Boiled Egg in Omelet Recipe: సాధారణ ఆమ్లెట్ కంటే కొంచెం విభిన్నంగా.. మరింత రుచికరంగా ఉండే ఈ ఉడికించిన ఎగ్ ఆమ్లెట్ రెసిపీ ప్రస్తుతం సోషల్ మీడియాలో బాగా ట్రెండ్ అవుతోంది. ఇది రుచిగా ఉండటమే కాకుండా.. తక్కువ సమయంలో చక్కటి ప్రోటీన్ బ్రేక్ ఫాస్ట్గా లేదా స్నాక్గా ఉపయోగపడుతుంది. ఎప్పుడూ తయారు చేసుకునే సాధారణ ఆమ్లెట్ కంటే ఈ ఎగ్ ఆమ్లెట్ రుచి కాస్త వెరైటీగా ఉంటుంది. మరి ఈ రెసిపీ తయారు చేయడానికి కావలసిన పదార్థాలు, తయారీ విధానం గురించి ఇప్పుడు తెలుసుకుందామా..
కావాల్సిన పదార్థాలు:
గుడ్లు- 3 మామూలు గుడ్లు + 2 ఉడికించిన గుడ్లు
ఉల్లిపాయ (చిన్న ముక్కలు)- 1 చిన్నది
పచ్చిమిర్చి (చిన్న ముక్కలు)-1-2
కొత్తిమీర (సన్నగా తరిగింది)-1 టేబుల్ స్పూన్
ఉప్పు- రుచికి సరిపడా
మిరియాల పొడి- 1/4 టీస్పూన్
ఆయిల్- 2 స్పూన్లు
కారం/చిల్లీ ఫ్లేక్స్ -చిటికెడు
తయారీ విధానం: ఉడికించిన గుడ్డు ఆమ్లెట్ తయారు చేయడానికి ప్రధానంగా రెండు దశలు ఉంటాయి. ముందుగా ఒక గిన్నె తీసుకుని.. అందులో 3 పచ్చి గుడ్లు పగలగొట్టి వేయండి. ఈ మిశ్రమంలో సన్నగా తరిగిన ఉల్లిపాయ ముక్కలు, పచ్చిమిర్చి, కొత్తిమీర వేయండి.అనంతరం రుచికి సరిపడా ఉప్పు, మిరియాల పొడి వేసి, ఆ మిశ్రమాన్ని బాగా కలపండి. మిశ్రమం పూర్తిగా నురుగు వచ్చే వరకు బాగా గిలకొట్టండి. ఇంతలో.. 2 ఉడికించిన గుడ్లను తీసుకుని.. వాటి పొట్టు తీసి, గుండ్రంగా లేదా సన్నగా పొడవాటి ముక్కలుగా కట్ చేసి సిద్ధంగా ఉంచండి.
అనంతరం మందపాటి అడుగున్న ఒక నాన్-స్టిక్ పాన్ లేదా పెనం తీసుకుని, మీడియం మంటపై వేడి చేయండి. పాన్లో ఒక టేబుల్ స్పూన్ నూనె లేదా వెన్న వేసి, పాన్ అంతా పడేలా తిప్పండి. ముందుగా సిద్ధం చేసుకున్న గుడ్డు మిశ్రమాన్ని సగం పాన్లో పోయండి. ఆమ్లెట్ గుండ్రంగా, సమానంగా ఉండేలా చూసుకోండి. ఆమ్లెట్ కొద్దిగా ఉడకడం ప్రారంభించిన వెంటనే.. దానిపై సిద్ధంగా ఉంచుకున్న ఉడికించిన గుడ్డు ముక్కలను ఆమ్లెట్ ఉపరితలంపై అక్కడక్కడా అమర్చండి. కావాలంటే, ఉడికించిన గుడ్ల పైన కొద్దిగా ఉప్పు, మిరియాల పొడి లేదా చిల్లీ ఫ్లేక్స్ చల్లండి. మిగిలిన సగం గుడ్డు మిశ్రమాన్ని తీసుకుని, ఉడికించిన గుడ్లు కవర్ అయ్యే విధంగా మెల్లగా వాటి పైన పోయండి. పాన్ పైన మూత పెట్టి.. 2-3 నిమిషాలు తక్కువ మంటపై ఉడికించండి. ఆమ్లెట్ అడుగు భాగం బాగా ఉడికిన తర్వాత, జాగ్రత్తగా దాన్ని మరొక వైపునకు తిప్పి, మరో 1-2 నిమిషాలు వేయించండి. ఆమ్లెట్ రెండు వైపులా బంగారు గోధుమ రంగులోకి వచ్చి, బాగా ఉడికిన తర్వాత దాన్ని ఒక ప్లేట్లోకి తీసుకోండి. వేడివేడిగా టమోటా కెచప్ లేదా మీకిష్టమైన చట్నీతో ఈ ట్రెండింగ్ ఉడికించిన గుడ్డు ఆమ్లెట్ను వడ్డించండి.
Share
Phone Tapping Case Update: ఫోన్ ట్యాపింగ్ కేసు.. సిట్ ముందు మాజీ సీఎం కేసీఆర్ ఓఎస్డీ
Andhra King Thaluka Movie Review : ఆంధ్ర కింగ్ తాలూకా రివ్యూ
