Foot Swelling Causes: కాళ్లలో వాపుకు కారణాలు.. తెలిస్తే షాక్ అవుతారు

Foot Swelling Causes: పాదాల వాపు, దీనిని వైద్య పరిభాషలో ‘ఎడెమా’ అని పిలుస్తారు. శరీరంలోని కణజాలాలలో అదనపు ద్రవాలు పేరుకుపోవడం వల్ల ఈ పరిస్థితి ఏర్పడుతుంది. రోజంతా నిలబడి పనిచేయడం లేదా ఎక్కువ దూరం ప్రయాణించడం వంటి సాధారణ కారణాల వల్ల ఇది రావచ్చు. అయితే.. కొన్ని సందర్భాల్లో గుండె, కిడ్నీలు లేదా కాలేయ సంబంధిత వ్యాధుల వల్ల కూడా పాదాలు ఉబ్బవచ్చు. కాబట్టి.. వాపు వెనక ఉన్న అసలు కారణాన్ని గుర్తించి సరైన సమయంలో చికిత్స తీసుకోవడం ఎంతో ముఖ్యం.

పాదాల వాపుకు ప్రధాన కారణాలు:
1. జీవనశైలి, అలవాట్లు:
చాలా సేపు ఒకే చోట కూర్చోవడం లేదా నిలబడటం వల్ల గురుత్వాకర్షణ ప్రభావంతో రక్తం పాదాల వద్ద నిలిచిపోతుంది. దీని వల్ల వాపు వస్తుంది. అలాగే ఉప్పు ఎక్కువగా తీసుకోవడం వల్ల శరీరం నీటిని నిల్వ చేసుకుంటుంది. ఇది కూడా వాపుకు దారితీస్తుంది.

2. గర్భధారణ:
గర్భధారణ సమయంలో శరీరంలో హార్మోన్ల మార్పులు జరుగుతాయి. గర్భాశయం పెరిగే కొద్దీ రక్తనాళాలపై ఒత్తిడి పడి కాళ్లలో వాపు రావడం సహజం. అయితే.. అకస్మాత్తుగా తీవ్రమైన వాపు వస్తే అది ‘ప్రీ-ఎక్లాంప్సియా కావచ్చు.

3. గాయాలు:
చీలమండలంలో బెణుకులు లేదా ఎముకలకు గాయాలు అయినప్పుడు ఆ ప్రాంతంలో రక్త ప్రసరణ పెరిగి వాపు వస్తుంది. దీనిని తగ్గించడానికి ఐస్ ప్యాక్ పెట్టడం మంచిది.

4. దీర్ఘకాలిక అనారోగ్య సమస్యలు:

గుండె జబ్బులు: గుండె రక్తాన్ని సమర్థవంతంగా పంపింగ్ చేయలేనప్పుడు, ద్రవాలు కాళ్లలో పేరుకుపోతాయి.

మూత్రపిండాల వ్యాధి: కిడ్నీలు సరిగ్గా పనిచేయకపోతే.. శరీరంలోని అదనపు నీరు, ఉప్పు బయటకు వెళ్లవు.

కాలేయ సమస్యలు: కాలేయం దెబ్బతింటే ‘అల్బుమిన్’ అనే ప్రోటీన్ ఉత్పత్తి తగ్గి రక్తనాళాల నుంచి ద్రవం బయటకు వచ్చి వాపును కలిగిస్తుంది.

5. మందుల ప్రభావం:
బీపీ మందులు, స్టెరాయిడ్స్, యాంటీ డిప్రెసెంట్స్ , మధుమేహ మందుల వాడకం వల్ల కూడా కొందరిలో పాదాల వాపు కనిపిస్తుంది.

నివారణ మార్గాలు:

ఉప్పు తగ్గించడం: ఆహారంలో ఉప్పు పరిమాణాన్ని తగ్గించడం వల్ల.. శరీరంలో నీరు నిలవకుండా ఉంటుంది.

వ్యాయామం: క్రమం తప్పకుండా నడక లేదా కాళ్ల వ్యాయామాలు చేయడం వల్ల రక్త ప్రసరణ మెరుగుపడుతుంది.

పాదాలను ఎత్తులో ఉంచడం: పడుకునేటప్పుడు పాదాల కింద దిండు పెట్టుకుని, గుండె స్థాయి కంటే కొంచెం ఎత్తులో ఉంచడం వల్ల వాపు తగ్గుతుంది.

నీరు ఎక్కువగా తాగడం: తగినంత నీరు తాగడం వల్ల శరీరం అదనపు ఉప్పును బయటకు పంపివేస్తుంది.

కంప్రెషన్ సాక్స్: డాక్టర్ సలహాతో కంప్రెషన్ సాక్స్ ధరించడం వల్ల రక్త ప్రసరణ క్రమబద్ధీకరించబడుతుంది.

Join WhatsApp Channel

Share

• 
• 
• 
• 
• 
•