Health issues symptoms: మీకు తెలియకుండానే.. మీ ఆరోగ్యం దెబ్బతింటోందని చెప్పే సంకేతాలివే..

Health issues symptoms: చాలా సార్లు మనకు ఒంట్లో ఏదో తేడాగా అనిపిస్తుంది. కానీ అది పెద్ద సమస్య కాదని సర్దుకుపోతుంటాం. తలనొప్పి వస్తే టాబ్లెట్ వేసుకోవడం, అలసటగా ఉంటే.. కాఫీ తాగడం వంటివి చేసి తాత్కాలికంగా ఉపశమనం పొందుతాం. అయితే.. మన శరీరం లోపల ఏదో లోపం ఉందని చెప్పడానికి కొన్ని ‘నిశ్శబ్ద సంకేతాలను’ పంపుతుంది. వీటిని సకాలంలో గుర్తించకపోతే.. అవి భవిష్యత్తులో తీవ్రమైన వ్యాధులుగా మారే ప్రమాదం ఉంది. అసలు మనం అస్సలు నిర్లక్ష్యం చేయకూడని ఆ దాగి ఉన్న లక్షణాలు ఏంటో ఇప్పుడు తెలుసుకుందాం.

ఆరోగ్య సమస్యలు – గుర్తించాల్సిన లక్షణాలు:
మనం ఆరోగ్యంగా ఉన్నామని అనుకుంటాం కానీ.. లోపల ఏదో ఒక ప్రక్రియ సరిగ్గా జరగకపోవచ్చు. ఈ కింది లక్షణాలు మీలో కనిపిస్తుంటే ఒక్కసారి ఆలోచించాల్సిందే.

1. నిరంతర అలసట:
రోజంతా పని చేసి అలసిపోవడం వేరు. కానీ ఏ పనీ చేయకపోయినా.. తగినంత నిద్ర పోయినా కూడా విపరీతమైన నీరసంగా ఉండటం వేరు. ఇది కేవలం పని ఒత్తిడి వల్ల మాత్రమే కాదు. శరీరంలో రక్తహీనత, థైరాయిడ్ సమస్యలు, లేదా విటమిన్ డి/బి12 లోపం ఉన్నప్పుడు ఇలాంటి అలసట వస్తుంది. గుండె సంబంధిత సమస్యలు ప్రారంభ దశలో.. ఉన్నప్పుడు కూడా మెట్లు ఎక్కినా లేదా కొంచెం దూరం నడిచినా ఆయాసం, అలసట వస్తుంటాయి.

2. చర్మం, గోళ్లలో మార్పులు:
మన చర్మం మన అంతర్గత ఆరోగ్యానికి అద్దం పడుతుంది. అకస్మాత్తుగా ముఖంపై మొటిమలు పెరగడం, చర్మం పొడిబారడం లేదా గోళ్లు పెళుసుగా మారి విరిగిపోవడం వంటివి జరిగితే అది హార్మోన్ల అసమతుల్యతకు లేదా పోషకాహార లోపానికి సంకేతం. గోళ్లపై తెల్లటి మచ్చలు లేదా రంగు మారడం వంటివి కాలేయం లేదా కిడ్నీ సమస్యలను సూచించవచ్చు.

3. అకస్మాత్తుగా బరువు పెరగడం లేదా తగ్గడం:
మీ ఆహారపు అలవాట్లలో ఎలాంటి మార్పు లేకపోయినా.. అకస్మాత్తుగా బరువు తగ్గడం లేదా పెరగడం జరిగితే అది ఒక హెచ్చరిక. వేగంగా బరువు తగ్గడం అనేది డయాబెటిస్ (మధుమేహం), క్యాన్సర్ లేదా జీర్ణ క్రియ సమస్యలకు సంకేతం కావచ్చు. అదేవిధంగా.. అకస్మాత్తుగా బరువు పెరగడం అనేది థైరాయిడ్ గ్రంధి పని తీరు మందగించడం లేదా శరీరంలో నీరు చేరడం వల్ల కావచ్చు.

4. నిద్రలేమి, మానసిక ఆందోళన:
రాత్రిపూట సరిగ్గా నిద్ర పట్టకపోవడం కేవలం ఆలోచనల వల్ల మాత్రమే కాదు. శరీరంలో మెగ్నీషియం లోపం ఉన్నప్పుడు లేదా ఒత్తిడిని పెంచే ‘కార్టిసాల్’ హార్మోన్ స్థాయిలు పెరిగినప్పుడు నిద్ర కరువవుతుంది. అలాగే.. చిన్న విషయానికే కోపం రావడం, చిరాకుగా ఉండటం అనేది మెదడుకు అందాల్సిన పోషకాలు అందడం లేదని లేదా తీవ్రమైన మానసిక ఒత్తిడిలో ఉన్నారని అర్థం.

5. చిగుళ్ల నుంచి రక్తం:
మనం నోటి ఆరోగ్యాన్ని తరచుగా నిర్లక్ష్యం చేస్తాం. బ్రష్ చేసినప్పుడు చిగుళ్ల నుంచి రక్తం రావడం అనేది కేవలం పంటి సమస్య మాత్రమే కాదు. ఇది శరీరంలో విటమిన్ సి లోపం లేదా శరీరంలో ఎక్కడో ‘ఇన్ఫ్లమేషన్’ (వాపు) జరుగుతోందని చెప్పడానికి సంకేతం. నోటి ఆరోగ్యం సరిగ్గా లేకపోతే అది గుండె జబ్బులకు కూడా దారి తీస్తుందని అనేక అధ్యయనాలు చెబుతున్నాయి.

జాగ్రత్తలు ఏంటి?
రెగ్యులర్ హెల్త్ చెకప్స్: ఏడాదికి కనీసం ఒకసారి మాస్టర్ హెల్త్ చెకప్ చేయించుకోవడం వల్ల లోపల ఉన్న సమస్యలను ప్రారంభ దశలోనే గుర్తించవచ్చు.

శరీరాన్ని గమనించండి: మీ శరీరంలో వచ్చే ఏ చిన్న మార్పునైనా ‘ఇది మామూలే కదా’ అని వదిలేయకండి.

సమతుల్య ఆహారం: జంక్ ఫుడ్ తగ్గించి, పండ్లు, కూరగాయలు , తగినంత నీరు తీసుకోవడం అలవాటు చేసుకోండి.