Women’s Day 2026: అంతర్జాతీయ మహిళా దినోత్సవం 2026.. చరిత్ర, ఈ ఏడాది ‘థీమ్’ ఇదే!

Women’s Day 2026: ప్రతి ఏటా మార్చి 8వ తేదీన ప్రపంచ వ్యాప్తంగా అంతర్జాతీయ మహిళా దినోత్సవాన్ని ఘనంగా జరుపుకుంటాం. ఇది కేవలం ఒక రోజు వేడుక మాత్రమే కాదు. శతాబ్దాలుగా మహిళలు తమ హక్కుల కోసం చేసిన పోరాటానికి గుర్తు. 2026లో కూడా మహిళల సాధికారత, సమానత్వం లక్ష్యంగా ప్రత్యేక థీమ్‌తో ఈ రోజును నిర్వహిస్తున్నారు. సమాజ గమనంలో మహిళల పాత్రను గుర్తిస్తూ.. వారి విజయాలను వేడుక చేసుకుంటూనే.. ఇంకా సాధించాల్సిన సమానత్వం గురించి చర్చించడానికి ఈ రోజు ఒక గొప్ప వేదికగా నిలుస్తుంది.

2026 థీమ్:
అంతర్జాతీయ మహిళా దినోత్సవం 2026 కోసం ఐక్యరాజ్యసమితి (UN) “Rights. Justice. Action. For ALL Women and Girls” హక్కులు. న్యాయం. కార్యాచరణ. అందరు మహిళలు, బాలికల కోసం అనే థీమ్‌ను ప్రకటించింది. దీంతో పాటు.. అంతర్జాతీయ మహిళా దినోత్సవ అధికారిక వెబ్‌సైట్ #GiveToGain అనే క్యాంపెయిన్‌ను నొక్కి చెబుతోంది. అంటే.. మహిళలకు మనం ఇచ్చే మద్దతు, అవకాశాలు తిరిగి సమాజానికే లాభాన్ని చేకూరుస్తాయని (మనం ఇస్తేనే పొందుతాం) దీని అర్థం.

చరిత్ర:
మహిళా దినోత్సవం వెనక ఒక పెద్ద పోరాట చరిత్ర ఉంది.

1908: న్యూయార్క్ నగరంలో సుమారు 15,000 మంది మహిళా కార్మికులు తక్కువ పని గంటలు, మెరుగైన జీతం, ఓటు హక్కు కోసం భారీ ప్రదర్శన చేశారు.

1910: కోపెన్‌హాగన్‌లో జరిగిన అంతర్జాతీయ మహిళా సదస్సులో ‘క్లారా జెట్కిన్’ అనే మహిళ అంతర్జాతీయ మహిళా దినోత్సవం జరుపుకోవాలనే ప్రతిపాదన తెచ్చారు.

1911: మొదటిసారిగా ఆస్ట్రియా, డెన్మార్క్, జర్మనీలలో ఈ దినోత్సవాన్ని జరుపుకున్నారు.

1975-77: ఐక్యరాజ్యసమితి అధికారికంగా మార్చి 8ని అంతర్జాతీయ మహిళా దినోత్సవంగా గుర్తించి, ప్రపంచ వ్యాప్తంగా ప్రాచుర్యం కల్పించింది.

ప్రాముఖ్యత:
మహిళా దినోత్సవం కేవలం శుభాకాంక్షలు చెప్పుకోవడానికే పరిమితం కాదు. దీనికి మూడు ప్రధాన లక్ష్యాలు ఉన్నాయి.

గుర్తింపు: రాజకీయం, ఆర్థికం, సామాజిక రంగాల్లో మహిళలు సాధించిన విజయాలను అభినందించడం.

అవగాహన: లింగ వివక్ష, వేతనాల్లో అసమానత, మహిళలపై హింస వంటి సమస్యల పట్ల సమాజాన్ని చైతన్యపరచడం.

సమానత్వం: పురుషులతో సమానంగా మహిళలకు అన్ని రంగాల్లో అవకాశాలు కల్పించేలా ప్రభుత్వాలను, సంస్థలను ప్రోత్సహించడం.

మహిళా దినోత్సవం రంగులు:
ఈ దినోత్సవానికి మూడు రంగులు చిహ్నంగా ఉన్నాయి.

పర్పుల్ : న్యాయం, గౌరవానికి గుర్తు.

ఆకుపచ్చ: ఆశకు సంకేతం.