భర్త కౌగిలించుకోగానే విరిగిన భార్య పక్కటెముకలు.. అతని తప్పులేదన్న డాక్టర్లు

woman breaks ribs after husband’s hug| భర్త ప్రేమగా కౌగిలించుకోవడం వల్ల ఎవరికైనా గాయాలు అవుతాయని ఊహించగలమా? కానీ ఓ మహిళకు ఇలాంటి అనూహ్య ఘటన ఎదురైంది. భర్త సాధారణంగా హత్తుకున్న సమయంలో ఆమెకు 5 పక్కటెముకలు విరిగిపోయాయి. మరో పక్కటెముకకు కూడా స్వల్ప పగులు ఏర్పడ్డాయి. ఆసుపత్రిలో పరీక్షలు చేసిన వైద్యులు ఆమెకు తీవ్రమైన ఆస్టియోపోరోసిస్ ఉన్నట్లు గుర్తించారు. ఎముకలు బలహీనపడితే సాధారణ కదలికల వల్ల కూడా ఎలా ప్రమాదం ఏర్పడుతుందో ఈ ఘటన తెలియజేస్తోంది.

భర్త కౌగిలింతతో మహిళకు తీవ్ర గాయాలు

సింగపూర్‌కు చెందిన మీడియా సంస్థ మదర్‌షిప్ కథనం ప్రకారం.. ఈ ఘటన చైనాలో జరిగింది. మహిళకు చలిగా అనిపించడంతో తన భర్త వాంగ్‌కు ఆ విషయం చెప్పింది. దీంతో ఆమెకు వెచ్చదనం కలిగించేందుకు ఆమె భర్త కౌగిలించుకున్నాడు. ఆ సమయంలో అకస్మాత్తుగా ఎముక విరిగినట్లుగా శబ్దం వినిపించింది. వెంటనే మహిళ తీవ్రమైన నొప్పితో కిందపడిపోయింది. తిరిగి నిలబడటానికి కూడా ఇబ్బంది పడింది. మొదట్లో ఆమెకు చిన్నపాటి కండరాల నొప్పి వచ్చిందని భావించింది. అయితే, నొప్పి తీవ్రంగా ఉన్నప్పటికీ మరుసటి రోజు ఉదయం ఆసుపత్రికి వెళ్లింది.
వైద్యులు ఛాతీకి సీటీ స్కాన్ చేయగా, 5 పక్కటెముకలు విరిగినట్లు తేలింది. ఆరవ పక్కటెముకకు కూడా హెయిర్ లైన్ ఫ్రాక్చర్ (సన్నని పగులు) ఏర్పడినట్లు గుర్తించారు.

మహిళకు తీవ్రమైన ఆస్టియోపోరోసిస్

వైద్య పరీక్షల్లో మహిళకు తీవ్రమైన ఆస్టియోపోరోసిస్ ఉన్నట్లు వెల్లడైంది. ఈ సమస్య వల్ల ఎముకల సాంద్రత తగ్గి, అవి బలహీనపడతాయి. ఫలితంగా చిన్న ఒత్తిడికే ఎముకలు విరిగే ప్రమాదం పెరుగుతుంది. అయితే, ఆమెకు శస్త్రచికిత్స అవసరం లేదని వైద్యులు తెలిపారు. మందులు ఇచ్చి, విశ్రాంతి తీసుకోవాలని సూచించారు. ఎముకలు కోలుకునే వరకు జాగ్రత్తగా ఉండాలని చెప్పారు.

ఆహారపు అలవాట్లు, ఎండకు దూరంగా ఉండటం కారణమా?

అక్టోబర్ 19న హుబే జింగ్‌షి లైవ్‌తో మాట్లాడిన వాంగ్ తన భార్య అలవాట్ల గురించి వివరించాడు. ఆమె బరువు 45 నుంచి 50 కిలోల మధ్య ఉండేదని, తరచూ కఠినమైన డైటింగ్ చేసేదని తెలిపాడు. రాత్రి భోజనం కూడా చాలాసార్లు మానేసేదని చెప్పాడు.

అంతేకాకుండా, ఆమె ప్రతిరోజూ కాఫీ తాగేదని, ఎక్కువగా బయటకు వెళ్లేది కాదని వెల్లడించాడు. సూర్యరశ్మి తగలకుండా శరీరాన్ని పూర్తిగా కప్పుకునేదని వివరించాడు.
సూర్యరశ్మి శరీరంలో విటమిన్ డి ఉత్పత్తికి సహాయపడుతుంది. విటమిన్ డి కాల్షియం శోషణకు అవసరం. కాల్షియం ఎముకల బలాన్ని కాపాడటంలో కీలక పాత్ర పోషిస్తుంది. అయితే, ఈ మహిళకు ఆస్టియోపోరోసిస్ రావడానికి కచ్చితమైన కారణాలను వైద్య పరీక్షల ఆధారంగానే నిర్ధారించాలి.

Also Read: తరచూ ఫిట్స్ వస్తున్నాయా? మూర్ఛ వ్యాధిని నియంత్రించడానికి డాక్టర్ సూచనలు

ఎముకల ఆరోగ్యాన్ని కాపాడుకోవడానికి ఏం చేయాలి?

ఎముకలు బలంగా ఉండేందుకు కాల్షియం అధికంగా ఉండే ఆహారం తీసుకోవాలి. పాలు, పెరుగు, ఆకుకూరలు వంటి పోషకాహారాన్ని రోజువారీ ఆహారంలో చేర్చుకోవాలి. వైద్యుల సూచనల ప్రకారం విటమిన్ డి స్థాయులను పరీక్షించుకోవాలి.

అలాగే, క్రమం తప్పకుండా తగిన వ్యాయామం చేయాలి. అతిగా డైటింగ్ చేయడం, పోషకాహారాన్ని నిర్లక్ష్యం చేయడం మంచిది కాదు. ఎముకలు బలహీనంగా ఉన్నట్లు అనుమానం వస్తే వైద్యులను సంప్రదించాలి.
ప్రస్తుతం ఆ మహిళ ఇంట్లోనే కోలుకుంటున్నట్లు సమాచారం. ఎక్కువ సమయం బయట గడపడం, కాల్షియం తీసుకోవడంపై ఆమె దృష్టి పెట్టినట్లు నివేదిక పేర్కొంది.

Also Read: మీ కనుబొమ్మలు పలుచగా ఉన్నాయా? దట్టంగా పెరగాలంటే ఇలా చేయండి