Socks: సాధారణంగా మనం బట్టల మీద చూపించే శ్రద్ధ సాక్సుల మీద చూపించము. కానీ, పాదాల ఆరోగ్యం మొత్తం మనం వేసుకునే సాక్సుల మీదే ఆధారపడి ఉంటుందని ఆరోగ్య నిపుణులు హెచ్చరిస్తున్నారు. రోజంతా సాక్సులు వేసుకోవడం వల్ల పాదాల వద్ద తేమ, చెమట చేరి బ్యాక్టీరియా, ఫంగస్ పెరగడానికి దారితీస్తుంది. ఇది కేవలం దుర్వాసనకే కాకుండా.. ఇన్ఫెక్షన్లకు కూడా కారణమవుతుంది. సాక్సులను ఎంత కాలానికి ఒకసారి మార్చాలి ,అలా చేయకపోతే వచ్చే అనారోగ్య సమస్యల గురించి వివరంగా తెలుసుకుందాం.
చాలా మంది ఒకసారి వేసుకున్న సాక్సులను రెండు మూడు రోజుల పాటు వాడుతుంటారు. ముఖ్యంగా చలికాలంలో చెమట పట్టదు కదా అని నిర్లక్ష్యం చేస్తారు. కానీ నిపుణుల అభిప్రాయం ప్రకారం.. ఇది చర్మ సంబంధిత సమస్యలకు దారితీస్తుంది.
1. రోజుకు ఒకసారి తప్పనిసరి:
ఆరోగ్య నిపుణుల ప్రాథమిక సూత్రం ఏమిటంటే.. ప్రతిరోజూ కనీసం ఒకసారి సాక్సులను మార్చాలి. మీరు రోజంతా ఆఫీసులోనో లేదా బయటో గడిపిన తర్వాత, ఇంటికి రాగానే ఆ సాక్సులను విప్పేసి పాదాలను శుభ్రం చేసుకోవాలి. సాక్సులు పాతవి కాకపోయినా.. వాటిలో మన కంటికి కనిపించని మృత చర్మ కణాలు, చెమట పేరుకుపోయి ఉంటాయి.
2. ఎప్పుడు రెండుసార్లు మార్చాలి ?
కొన్ని సందర్భాల్లో రోజుకు రెండు సార్లు సాక్సులు మార్చడం అవసరం.
జిమ్ లేదా వ్యాయామం: మీరు వర్కౌట్ చేసినప్పుడు పాదాలకు విపరీతంగా చెమట పడుతుంది. వ్యాయామం పూర్తయిన వెంటనే సాక్సులు మార్చకపోతే ‘అథ్లెట్స్ ఫుట్’ వంటి ఫంగల్ ఇన్ఫెక్షన్లు వచ్చే అవకాశం ఉంది.
అధిక చెమట: కొంతమందికి సహజంగానే పాదాలకు చెమట ఎక్కువగా పడుతుంది. అలాంటి వారు రోజుకు రెండు జతల సాక్సులను మార్చడం ఆరోగ్యకరం.
వర్షంలో తడిచినప్పుడు: సాక్సులు ఏ కారణం చేతనైనా తడిస్తే, వెంటనే వాటిని మార్చాలి. తేమగా ఉన్న సాక్సులలో బ్యాక్టీరియా రెట్టింపు వేగంతో పెరుగుతుంది.
3. సాక్సులు మార్చకపోతే వచ్చే నష్టాలు:
ఒకే జత సాక్సులను ఎక్కువ సేపు లేదా ఎక్కువ రోజులు వాడటం వల్ల ఈ క్రింది సమస్యలు రావచ్చు.
దుర్వాసన : చెమటలోని బ్యాక్టీరియా విచ్ఛిన్నం కావడం వల్ల తీవ్రమైన దుర్వాసన వస్తుంది.
ఫంగల్ ఇన్ఫెక్షన్లు: పాదాల వేళ్ల మధ్య దురద, పగుళ్లు ఏర్పడతాయి. గోళ్లలో ఫంగస్ చేరి గోళ్లు దెబ్బతింటాయి.
చర్మ సమస్యలు: పొక్కులు, రాషెస్ లేదా అలర్జీలు వచ్చే అవకాశం ఉంది.
4. సరైన సాక్సుల ఎంపిక కూడా ముఖ్యమే..
కేవలం మార్చడమే కాదు.. ఎలాంటి సాక్సులు వాడుతున్నామనేది కూడా ముఖ్యం.
కాటన్ సాక్సులు: ఇవి చెమటను బాగా పీల్చుకుంటాయి. అంతే కాకుండా గాలి తగిలేలా చేస్తాయి.
సింథటిక్ వద్దు: పాలిస్టర్ లేదా నైలాన్ సాక్సులు చెమటను పీల్చుకోవు. దీని వల్ల పాదాలు ఎప్పుడూ తడిగానే ఉంటాయి.
వెదురు సాక్సులు: ఇవి సహజంగానే యాంటీ-బ్యాక్టీరియల్ గుణాలను కలిగి ఉంటాయి.
Also Read: వంద ఏళ్లు బతకాలా ? అయితే మీ డైట్లో గుడ్డు ఉండాల్సిందే !
5. ఫుట్ కేర్ చిట్కాలు:
సాక్సులు వేసుకునే ముందు పాదాలు పూర్తిగా పొడిగా ఉండేలా చూసుకోవాలి.
ముఖ్యంగా వేళ్ల మధ్య భాగంలో తడి లేకుండా తుడుచుకోవాలి.
వాడిన సాక్సులను వేడి నీటిలో మంచి డిటర్జెంట్తో ఉతకాలి. అప్పుడే బ్యాక్టీరియా నశిస్తుంది.
Share
Banks Nationwide Strike: దేశవ్యాప్తంగా మంగళవారం బ్యాంకుల సమ్మె.. వెనక్కి తగ్గని ప్రభుత్వం
Macbook vs Windows Laptops: మ్యాక్బుక్ vs విండోస్ ల్యాప్టాప్స్.. వీడియో ఎడిటింగ్ కోసం ఏది బెస్ట్?
