ఆదివారం ఈ తప్పులు అసలు చేయకూడదు.. లేకుంటే సూర్యదేవుని ప్రకోపం చవిచూడాల్సిందే

హిందూ సంప్రదాయంలో ఆదివారం రోజు సూర్య భగవానుడికి అంకితం. ఈ రోజుని పవిత్ర దినంగా భావిస్తారు హిందువులు. జ్యోతిష్య శాస్త్రం ప్రకారం సూర్యుడు.. ఆరోగ్యం, గౌరవం, శక్తి, విజయానికి కారకుడు. అందువల్ల ఆదివారం చేసే కొన్ని పనులు జీవితంపై ప్రభావం చూపుతాయని నమ్మకం ఉంది. ముఖ్యంగా కొన్ని వస్తువులను కొనుగోలు చేయడం శుభప్రదం కాదని జ్యోతిష్య నిపుణులు చెబుతారు.

ఇనుప వస్తువులు, హార్డ్‌వేర్ వస్తువులు కొనకూడదు

ఇనుము శని గ్రహానికి సంబంధించిన లోహంగా భావిస్తారు. పురాణాల ప్రకారం.. సూర్యుడు, శని మధ్య విభేదాలు ఉన్నాయని చెబుతారు. అందువల్ల ఆదివారం ఇనుప వస్తువులు, పనిముట్లు లేదా హార్డ్‌వేర్ సామగ్రి కొనడం మంచిది కాదని నమ్మకం. ఇలా చేస్తే భవిష్యత్తులో ఆటంకాలు, అవమానాలు ఎదురయ్యే అవకాశం ఉందని చెబుతారు.

ఉప్పు కొనుగోలు చేయడం మంచిది కాదు

జ్యోతిష్య శాస్త్రం ప్రకారం.. రాహు మరియు శని గ్రహాలతో ఉప్పుకు సంబంధం ఉందని భావిస్తారు. ఆదివారం ఉప్పు కొనడం వల్ల ఆర్థిక నష్టాలు పెరగవచ్చని, కుటుంబ సభ్యుల ఆరోగ్యంపై ప్రతికూల ప్రభావం పడవచ్చని నమ్మకం. అవసరమైతే శనివారం లేదా సోమవారం ఉప్పు కొనడం శ్రేయస్కరం.

వాహనాలు, వాహనాల ఉపకరణాలు కొనవద్దు

చాలామంది సెలవు రోజు కావడంతో ఆదివారం కొత్త కారు లేదా బైక్ కొనాలని అనుకుంటారు. అయితే వాహనాలలో ఇనుము ఎక్కువగా ఉపయోగించబడుతుంది కాబట్టి ఈ రోజు వాహనాలు కొనడం అనుకూలం కాదని జ్యోతిష్య శాస్త్రం చెబుతుంది. దీనివల్ల ధననష్టం లేదా ప్రమాదాల అవకాశాలు పెరగవచ్చని నమ్మకం.

నిర్మాణ, తోటపని సామగ్రి కొనకూడదు

ఇంటి నిర్మాణానికి అవసరమైన ఇటుకలు, రాడ్లు, రాళ్లు లేదా తోటపని పరికరాలు ఆదివారం కొనకూడదని చెబుతారు. ఇలా చేయడం వల్ల ఇంటి నిర్మాణ పనులు ఆలస్యం కావడం, కుటుంబంలో విభేదాలు పెరగడం వంటి సమస్యలు రావచ్చని నమ్మకం.

చెక్కతో చేసిన ఫర్నిచర్ కొనడం నివారించండి

సోఫాలు, మంచాలు, అల్మారాలు వంటి చెక్క ఫర్నిచర్‌ను ఆదివారం కొనడం శుభం కాదని భావిస్తారు. దీనివల్ల ఇంట్లో ఆనందం, సౌభాగ్యం తగ్గుతాయని చెబుతారు. ఫర్నిచర్ కొనడానికి గురువారం లేదా శుక్రవారం రోజులు అనుకూలంగా పరిగణిస్తారు.

నల్ల రంగు బట్టలు, చెప్పులు కొనవద్దు

నలుపు రంగు శని, రాహు గ్రహాలకు సూచికగా భావిస్తారు. ఆదివారం సూర్యుడి తేజస్సుకు ప్రతీక కావడంతో నల్ల రంగు వస్తువులు కొనడం మంచిది కాదని చెబుతారు. దీనివల్ల పనుల్లో ఆటంకాలు, మానసిక ఒత్తిడి పెరగవచ్చని నమ్మకం.

Also Read: సంపాదన కంటే ఎక్కువ ఖర్చు చేస్తారు.. ఈ తేదీల్లో పుట్టినవారిలో ఈ అలవాటు

చీపురు కొనడం అశుభంగా భావిస్తారు

చీపురును లక్ష్మీదేవికి ప్రతీకగా భావిస్తారు. ఆదివారం కొత్త చీపురు కొనడం వల్ల ఇంటి అదృష్టం తగ్గుతుందని, అనవసర ఖర్చులు పెరుగుతాయని విశ్వాసం. అందువల్ల ఈ రోజున కొత్త చీపురు కొనకుండా ఉండటం మంచిదని చెబుతారు.

ఆదివారం ఏ వస్తువులు కొనడం శుభం?

జ్యోతిష్య విశ్వాసాల ప్రకారం.. ఆదివారం గోధుమలు, రాగి వస్తువులు, ఎరుపు రంగు దుస్తులు లేదా అలంకరణ సామగ్రి కొనడం శుభప్రదంగా భావిస్తారు. అలాగే సూర్యుడు.. కంటి ఆరోగ్యానికి కారకుడు కావడంతో కళ్లజోడు, కంటి సంరక్షణకు సంబంధించిన వస్తువులు కొనడం కూడా మంగళకరంగా పరిగణిస్తారు.