Buying House: ఇంటి అద్దెకు గుడ్‌బై.. పెళ్లికి ముందు హోమ్‌లోన్ తీసుకుంటున్న న్యూ జనరేషన్

Buying House: ఆధునిక సమాజంలో.. యువతరం తమ జీవిత లక్ష్యాలు, స్థిరత్వం గురించి కొత్తగా ఆలోచిస్తున్నారు. ఒకప్పుడు జీవితంలో ముఖ్యమైన ఘట్టాలుగా భావించిన ‘పెళ్లి, పిల్లలు’ అనే సంప్రదాయ క్రమాన్ని పక్కనపెట్టి, ‘ఇల్లు, ఆ తర్వాతే పెళ్లి’ అనే కొత్త ట్రెండ్‌ను అనుసరిస్తున్నారు. ముఖ్యంగా 27 ఏళ్ల యువతలో ఈ ధోరణి పెరుగుతోంది. పెళ్లి చేసుకోకుండానే.. తమ స్నేహితులతో లేదా భాగస్వాములతో కలిసి ఇళ్లను కొనుగోలు చేయడానికి ప్రాధాన్యత ఇస్తున్నారు. ఇందుకు గల కారణాలను గురించిన పూర్తి వివరాలను ఇప్పుడు తెలుసుకుందాం.

ఆర్థిక అవసరాలే ప్రధాన కారణం:

ఈ మార్పునకు వెనక బలమైన ఆర్థిక కారణాలు ఉన్నాయి.

పెరుగుతున్న ఇంటి ఖర్చులు: ప్రపంచ వ్యాప్తంగా రియల్ ఎస్టేట్ ధరలు విపరీతంగా పెరగడం, జీవన వ్యయం పెరగడం వల్ల, ఒంటరిగా ఇల్లు కొనుగోలు చేయడం లేదా అద్దె భరించడం చాలా మంది యువతకు భారంగా మారింది.

అందుబాటు ధర: ఇద్దరు లేదా అంతకంటే ఎక్కువ మంది కలిసి ఇల్లు కొనడం వల్ల డౌన్‌పేమెంట్, నెలవారీ ఈఎంఐలు, ఇతర ఖర్చులను పంచుకోవచ్చు. దీని వల్ల ప్రతి ఒక్కరిపై ఆర్థిక భారం తగ్గి, తక్కువ వయస్సులోనే సొంత ఇంటి కలను సాకారం చేసుకోవచ్చు. కో-బయింగ్ ద్వారా ఒక్కో బెడ్‌రూమ్‌కు అయ్యే ఖర్చు 40% నుంచి 60% వరకు తగ్గుతుందని కొన్ని నివేదికలు సూచిస్తున్నాయి.

పెట్టుబడిపై దృష్టి: పెళ్లి కంటే ముందుగానే ఒక ముఖ్యమైన ఆస్తిని (ఇల్లు) కొనుగోలు చేయడం ద్వారా.. వారు తమ ఆర్థిక స్థిరత్వాన్ని, భవిష్యత్తు కోసం పెట్టుబడిని నిర్మించుకోవడానికి అవకాశం లభిస్తుంది.

స్నేహం, బంధాలపై కొత్త దృక్పథం:

ఆర్థిక అవసరాలతో పాటు, సామాజిక దృక్పథంలో వచ్చిన మార్పులు కూడా ఈ ట్రెండ్‌కు దోహదపడుతున్నాయి.

పెళ్లి ఆలస్యం: నేటి యువత పెళ్లిని ఆలస్యం చేస్తున్నారు లేదా అసలు పెళ్లి చేసుకోకుండా సహజీవనం చేయడానికి మొగ్గు చూపుతున్నారు. దీనికితోడు.. సంప్రదాయ ‘కుటుంబం’ అనే భావన కంటే, తమకు తాముగా ఎంచుకున్న ‘స్నేహితుల కుటుంబం’ అనే భావనకు ఎక్కువ ప్రాధాన్యత ఇస్తున్నారు.

మానసిక స్థిరత్వం: స్నేహితులతో కలిసి ఉండటం ద్వారా ఒంటరితనం తగ్గుతుందని, ఇంటి పనులను, బాధ్యతలను పంచుకోవచ్చని, ఇది ఒక రకమైన సామాజిక, మానసిక స్థిరత్వాన్ని ఇస్తుందని భావిస్తున్నారు. పెళ్లి బంధంతో వచ్చే సంక్లిష్టతలు, ఒత్తిడి లేకుండానే.. సహకారాన్ని పొందాలని కోరుకుంటున్నారు.

ఆచరణాత్మక ఆలోచన: చాలా మంది యువతీయువకులు ఆచరణాత్మక ఆలోచనతో ఉన్నారు. అద్దెకు డబ్బు వృధా చేయకుండా.. తమ భాగస్వామి లేదా స్నేహితుడితో కలిసి ఇల్లు కొనడం అనేది ఒక పెట్టుబడితో కూడిన ‘తరువాత వివాహం’ అనే ఆలోచనకు మార్గంగా భావిస్తున్నారు.

Also Read: ఈ 5 పదార్థాలను మళ్ళీ మళ్లీ వేడి తింటున్నారా ? మీ ఆరోగ్యం ప్రమాదంలో పడ్డట్లే!

సవాళ్లు, పరిష్కారాలు:

పెళ్లి కాకుండా ఇల్లు కొనడం ఎంత సులువో, అందులో కొన్ని సవాళ్లు కూడా ఉన్నాయి. భాగస్వాముల మధ్య ఆర్థిక విభేదాలు, విడిపోవాల్సిన పరిస్థితి వస్తే ఆస్తిని పంచుకోవడం వంటి సమస్యలు తలెత్తే అవకాశం కూడా ఉంటుంది. అందుకే, చాలా మంది కో-బయర్‌లు తమ పెట్టుబడిని, ఎగ్జిట్ ప్లాన్‌ను స్పష్టంగా పేర్కొంటూ, న్యాయవాది సహాయంతో ఒక చట్టబద్ధమైన ఒప్పందాన్ని తయారు చేసుకుంటున్నారు.

27 ఏళ్ల యువత పెళ్లిని పక్కన పెట్టి ఇల్లు కొనడం అనేది కేవలం ఆర్థిక నిర్ణయం మాత్రమే కాదు, మారుతున్న సామాజిక ప్రాధాన్యతలు, జీవిత అద్దం పడుతోంది. సొంత ఆర్థిక స్థిరత్వాన్ని నిర్మించుకోవడం, సంప్రదాయాలకు అతీతంగా తమకు నచ్చిన బంధాలతో జీవించడం ఈ రెండూ నేటి యువతకు అత్యంత ముఖ్యం.