Amla: ఉసిరి ఎవరు తినకూడదో తెలుసా ?

Amla: ఉసిరి ఆరోగ్యానికి ఎంతో మేలు చేస్తుందని మనందరికీ తెలుసు. విటమిన్ సి సమృద్ధిగా ఉండే ఉసిరి రోగనిరోధక శక్తిని పెంచడానికి, జుట్టు, చర్మ సౌందర్యానికి దివ్యౌషధంలా పనిచేస్తుంది. ఆయుర్వేదంలో దీనిని ‘అమృత ఫలం’ అని పిలుస్తారు. అయితే.. ప్రతి నాణేనికి రెండు పార్శ్వాలు ఉన్నట్టే..ఉసిరి అందరికీ అన్ని వేళలా మంచిది కాదు. కొన్ని ప్రత్యేక ఆరోగ్య సమస్యలు ఉన్నవారు ఉసిరికాయను అధికంగా తీసుకోవడం వల్ల ప్రయోజనం కంటే నష్టమే ఎక్కువ జరిగే ప్రమాదం ఉంది. ఈ నేపథ్యంలో.. ఉసిరిని ఎవరు తినకుండా ఉండాలో ఇప్పుడు తెలుసుకుందాం.

ఉసిరికాయను తినకూడని వారు ఎవరంటే ?

ఉసిరి చేసే మేలు గురించి మనం తరచుగా వింటూనే ఉంటాం. కానీ దాని సైడ్ ఎఫెక్ట్స్ గురించి అవగాహన ఉండటం కూడా చాలా ముఖ్యం. ఈ కింది ఆరోగ్య సమస్యలు ఉన్నవారు ఉసిరి విషయంలో జాగ్రత్తగా ఉండాలి.

1. సర్జరీ చేయించుకోబోయే వారు:
శస్త్రచికిత్సకు ముందు ఉసిరికాయను తీసుకోవడం ప్రమాదకరం. ఉసిరి రక్తం గడ్డకట్టే ప్రక్రియను నెమ్మదిస్తుంది . దీనివల్ల సర్జరీ సమయంలో లేదా తర్వాత విపరీతమైన రక్తస్రావం అయ్యే అవకాశం ఉంటుంది. అందుకే ఏదైనా శస్త్రచికిత్సకు కనీసం రెండు వారాల ముందే ఉసిరి తీసుకోవడం ఆపేయాలని డాక్టర్లు సూచిస్తారు.

2. లో-షుగర్ సమస్య ఉన్నవారు:
డయాబెటిస్ ఉన్నవారికి ఉసిరి మంచిదే. ఎందుకంటే ఇది రక్తంలో చక్కెర స్థాయిలను తగ్గిస్తుంది. కానీ.. ఇప్పటికే లో-షుగర్ సమస్యతో బాధపడుతున్న వారు లేదా షుగర్ లెవల్స్ తగ్గించే మందులు వాడుతున్న వారు ఉసిరిని అధికంగా తీసుకుంటే వారి చక్కెర స్థాయిలు ప్రమాదకర స్థాయికి పడిపోయే అవకాశం ఉంది.

3. కిడ్నీ వ్యాధులతో బాధపడేవారు:
కిడ్నీ సంబంధిత సమస్యలు ఉన్నవారు ఉసిరిని డాక్టర్ల సలహా మేరకే తీసుకోవాలి. ఉసిరి శరీరంలోని సోడియం, పొటాషియం స్థాయిలపై ప్రభావం చూపుతుంది. అంతేకాకుండా.. దీని లోని ఆక్సలేట్లు కొన్నిసార్లు కిడ్నీలో రాళ్లు ఏర్పడటానికి కారణం కావచ్చు. కాబట్టి కిడ్నీ పేషెంట్లు దీనికి దూరంగా ఉండటం మంచిది.

4. తీవ్రమైన అసిడిటీ సమస్య ఉన్నవారు:
ఉసిరికాయ సహజంగానే పుల్లగా ఉంటుంది. సాధారణ అసిడిటీ ఉన్నవారికి ఉసిరి మంచిదే అయినప్పటికీ.. కడుపులో అల్సర్లు లేదా తీవ్రమైన ‘గ్యాస్ట్రో ఈసోఫాగియల్ రిఫ్లక్స్ డిసీజ్’ ఉన్న వారిలో ఇది మంటను మరింత పెంచుతుంది. ఖాళీ కడుపుతో ఉసిరి రసం తాగడం వల్ల ఇటువంటి వారు ఇబ్బంది పడవచ్చు.

5. గర్భిణీలు, పాలు ఇచ్చే తల్లులు:

గర్భిణీలు ఉసిరి తీసుకోవడం వల్ల వికారం లేదా డీహైడ్రేషన్ వంటి సమస్యలు తలెత్తవచ్చు. ఉసిరి అతిగా తింటే డయేరియా (విరేచనాలు) వచ్చే అవకాశం ఉంటుంది. ఇది గర్భధారణ సమయంలో ఇబ్బందికరంగా మారుతుంది. పాలు ఇచ్చే తల్లులు కూడా ఉసిరిని పరిమితంగానే తీసుకోవాలి. ఎందుకంటే ఇది శిశువు జీర్ణక్రియపై ప్రభావం చూపే అవకాశం ఉంది.

6. డీహైడ్రేషన్, మలబద్ధకం ఉన్నవారు:
ఉసిరి సహజంగా ఒక డ్యూరెటిక్ లా పనిచేస్తుంది. అంటే ఇది మూత్ర విసర్జనను పెంచుతుంది. శరీరంలో నీటి శాతం తక్కువగా ఉన్నప్పుడు ఉసిరి తీసుకుంటే అది మరింత డీహైడ్రేషన్‌కు దారితీస్తుంది. అలాగే.. తగినంత నీరు తాగకుండా ఉసిరిని పొడి రూపంలో తీసుకుంటే అది మలబద్ధకం సమస్యను పెంచుతుంది.

నివారణ మార్గాలు – జాగ్రత్తలు:
పరిమితి: రోజుకు ఒకటి లేదా రెండు ఉసిరికాయలు తీసుకోవడం ఆరోగ్యవంతులకు సరిపోతుంది. అతిగా తింటే ఆరోగ్య సమస్యలు తప్పవు.
నీరు: ఉసిరి తిన్న తర్వాత లేదా ఉసిరి రసం తాగిన తర్వాత రోజంతా తగినంత నీరు తాగుతూ ఉండాలి.

Share

• 
• 
• 
• 
• 
•