూన్

జీడిపప్పు: 8 నుండి 10 (ఆప్షనల్)

కరివేపాకు, కొత్తిమీర: తగినంత

నూనె లేదా నెయ్యి: 2 టేబుల్ స్పూన్లు

ఉప్పు: రుచికి సరిపడా

నిమ్మరసం: 1 టీస్పూన్

తయారీ పద్ధతి:

మసాలాను ఇంట్లోనే తయారు చేసుకోండి:
1 టేబుల్ స్పూన్ ధనియాలు, 1 టీస్పూన్ మినపప్పు, 1 టీస్పూన్ శనగపప్పు, 2 ఎండుమిర్చి, కొద్దిగా నువ్వులు మరియు కొబ్బరి తురుమును ప్యాన్ లో నూనె లేకుండా దోరగా వేయించి, చల్లారాక మిక్సీలో పొడి చేసి పెట్టుకోండి. ఈ మసాలా పొడి రైస్‌కు అద్భుతమైన రుచిని ఇస్తుంది.

ముందుగా పాన్ రెండు స్పూన్ల నూనె లేదా నెయ్యి వేసి వేడి చేయండి. నూనె వేడెక్కాక ఆవాలు, జీలకర్ర, జీడిపప్పు , కరివేపాకు వేసి దోరగా వేయించండి. జీడిపప్పు గోల్డెన్ బ్రౌన్ కలర్‌లోకి రాగానే మంచి సువాసన వస్తుంది. ఇప్పుడు తరిగిన ఉల్లిపాయలు, పచ్చిమిర్చి ముక్కలు వేసి ఉల్లిపాయలు మెత్తబడే వరకు వేయించండి. ఆ తర్వాత అల్లం వెల్లుల్లి పేస్ట్ వేసి పచ్చివాసన పోయే వరకు ఒక నిమిషం పాటు బాగా వేయించాలి. ఇప్పుడు కోసి పెట్టుకున్న క్యాప్సికమ్ ముక్కలను ప్యాన్ లో వేయండి. ఇందులో కొద్దిగా పసుపు, ఉప్పు వేసి కలిపి మూత పెట్టి మీడియం మంట మీద 3 నుండి 4 నిమిషాలు ఉడికించండి.

Also Read: ఇంట్లో కూరలు లేవా? 10 నిమిషాల్లో అప్పటికప్పుడు పచ్చి పులుసు చేసేయండి!

క్యాప్సికమ్ సగం ఉడికిన తర్వాత అందులో కారం, ధనియాల పొడి, గరం మసాలా , మనం ముందుగా తయారు చేసి పెట్టుకున్న సీక్రెట్ మసాలా పొడి వేసి బాగా కలపండి. మసాలాలన్నీ క్యాప్సికమ్ ముక్కలకు పట్టేలా ఒక నిమిషం వేయించండి. ఇప్పుడు ముందుగా వండి చల్లార్చిన పొడిపొడి అన్నాన్ని బాణలిలో వేసి, మసాలా మిశ్రమం అంతా అన్నానికి బాగా పట్టేలా మెల్లగా కలపండి. అన్నం విరిగిపోకుండా కింద నుంచి పైకి జాగ్రత్తగా కలపాలి. సన్నని మంట మీద రెండు నిమిషాలు మూత పెట్టి ఉంచండి. దీనివల్ల ఫ్లేవర్స్ అన్నీ అన్నానికి బాగా పడతాయి. చివరిగా స్టవ్ ఆఫ్ చేసి, పైనుంచి కొత్తిమీర చల్లుకుని, నిమ్మరసం పిండి బాగా కలిపితే వేడివేడి సువాసనల క్యాప్సికమ్ రైస్ సిద్ధం!

ఈ క్యాప్సికమ్ రైస్‌ను చల్లటి పెరుగన్నంతో లేదా చల్లటి రైతాతో నంజుకుని తింటే రుచి అద్భుతంగా ఉంటుంది.