Homemade Raisins| డ్రైఫ్రూట్స్ లో మంచి పోషక విలువలుంటాయి. పైగా ఇవి ఎక్కువ కాలం నిలువ కూడా ఉంటాయి. అందుకే అవి కాస్త ఖరీదు ఎక్కువ. ఈ డ్రైఫ్రూట్స్ లో ఎండుద్రాక్ష (కిస్మిస్) కూడా ఉంది. తీపి వంటకాల్లో రుచి పెంచడానికి ఎండుద్రాక్ష ఉపయోగపడుతుంది.
చాలా మంది ఆరోగ్యం కోసం ఎండుద్రాక్షనీళ్లు కూడా తాగుతారు. మార్కెట్లో 1 కిలో ఎండుద్రాక్షధర రూ.300 నుంచి రూ.400 వరకు ఉంటుంది. పైగా వీటిలో కెమికల్స్ ఉంటాయి. కానీ ఇంట్లోనే తాజా ద్రాక్షతో సులభంగా, రసాయనాలు లేకుండా ఎండుద్రాక్ష తయారు చేయవచ్చు. ఈ పద్ధతి చాలా చౌకగా, ఆరోగ్యకరంగా ఉంటుంది.
ముందు మంచి నాణ్యత గల తీపి ద్రాక్షను ఎంచుకోండి. పుల్లని ద్రాక్షతో చేస్తే ఎండుద్రాక్ష కూడా పుల్లగా వస్తుంది. పొడవైన ద్రాక్షతో పొడవైన కిస్మిస్, గుండ్రటి ద్రాక్షతో చిన్న గుండ్రటి ఎండుద్రాక్షవస్తాయి. సుమారు 1 కేజీ తాజా ద్రాక్ష తీసుకోండి. ద్రాక్ష దెబ్బతినకుండా శుభ్రంగా ఉండాలి.
ద్రాక్షను ముందు సాదా నీటితో 2-3 సార్లు బాగా కడగండి. ఒక గిన్నెలో నీళ్లు పోసి, రెండు టీస్పూన్ల బేకింగ్ సోడా కలపండి. ద్రాక్షను 10 నిమిషాలు ఈ నీళ్లలో ముంచి ఉంచండి. ఇలా చేస్తే దుమ్ము, కెమికల్స్ తొలగిస్తుంది. తర్వాత ద్రాక్ష తొలగించి, కాండాల నుంచి వేరు చేయండి. 5 నిమిషాలు ఆరనివ్వండి.
ఒక పెనంలో నీళ్లు పోసి వేడి చేయండి. దాని మీద స్ట్రైనర్ పెట్టండి. ద్రాక్షను స్ట్రైనర్లో ఉంచి, 5 నుంచి 7 నిమిషాలు కవర్ వేసి స్టీమ్ చేయండి. ద్రాక్ష కొంచెం పసుపు రంగులోకి మారి, మెత్తబడినప్పుడు తీసేయండి. ఎక్కువ స్టీమ్ చేయకండి, లేకపోతే ఎండుద్రాక్షనల్లబడుతుంది. ఈ దశ ద్రాక్ష ఆకారాన్ని మెరుగుపరుస్తుంది.
స్టీమ్ చేసిన ద్రాక్షను శుభ్రమైన గుడ్డపై సమానంగా వేయండి. రెండు రోజులు నేరుగా సూర్యరశ్మి పడే చోట ఆరబెట్టండి. రెండు రోజుల తర్వాత ఎండుద్రాక్ష పూర్తిగా ఆరిపోయిందా అని చూడండి. అవసరమైతే మరో రెండు రోజులు ఆరబెట్టండి. బాగా ఆరిన ఎండుద్రాక్ష కొంచెం ముడతలు పడి, గట్టిగా ఉంటుంది.
Also Read: వాకింగ్ చేసినా, తక్కువ ఆహారం తీసుకున్నా బరువు తగ్గడం లేదా? అసలు కారణం ఇదే
పూర్తిగా ఆరిన కిస్మిస్ను శుభ్రమైన ఎయిర్టైట్ డబ్బాలో ఉంచండి. ఎక్కువ కాలం తాజాగా ఉంచాలంటే ఫ్రిజ్లో భద్రపరచండి. ఇంట్లో తయారు చేసిన కిస్మిస్లో రసాయనాలు లేవు కాబట్టి బయట ఎక్కువ సేపు ఉంచకండి.
Share
ఏసీ గదిలో హాయిగా నిద్రపోతున్నారా? అయితే మీరు డేంజర్లో ఉన్నట్టే!
సినిమాలకు గుడ్ బై చెప్పనున్న త్రిష? హీరో సంచలన వ్యాఖ్యలు!
