Knee Pain: ముఫ్పై ఏళ్లకే కీళ్ల నొప్పులు ఎందుకు? మెట్లెక్కేటప్పుడు ఈ లక్షణాలు కనిపిస్తే జాగ్రత్త

ఇప్పటివరకు మోకాళ్ల నొప్పి అంటే వయసు పైబడిన వారికే వస్తుందని చాలా మంది భావించేవారు. కానీ ఇప్పుడు 30 ఏళ్ల వయసులోనే చాలామంది ఈ సమస్యతో ఇబ్బంది పడుతున్నారు. ముఖ్యంగా మెట్లు ఎక్కేటప్పుడు లేదా దిగేటప్పుడు నొప్పి రావడం చిన్న విషయం కాదని వైద్యులు హెచ్చరిస్తున్నారు. ఇది భవిష్యత్తులో పెద్ద మోకాళ్ల సమస్యలకు సంకేతం కావచ్చని చెబుతున్నారు. ఎక్కువసేపు కూర్చోవడం, ఒక్కసారిగా కఠినమైన వ్యాయామాలు చేయడం, బరువు పెరగడం వంటి కారణాలు మోకాళ్లపై ఒత్తిడి పెంచుతున్నాయని నిపుణులు చెబుతున్నారు.

ఈ లక్షణాలు కనిపిస్తే…
చాలామందికి మొదట చిన్న చిన్న లక్షణాలే కనిపిస్తాయి. మెట్లు దిగేటప్పుడు నొప్పి రావడం, ఎక్కువసేపు కూర్చున్న తర్వాత లేవగానే గట్టిగా అనిపించడం, మోకాళ్లలో చప్పుడు రావడం వంటి సమస్యలు కనిపించొచ్చు. కొందరికి నడిచేటప్పుడు లేదా స్క్వాట్స్ చేసే సమయంలో కూడా అసౌకర్యం ఉంటుంది. ఇవి పటెల్లోఫెమోరల్ పెయిన్ సిండ్రోమ్ వంటి సమస్యలకు సంకేతం కావచ్చని వైద్యులు చెబుతున్నారు. మొదట్లో ఎక్స్‌రే లేదా స్కాన్‌లో పెద్దగా కనిపించకపోయినా, లోపల కార్టిలేజ్ దెబ్బతినే అవకాశం ఉందని హెచ్చరిస్తున్నారు.

Also read: Curd: వేసవిలో ఈ స్పెషల్ పెరుగు వంటకాలు ఓసారి టేస్ట్ చేయండి

ఈ పనులు చేస్తే అంతే…
ప్రస్తుతం ఉద్యోగాల వల్ల చాలామంది రోజంతా కుర్చీల్లోనే కూర్చుంటున్నారు. శరీరానికి సరైన కదలిక లేకపోవడం వల్ల తొడ కండరాలు బలహీనపడుతున్నాయి. ఆ తర్వాత వీకెండ్‌లో ఒక్కసారిగా ఎక్కువ వ్యాయామాలు చేయడం మోకాళ్లపై ఒత్తిడిని పెంచుతోంది. సరైన వార్మప్ లేకుండా జిమ్ వ్యాయామాలు చేయడం, తప్పు విధానంలో వర్కౌట్స్ చేయడం కూడా ప్రమాదకరమని నిపుణులు చెబుతున్నారు. అలాగే అధిక బరువు ఉన్నవారిలో మోకాళ్లపై మరింత ఒత్తిడి పడుతుంది. సరైన షూస్ వాడకపోవడం కూడా సమస్యను పెంచవచ్చని వైద్యులు సూచిస్తున్నారు.

Also read: Acne: ఈ పండ్లు తిన్నారంటే మొటిమల సమస్య మరింత పెరిగిపోతుంది

మోకాళ్ల నొప్పిని చాలామంది మొదట పట్టించుకోరు. కొద్దిరోజుల్లో తగ్గిపోతుంది అని నిర్లక్ష్యం చేస్తుంటారు. కానీ ఇలా వదిలేస్తే భవిష్యత్తులో ఆస్టియోఆర్థరైటిస్ వంటి సమస్యలు వచ్చే ప్రమాదం ఉందని నిపుణులు హెచ్చరిస్తున్నారు. ఉదయం లేవగానే గట్టిగా అనిపించడం, నడిచేటప్పుడు అస్థిరంగా అనిపించడం, వాపు రావడం, చప్పుడు రావడం వంటి లక్షణాలు కనిపిస్తే వెంటనే వైద్యులను సంప్రదించాలని సూచిస్తున్నారు. ప్రారంభ దశలో చికిత్స తీసుకుంటే పరిస్థితిని నియంత్రించే అవకాశం ఎక్కువగా ఉంటుందని చెబుతున్నారు.

మోకాళ్ల ఆరోగ్యాన్ని కాపాడుకోవాలంటే చిన్నప్పటి నుంచే జాగ్రత్తలు అవసరమని వైద్యులు చెబుతున్నారు. ప్రతిరోజూ తేలికపాటి వ్యాయామం చేయడం, బరువును నియంత్రణలో ఉంచడం, ఎక్కువసేపు ఒకేచోట కూర్చోకుండా ఉండటం మంచిదని సూచిస్తున్నారు. ఈత, సైక్లింగ్, వాకింగ్ వంటి తక్కువ ఒత్తిడి ఉన్న వ్యాయామాలు మోకాళ్లకు మేలు చేస్తాయని చెబుతున్నారు. తొడ కండరాలను బలపరిచే వ్యాయామాలు కూడా ఉపయోగపడతాయి. చిన్న నొప్పినే పెద్ద హెచ్చరికగా తీసుకుని ముందుగానే జాగ్రత్త పడితే భవిష్యత్తులో తీవ్రమైన సమస్యలను దూరం పెట్టవచ్చని నిపుణులు చెబుతున్నారు.