Nightmares: పీడకలలు ఎందుకు వస్తాయి ? భయంకరమైన కలల వెనక ఉన్న శాస్త్రీయ కారణాలు

Nightmares: కలలు, పీడకలలు అనేవి మానవ మెదడుకు సంబంధించిన అత్యంత ఆసక్తికరమైన, రహస్యమైన అంశాలు. ప్రతి రోజూ మనం నిద్రపోయే సమయంలో ఏదో ఒక రకమైన కలలు కంటూనే ఉంటాం. కానీ వాటి వెనక ఉన్న అసలు కారణాల గురించి చాలా మందికి తెలియదు. ఇంతకీ పీడకలలు ఎందుకు వస్తాయి. వాటిని ఎలా నియంత్రించాలి అనే విషయాలకు సంబంధించిన పూర్తి వివరాలను ఇప్పుడు తెలుసుకుందాం.

కలలు ఎలా ఏర్పడతాయి ?

మనం నిద్రపోయేటప్పుడు మన మెదడు పూర్తిగా విశ్రాంతి తీసుకోదు. నిద్రలో ప్రధానంగా నాలుగు దశలు ఉంటాయి. అందులో REM (Rapid Eye Movement) అనే దశలో కలలు ఎక్కువగా వస్తాయి. ఈ దశలో కనుగుడ్లు వేగంగా కదులుతాయి. అంతే కాకుండా మెదడులోని కణాలు మనం మేల్కొని ఉన్నప్పటి కంటే చురుగ్గా పనిచేస్తాయి.

మెదడులోని లింబిక్ సిస్టమ్ భావోద్వేగాలను నియంత్రిస్తుంది, అలాగే హిప్పోకాంపస్ జ్ఞాపకాలను స్టోర్ చేస్తుంది. ఈ రెండు భాగాలు నిద్రలో చురుగ్గా ఉండటం వల్ల మనం చూసిన సన్నివేశాలు, అనుభవించిన భావాలు కలల రూపంలో కనిపిస్తాయి.

కలలు ఎందుకు వస్తాయి?

శాస్త్రవేత్తల ప్రకారం.. కలలు రావడానికి కొన్ని ప్రధాన సిద్ధాంతాలు ఉన్నాయి.

జ్ఞాపకాల క్రమబద్ధీకరణ : రోజంతా మనం సేకరించిన సమాచారాన్ని మెదడు విశ్లేషించి, అవసరమైన వాటిని దీర్ఘకాలిక జ్ఞాపకాలుగా మారుస్తుంది. ఈ ప్రక్రియలో భాగంగా కొన్ని సందర్భాలు కలలుగా వస్తాయి.

భావోద్వేగాల నియంత్రణ: మనలోని భయం, సంతోషం లేదా ఒత్తిడిని మెదడు కలల రూపంలో విడుదల చేసి, మానసిక సమతుల్యతను కాపాడుతుంది.

సమస్యల పరిష్కారం: కొన్నిసార్లు మనం మేల్కొని ఉన్నప్పుడు దొరకని పరిష్కారాలు కలల్లో మెరుపులా తడతాయి.

పీడకలలు అంటే ఏంటి ?

పీడకలలు అనేవి తీవ్రమైన భయాన్ని లేదా ఆందోళనను కలిగించే కలలు. ఇవి కూడా REM దశలోనే వస్తాయి. మెదడులోని అమిగ్డాలా అనే భాగం భయం, ప్రమాద సంకేతాలను ప్రాసెస్ చేస్తుంది. ఇది అతిగా స్పందించినప్పుడు పీడకలలు వస్తాయి.

పీడకలలకు కారణాలు:

ఒత్తిడి, ఆందోళన: వ్యక్తిగత జీవితంలో లేదా ఆఫీసులో ఉండే ఒత్తిడి పీడకలలకు ప్రధాన కారణం.

ట్రామా : గతంలో జరిగిన ఏదైనా చేదు సంఘటన లేదా ప్రమాదం పదే పదే పీడకలల రూపంలో వెంటాడే ప్రమాదం కూడా ఉంటుంది.

Also Read: కొరియన్ల లాగా స్లిమ్‌గా మారాలా ? బెల్లీ ఫ్యాట్ తగ్గించే 7 అద్భుతమైన మార్గాలు

నిద్రలేమి: సరిగ్గా నిద్రపోకపోవడం వల్ల మెదడు అలసిపోయి పీడకలలను సృష్టిస్తుంది.

ఆహారపు అలవాట్లు: పడుకునే ముందు భారీగా భోజనం చేయడం వల్ల జీవక్రియ పెరిగి, మెదడు మరింత చురుగ్గా మారి పీడకలలు వచ్చే అవకాశం ఉంటుంది.

కలలు అనేవి మన మెదడు మనకు ఇచ్చే ఒక ‘వర్చువల్ రియాలిటీ’ వంటివి. ఇవి మనల్ని మానసికంగా సిద్ధం చేయడానికి, మన జ్ఞాపకాలను భద్రపరచడానికి సహాయపడతాయి. తరచుగా పీడకలలు వస్తుంటే అది తీవ్రమైన ఒత్తిడికి సంకేతం కావచ్చు, అటువంటప్పుడు నిద్ర అలవాట్లను మెరుగు పరుచుకోవడం లేదా డాక్టర్‌ని సంప్రదించడం మంచిది.