పిల్లలు పుట్టిన తరువాత మహిళల్లో లైంగిక కోరికలు తగ్గుతాయా? ఈ సమయంలో దంపుతులు ఏం చేయాలి?

Postpartum Affect Intimacy| పిల్లలు పుట్టిన తర్వాత చాలా దంపతుల్లో శారీరక సాన్నిహిత్యం తగ్గిపోతుంది. ఇది చాలా సాధారణం, పూర్తిగా సహజమైన విషయం. ప్రసవం తర్వాత స్త్రీ శరీరంలో అనేక మార్పులు వస్తాయి. ఈ మార్పులు శారీరకంగా, మానసికంగా ప్రభావం చూపుతాయి. ఈ మార్పులకు గల కారణాలు అర్థం చేసుకుంటే దంపతులు ఈ దశను సులభంగా ఎదుర్కోవచ్చు.

ప్రసవం తర్వాత హార్మోన్ల మార్పులు

హార్మోన్లలో మార్పులు లైంగిక కోరికలపై ప్రభావం చూపుతాయి. ప్రసవం అయిన తర్వాత హార్మోన్ల లెవెల్స్ హఠాత్తుగా మారిపోతాయి. ఈస్ట్రోజెన్ హార్మోన్ తగ్గడం వల్ల మహిళల యోని పొడిబారి అసౌకర్యం కలుగుతుంది. బ్రెస్ట్ ఫీడింగ్ చేసేటప్పుడు ప్రొలాక్టిన్ హార్మోన్ పెరుగుతుంది. ఈ హార్మోన్ లైంగిక కోరికను సహజంగా తగ్గిస్తుంది. ఈ మార్పుల వల్ల చాలా మంది స్త్రీలకు తమ భాగస్వామితో శారీరక సాన్నిహిత్యం ఆకర్షణీయంగా అనిపించదు.

శరీరం పూర్తిగా కోలుకోవడానికి సమయం పడుతుంది

ప్రసవం తర్వాత శరీరం నయం కావడానికి చాలా సమయం అవసరం. ముఖ్యంగా ఆపరేషన్ జరిగితే కుట్టిన గాయాలు, నొప్పి, అంతర్గత మార్పులు ఉంటాయి. ఈ సమయంలో వారికి శారీరకంగా చాలా అసౌకర్యంగా ఉంటుంది. వైద్యులు సాధారణంగా 6-8 వారాల పాటు దంపతులు వేచి ఉండాలని సలహా ఇస్తారు. శరీరం పూర్తిగా నయమైన తర్వాతనే సాన్నిహిత్యం ప్రారంభించాలి.

తీవ్ర అలసట, నిద్ర లేకపోవడం

తొలిసారి ప్రసవించిన వారులో త్వరగా అలసిపోతుంటారు. బిడ్డను చూసుకోవడం వల్ల నిద్ర తక్కువ అవుతుంది. అలసట, నిద్ర లేకపోవడం శక్తిని తగ్గించి మూడ్‌ను ప్రభావితం చేస్తాయి. శరీరం అలసటతో ఉన్నప్పుడు విశ్రాంతి ముఖ్యం అవుతుంది. అందువల్ల శారీరక కోరికలు వారిలో కలగవు.

మానసిక, భావోద్వేగ మార్పులు

తల్లి అయిన తర్వాత భావోద్వేగ మార్పులు వస్తాయి. ఒత్తిడి, ఆందోళన, మూడ్ స్వింగ్స్ ఉండవచ్చు. పోస్ట్ పార్టం డిప్రెషన్ (ప్రసవం తరువాత మానసిక ఒత్తిడి) కూడా కోరికను తగ్గిస్తుంది. బిడ్డపై పూర్తిగా దృష్టి పెట్టడం వల్ల భర్తతో భావోద్వేగ సంబంధం తగ్గుతుంది.

శరీర ఆకారంలో మార్పులు, ఆత్మవిశ్వాసం తగ్గడం

ప్రసవం తర్వాత శరీర ఆకారం మారుతుంది. చాలా మంది స్త్రీలు తమ శరీరం తీవ్ర మార్పులకు లోను కావడంతో ఆత్మవిశ్వాసం కోల్పోతారు. తమను తాము ఆకర్షణీయంగా భావించరు. ఇది సాన్నిహిత్యం పట్ల ఆసక్తిని తగ్గిస్తుంది.

దంపతుల జీవితం, బాధ్యతల్లో మార్పు

బిడ్డ పుట్టాక జీవితం పూర్తిగా మారిపోతుంది. దంపతులు కాస్త తల్లిదండ్రులగా మారిపోయి ఆ బాధ్యతల్లో మునిగిపోతారు. ఒకరితో ఒకరు గడిపే సమయం తగ్గుతుంది. రొమాన్స్ కంటే బిడ్డ సంరక్షణ ముఖ్యం అవుతుంది.

సాన్నిహిత్యం సమయంలో నొప్పి, అసౌకర్యం

ప్రసవం తర్వాత యోని పొడిబారడం, సున్నితత్వం వల్ల నొప్పి వస్తుంది. సాన్నిహిత్యాన్ని అసౌకర్యంగా చేస్తుంది. నొప్పిని బలవంతంగా సహించకూడదు.

ఇది సాధారణమా?

అవును, ఇది పూర్తిగా సాధారణం. చాలా మంది స్త్రీలు ప్రసవం తర్వాత ఫీలింగ్స్ తగ్గిపోవడం గమనిస్తారు. ఈ దశ కొన్ని నెలలు లేదా ఎక్కువ కాలం కూడా ఉండవచ్చు. కాలక్రమేణా శరీరం, మనసు సాధారణ స్థితికి చేరుకుంటుంది.

Also Read: ఒక్కసారి తింటే మళ్లీ మళ్లీ తినాలనిపిస్తుంది.. రోజూ చేసే వంటకాల్లో రుచి మరింత పెంచడానికి ఈజీ టిప్స్

సాన్నిహిత్యం మెరుగుపరచడానికి సులభ మార్గాలు

దంపతులు ఒకరితో ఒకరు బాగా మాట్లాడాలి. అవగాహన, ఓపిక చాలా ముఖ్యం. చిన్న చిన్న హావభావాలు (కౌగిలింతలు, చేతులు పట్టుకోవడం) నుంచి మొదలు పెట్టండి. భావోద్వేగ సంబంధాన్ని మెరుగుపరచండి. విశ్రాంతి తీసుకోండి. బాధ్యతలు పంచుకోండి. సమస్య కొనసాగితే వైద్యుడిని సంప్రదించండి.

Share

• 
• 
• 
• 
• 
•