Nail Biting Side Effects: సైలెంట్ ఎనిమీ.. గోర్లు కొరకడం వల్ల శరీరంలోకి చేరే వేలకోట్ల బ్యాక్టీరియా గురించి మీకు తెలుసా?

Nail Biting Side Effects: చాలామందికి ఉండే కామన్ అలవాటు గోర్లు కొరకడం. ఏదైనా ఆలోచనలో పడినప్పుడు, టెన్షన్‌లో ఉన్నప్పుడు, ఖాళీగా కూర్చున్నా కూడా చేతివేళ్లు నేరుగా నోట్లోకి వెళ్తుంటాయి. అయితే, ఈ గోర్లు కొరికే చిన్న హాబిట్ వల్ల మన ఆరోగ్యానికి ఎంతో హాని తలపెడుతున్నామనే విషయాన్ని ప్రతి ఒక్కరూ గ్రహించాలి. దీనినే వైద్య పరిభాషలో ‘ఒనికోఫాగియా’ (Onychophagia) అని పిలుస్తారు. ఇది కేవలం ఒక అలవాటు అలవాటు మాత్రమే కాదు.. స్వయంగా మనమే మన శరీరంలోకి రోగాలను ఆహ్వానించే ఒక మార్గం. ఈ నేపథ్యంలో గోర్లు కొరకడం వలన కలిగే నష్టాలేమిటో తెలుసుకుందాం.

కంటికి కనిపించని విషం:

మన చేతులు రోజంతా రకరకాల వస్తువులను తాకుతుంటాయి. దానివల్ల గోళ్ల కింద వేల సంఖ్యలో బ్యాక్టీరియా, వైరస్‌లు తిష్ట వేస్తాయి. ఈ విషయంలో వైద్య నిపుణులు ఏం చెబుతున్నారంటే.. మనం గోర్లు కొరికిన ప్రతిసారీ, ఆ మురికి నేరుగా మన కడుపులోకి వెళ్తుందని, ఇది ఒక రకంగా విషాన్ని మన చేతుల ద్వారా మనమే తిన్నట్లు అవుతుందని హెచ్చరిస్తున్నారు.

Also Read: వీలైతే ఈ పండును రోజూ తినండి.. ఎంతటి మొండి వ్యాధులైనా పారిపోవాల్సిందే!

పొట్ట సంబంధిత సమస్యలు:

గోళ్ల ద్వారా శరీరంలోకి చేరే ‘కోలిఫామ్’ వంటి ప్రమాదకర బ్యాక్టీరియా వల్ల వికారం, వాంతులు, కడుపునొప్పి, అతిసారం వంటి సమస్యలు తలెత్తుతాయి. గోర్లు కొరికే అలవాటు అలాగే కొనసాగితే.. జీర్ణవ్యవస్థ శాశ్వతంగా దెబ్బతినే అవకాశం ఉంది. అంతేకాదు.. గోళ్ల చుట్టూ ఉండే చర్మం ఎర్రగా కమిలిపోయి, చీము పట్టి ‘పరోనిచియా’ అనే ఇన్ఫెక్షన్‌కు కూడా దారితీయొచ్చు.

అనేక సమస్యలకు దారి తీయొచ్చు:

గోర్లు కొరకడం వలన కేవలం చేతి వేళ్లే కాదు.. మీ పళ్లు కూడా పాడవుతాయి. ఈ చిన్న అలవాటు మీ పళ్లపై ఉండే రక్షణ కవచాన్ని దెబ్బతీడమే కాకుండా.. పళ్ల అమరికను వంకరగా మార్చే ప్రమాదం కూడా ఉంటుంది. అలాగే చిగుళ్లలో వాపు, రక్తస్రావంతో పాటు నోటి దుర్వాసనకు కూడా కారణమవుతుంది.